National Handloom Day: చీరలు, కుర్తాలే కాదు.. జీన్స్తోనూ హ్యాండ్లూమ్.. ఇలా స్టైల్ చేస్తే ఆఫీస్ నుంచి వీకెండ్ వరకు అదుర్స్!
హ్యాండ్లూమ్ దుస్తులు అంటే పండుగలు, పెళ్లిళ్లు, ప్రత్యేక సందర్భాల్లోనే వేసుకోవాలనే అభిప్రాయం చాలామందిలో ఉంటుంది. అందుకే అందమైన హ్యాండ్లూమ్ చీర, కుర్తా లేదా షర్ట్ కొనుగోలు చేసినా.. వాటిని ప్రత్యేక సందర్భాల కోసం దాచేస్తుంటారు. కానీ భారతీయ హ్యాండ్లూమ్ వస్త్రాల్లో చాలా రకాలు రోజువారీ ఉపయోగానికి కూడా ఎంతో అనుకూలంగా ఉంటాయి. ముఖ్యంగా వేడి, ఉక్కపోత ఎక్కువగా ఉండే వాతావరణంలో తేలికగా, సౌకర్యంగా ఉండే కాటన్ హ్యాండ్లూమ్ దుస్తులు చక్కటి ఎంపికగా నిలుస్తాయి.
ఆగస్టు 7న నేషనల్ హ్యాండ్లూమ్ డే సందర్భంగా మన సంప్రదాయ వస్త్రాలను కేవలం పండుగలకే పరిమితం చేయకుండా రోజువారీ ఫ్యాషన్లోనూ భాగం చేసుకోవచ్చని ఫ్యాషన్ నిపుణులు సూచిస్తున్నారు. ఆఫీస్కు వెళ్లేటప్పుడు, స్నేహితులతో బయటకు వెళ్లినప్పుడు, వీకెండ్లో లేదా ఇంట్లో ఉన్నప్పుడు కూడా హ్యాండ్లూమ్ను చాలా సింపుల్గా, స్టైలిష్గా ధరించవచ్చు. ఇందుకోసం పెద్దగా కొత్త బట్టలు కొనాల్సిన అవసరం లేదు.. మన వార్డ్రోబ్లో ఇప్పటికే ఉన్న దుస్తులతోనే చక్కగా జత చేయొచ్చు.
1. ఒక్క హ్యాండ్లూమ్ దుస్తుతోనే మొదలుపెట్టండి
హ్యాండ్లూమ్ ఫ్యాషన్ అంటే తల నుంచి కాళ్ల వరకు మొత్తం సంప్రదాయ దుస్తులే ధరించాల్సిన అవసరం లేదు. ఒక మంచి హ్యాండ్లూమ్ కుర్తా లేదా షర్ట్తోనే ప్రారంభించవచ్చు. ఆఫీస్కు కాటన్ హ్యాండ్లూమ్ కుర్తా, క్యాజువల్ లుక్ కోసం హ్యాండ్లూమ్ షర్ట్ ఎంచుకోవచ్చు. ఇంట్లో అయితే హ్యాండ్లూమ్ కుర్తీని స్ట్రెయిట్ ప్యాంట్ లేదా పైజామాతో జత చేస్తే సౌకర్యంగా ఉంటుంది.
2. జీన్స్తో జత చేస్తే అదిరే లుక్
హ్యాండ్లూమ్ దుస్తులను కేవలం సంప్రదాయ దుస్తులతోనే కలపాల్సిన అవసరం లేదు. హ్యాండ్లూమ్ కుర్తాను బ్లూ జీన్స్తో జత చేస్తే రిలాక్స్డ్ లుక్ వస్తుంది. అలాగే హ్యాండ్లూమ్ షర్ట్ను టైలర్డ్ ట్రౌజర్స్తో కలిపితే ఆఫీస్కు సరిపోయే మోడ్రన్ లుక్ పొందవచ్చు.
3. రోజువారీకి తేలికైన కాటన్ బెస్ట్
ప్రతి హ్యాండ్లూమ్ వస్త్రం రోజువారీ ఉపయోగానికి సరిపోదు. రెగ్యులర్గా ధరించాలనుకుంటే తేలికగా, గాలి ఆడేలా ఉండే హ్యాండ్లూమ్ కాటన్ వస్త్రాలను ఎంచుకోవడం మంచిది. ముఖ్యంగా వేడి, తేమ ఎక్కువగా ఉండే రోజుల్లో లూజ్గా ఉండే దుస్తులు మరింత సౌకర్యంగా ఉంటాయి.
4. ఈ రంగులు ఉంటే మ్యాచింగ్ ఈజీ
తెలుపు, బేజ్, ఇండిగో, ఆఫ్-వైట్, ఎర్తీ టోన్స్ వంటి సింపుల్ రంగులు హ్యాండ్లూమ్ దుస్తులను మరింత వర్సటైల్గా మారుస్తాయి. వీటిని ఇప్పటికే మన దగ్గర ఉన్న జీన్స్, ట్రౌజర్స్, స్కర్ట్స్ వంటి వాటితో సులభంగా జత చేసుకోవచ్చు.
5. యాక్సెసరీస్ విషయంలో ఓవర్ చేయొద్దు
హ్యాండ్లూమ్ దుస్తుల అందం వాటి నేత, రంగులు, డిజైన్లోనే ఉంటుంది. అందుకే ఎక్కువ నగలు, భారీ యాక్సెసరీస్ జోడించకుండా సింపుల్గా ఉంచితే మరింత స్టైలిష్గా కనిపిస్తుంది. ముఖ్యంగా రోజువారీ దుస్తులకు చిన్న నగలు, సింపుల్ ఫుట్వేర్ సరిపోతాయి.
6. ఈ కాంబినేషన్ ట్రై చేస్తే సింపుల్గా స్టైలిష్
హ్యాండ్లూమ్ కాటన్ షర్ట్కు బాగా ఫిట్ అయ్యే బ్లూ జీన్స్, కంఫర్టబుల్ లోఫర్స్ జత చేస్తే చక్కటి క్యాజువల్ లుక్ వస్తుంది. అలాగే హ్యాండ్లూమ్ కుర్తాను స్ట్రెయిట్ ట్రౌజర్స్, కొల్హాపురి చెప్పులతో కలిపినా సంప్రదాయం, ఆధునికత రెండూ కలిసిన అందమైన లుక్ వస్తుంది.
పండుగలు, పెళ్లిళ్ల కోసం అల్మారాలో దాచిపెట్టే దుస్తులుగా కాకుండా హ్యాండ్లూమ్ను రోజువారీ జీవితంలోకి తీసుకురావాల్సిన సమయం ఇదే. సరైన ఫ్యాబ్రిక్, సింపుల్ రంగులు, కంఫర్టబుల్ ఫిట్టింగ్, మన దగ్గర ఉన్న సాధారణ దుస్తులతో సరైన కాంబినేషన్ ఎంచుకుంటే హ్యాండ్లూమ్తో ప్రతిరోజూ కొత్త లుక్ను సృష్టించుకోవచ్చు. నేషనల్ హ్యాండ్లూమ్ డే సందర్భంగా మన సంప్రదాయ నేత దుస్తులకు కొత్త స్టైల్తో మరింత ప్రాధాన్యం ఇవ్వొచ్చు.