రాత్రి పడుకునే ముందు ముఖానికి ఏం రాసుకోవాలి?సింపుల్ 3-స్టెప్ నైట్ స్కిన్ కేర్ రొటీన్!
ఆరోగ్యకరమైన, కాంతివంతమైన చర్మం కోసం రాత్రి సమయపు చర్మ సంరక్షణ చాలా ముఖ్యం. ప్రముఖ డెర్మటాలజిస్ట్ డాక్టర్ గుర్వీన్ వడైచ్ గారేకర్ దీనికోసం కేవలం మూడు సులభమైన దశలను సూచించారు. ఈ సులభమైన పద్ధతి ద్వారా ఎలాంటి సంక్లిష్టమైన ప్రొడక్ట్స్ లేకుండానే రాత్రిపూట చర్మాన్ని చక్కగా సంరక్షించుకోవచ్చని నిపుణులు చెబుతున్నారు. అవేంటో ఇప్పుడు చూద్దాం.
ఆకర్షణీయమైన, ఆరోగ్యకరమైన చర్మాన్ని పొందాలంటే మంచి స్కిన్ కేర్ రొటిన్ అనుసరించడం చాలా అవసరం. ముఖ్యంగా పగటిపూట మన ముఖంపై పేరుకుపోయే దుమ్ము, ధూళి, చెమట, మేకప్‌ను రాత్రి సమయంలో సరిగ్గా తొలగించడం చర్మ ఆరోగ్యానికి ఎంతో ముఖ్యం. అయితే, రాత్రిపూట చర్మాన్ని సంరక్షించుకోవడానికి చాలా రకాల ప్రొడక్ట్స్ వాడాల్సిన అవసరం లేదని, కేవలం 3 సింపుల్ స్టెప్స్ పాటిస్తే సరిపోతుందని ప్రముఖ డెర్మటాలజిస్ట్ డాక్టర్ గుర్వీన్ వడైచ్ గారేకర్ వెల్లడించారు. అవేంటో ఇక్కడ చూద్దాం.
స్టెప్ 1: క్లీన్సింగ్
నైట్ స్కిన్ కేర్ రొటీన్‌లో మొదటి, అత్యంత ముఖ్యమైన అడుగు క్లీన్సింగ్. రోజంతా బయట తిరిగి రావడం వల్ల ముఖంపై పేరుకున్న దుమ్ము, నూనె, చెమటను తొలగించడానికి మీ చర్మ తత్వానికి తగిన మంచి ఫేస్‌వాష్ లేదా క్లీంజర్‌ను ఉపయోగించాలి. ఒకవేళ మీరు పగటిపూట మేకప్ వేసుకుని ఉంటే, చర్మాన్ని మరింత శుభ్రంగా ఉంచడానికి డబుల్ క్లెన్సింగ్ పద్ధతిని పాటించడం చాలా మంచిది.
స్టెప్ 2: యాక్టివ్ ఇంగ్రిడియంట్స్
రెండవ దశలో మీ చర్మ సమస్యలు, రకానికి తగినట్లుగా యాక్టివ్ ఇంగ్రిడియంట్స్‌ను ఎంచుకోవాలి.
ఉదాహరణకు:
రెటినాయిడ్స్: వయసు పెరుగుతున్న కొద్దీ చర్మంలో కొల్లాజెన్ తగ్గి ముడతలు, ఫైన్ లైన్స్ ఏర్పడతాయి. రెటినాయిడ్స్ వీటిని తగ్గించడంలో అద్భుతంగా సహాయపడతాయి.
గ్లైకోలిక్ లేదా లాటిక్ ఆమ్లాలు: ఇవి చర్మంపై ఉన్న మృతకణాలను తొలగించి, ముఖానికి కొత్త కాంతిని ఇస్తాయి.
హ్యాలురోనిక్ ఆమ్లం: ఇది చర్మంలో తేమను నిలుపుకోవడానికి, చర్మాన్ని ఎల్లప్పుడూ మృదువుగా ఉంచడానికి ఉపయోగపడుతుంది. వీటిని మీ చర్మానికి తగినట్లుగా ఆల్టర్నేట్ రోజుల్లో వాడుకోవచ్చు.
స్టెప్ 3: మాయిశ్చరైజర్
చివరి, మూడవ ముఖ్యమైన అడుగు మాయిశ్చరైజింగ్. చర్మంలో తేమను లాక్ చేయడానికి మంచి మాయిశ్చరైజర్‌ను రాసుకోవడం తప్పనిసరి. సెరామైడ్స్, పాంథెనాల్ లేదా స్క్వాలేన్ వంటి పదార్థాలు ఉన్న మాయిశ్చరైజర్‌ను ఎంచుకోవడం ఉత్తమం. ఇవి చర్మ రక్షణ పొరను బలపరుస్తాయి.
ఈ మూడు సులభమైన దశలను క్రమం తప్పకుండా పాటిస్తే, రాత్రి సమయంలో మీ చర్మం సహజంగా రిపేర్ అయ్యి, కాంతివంతంగా మారుతుంది.
మరిన్ని లైఫ్ స్టైల్ న్యూస్ కోసం క్లిక్ చేయండి..