వర్షాకాలంలో కప్పల గోల ఎక్కువైందా? ఈ 3 వంటింటి చిట్కాలతో చిటికెలో చెక్ పెట్టండి!
వర్షాకాలం రాగానే ఇళ్ల చుట్టుపక్కల నీరు చేరడం, తేమ పెరగడం వల్ల కప్పల హల్చల్ ఎక్కువవుతుంది. ముఖ్యంగా గార్డెన్లు, గేట్ల కింద, బాల్కనీలలో కప్పలు చేరడం వల్ల చిరాకుగా ఉంటుంది. వీటిని వదిలించుకోవడానికి చాలామంది రసాయనాలను వాడతారు. అయితే అవి పెంపుడు జంతువులకు, పిల్లలకు హానికరం కావచ్చు. ఇలాంటి ఇబ్బంది లేకుండా వంటింట్లో ఉండే కొన్ని సులభమైన సహజ సిద్ధమైన పదార్థాలతో కప్పలను తరిమికొట్టవచ్చు. అదేలాగో ఇప్పుడు చూద్దాం..
వర్షాకాలం మొదలవగానే ఇళ్ల చుట్టుపక్కల వాతావరణం అంతా పచ్చదనంతో, తేమతో నిండిపోతుంది. అయితే, దీనితో పాటుగా వచ్చే పెద్ద సమస్య.. కప్పల బెడద. వర్షాల వల్ల బయట నీరు నిలవడం, కీటకాలు పెరగడం వల్ల ఆహారం కోసం కప్పలు నేరుగా మన గుమ్మాల ముందుకు, గార్డెన్లలోకి చేరిపోతాయి. మీరు కూడా మీ ఇంట్లోకి కప్పలు రాకుండా నియంత్రించాలనుకుంటే.. ఈ మూడు సులభమైన సహజ చిట్కాలను పాటించండి:
ఉప్పు, వెనిగర్ స్ప్రే: కప్పలను దూరంగా ఉంచడానికి ఇది అత్యంత సులభమైన, ప్రభావవంతమైన పద్ధతి. కప్పలకు తేమ ఎక్కువగా ఉండే ప్రదేశాలు ఇష్టమైనప్పటికీ, ఉప్పు, వెనిగర్ ఘాటైన వాసనను అవి భరించలేవు.
ఎలా ఉపయోగించాలి?: ఒక స్ప్రే బాటిల్ తీసుకుని అందులో నీరు నింపండి. దానికి కొద్దిగా వెనిగర్, టేబుల్ సాల్ట్ వేసి బాగా కలపండి. ఈ మిశ్రమాన్ని కప్పలు తిరిగే గుమ్మాలు, గేట్ల దగ్గర, గోడల మూలల్లో స్ప్రే చేయండి. ఈ స్ప్రేను నేరుగా మొక్కలపై చల్లకండి, ఎందుకంటే ఉప్పు, వెనిగర్ వల్ల మొక్కలు దెబ్బతినే ప్రమాదం ఉంది.
కాఫీ పౌడర్ ఉపయోగించండి: మీకు అందమైన గార్డెన్ ఉండి, అక్కడ ఎక్కువగా కప్పలు చేరుతుంటే కాఫీ పొడి మీకు అద్భుతంగా సహాయపడుతుంది. కాఫీ పొడి తీవ్రమైన వాసన కప్పలకే కాకుండా అనేక రకాల చిన్న కీటకాలకు కూడా అసౌకర్యాన్ని కలిగిస్తుంది.
ఎలా ఉపయోగించాలి?: కప్పలు ఎక్కువగా కనిపించే తోటలోని మూలల్లో, కుండీల చుట్టుపక్కల కొద్దిగా కాఫీ పొడిని చల్లండి. దీనివల్ల కప్పలు ఆ ప్రాంతంలోకి రావడానికి అస్సలు ఇష్టపడవు.
బ్లీచింగ్ పౌడర్: వర్షాకాలంలో కేవలం కప్పలే కాకుండా మురికి నీరు, నాచు వల్ల దుర్వాసన కూడా వస్తుంది. దీనిని నివారించడానికి బ్లీచింగ్ పౌడర్ చక్కని మార్గం.
ఎలా ఉపయోగించాలి?: ఇంటి వెలుపల ఉన్న డ్రైనేజీలు, తడి గోడలు, మురికిగా ఉన్న ప్రదేశాలలో బ్లీచింగ్ పౌడర్ చల్లడం వల్ల అక్కడ దుర్వాసన, తేమ తగ్గుతాయి. ఇది అక్కడ కప్పలు నివసించడానికి అనుకూలమైన వాతావరణాన్ని లేకుండా చేస్తుంది. అయితే బ్లీచింగ్ పౌడర్ వాడేటప్పుడు పిల్లలు, పెంపుడు జంతువులు దానికి దూరంగా ఉండేలా జాగ్రత్త వహించండి. ఈ చిట్కాలతో పాటు మీ ఇంటి ప్రాంగణంలో నీరు నిల్వ ఉండకుండా చూసుకోవడం కూడా కప్పల సమస్యను శాశ్వతంగా దూరం చేస్తుంది.
మరిన్ని లైఫ్ స్టైల్ న్యూస్ కోసం క్లిక్ చేయండి..