కరివేపాకు త్వరగా పాడవుతుందా.. ఈ చిన్న ట్రిక్తో నెలల పాటు ఫ్రెష్గా ఉంచుకోండి..
సాంబార్, పప్పు, చట్నీ.. వంట ఏదైనా సరే, చివర్లో కరివేపాకు తాలింపు పడితే వచ్చే ఆ సువాసనే వేరు. కూరలకు అద్భుతమైన రుచిని ఇచ్చే కరివేపాకు ఆరోగ్యానికి కూడా ఎంతో మంచిది. కానీ మార్కెట్ నుండి తెచ్చిన రెండు మూడు రోజుల్లోనే అది నల్లగా మారిపోవడం లేదా కుళ్లిపోవడం ప్రతి ఒక్కరినీ వేధించే పెద్ద సమస్య. అయితే వంటింట్లో దొరికే వస్తువులతో కరివేపాకును 6 నెలల పాటు పచ్చగా ఎలా ఉంచుకోవచ్చో తెలుసుకుందాం..
భారతీయ వంటకాల్లో కరివేపాకుకు ఒక ప్రత్యేక స్థానం ఉంది. వేడి అన్నం, సాంబార్, పప్పు, చట్నీ ఇలా దేనిలోనైనా కరివేపాకు తాలింపు పెడితే వచ్చే ఆ సువాసనే వేరు. ఇది ఆహార రుచిని పెంచడమే కాకుండా ఆరోగ్యానికి కూడా ఎంతో మేలు చేస్తుంది. అయితే ఎండలు, వేడి వాతావరణం కారణంగా కరివేపాకు చాలా త్వరగా నల్లగా మారిపోతుంటుంది. అంతేకాకుండా అది త్వరగా ఎండిపోవడం లేదా కుళ్లిపోవడం వంటి సమస్యలు కూడా ఎదురవుతుంటాయి. కొన్ని సులభమైన ఇంటి చిట్కాలను పాటిస్తే కరివేపాకు సహజ సువాసన, రుచి, పచ్చదనం దెబ్బతినకుండా నెలల తరబడి తాజాగా ఉంచుకోవచ్చు.
గాలి చొరబడని డబ్బా – టిష్యూ పేపర్ పద్ధతి
- కరివేపాకును ఎక్కువ కాలం నిల్వ ఉంచుకోవడానికి ఇది ఒక అద్భుతమైన పద్ధతి.
- ముందుగా కరివేపాకు రెబ్బల నుండి ఆకులను వేరు చేసి శుభ్రమైన నీటితో కడగాలి.
- ఆ తర్వాత వాటిని టిష్యూ పేపర్ లేదా కాటన్ క్లాత్పై పరిచి, తేమ ఏమాత్రం లేకుండా ఫ్యాన్ కింద పూర్తిగా ఆరబెట్టాలి.
- కరివేపాకు ఆరిన తర్వాత, గాలి చొరబడని ప్లాస్టిక్ లేదా గాజు పాత్ర అడుగున ఒక టిష్యూ పేపర్ పరచాలి.
- దానిపై కరివేపాకును ఉంచి, పై భాగాన్ని మళ్ళీ టిష్యూ పేపర్తో కప్పి మూత పెట్టాలి. ఈ పాత్రను ఫ్రిజ్లో ఉంచితే కరివేపాకు చాలా రోజుల పాటు తాజాగా ఉంటుంది.
కాటన్ క్లాత్లో భద్రపరచండి..
ఒకవేళ మీ దగ్గర ఎయిర్ టైట్ కంటైనర్ లేకపోతే ఈ పద్ధతి వాడవచ్చు. కరివేపాకును కడిగి ఆరబెట్టిన తర్వాత వాటిని ఒక పలుచని కాటన్ క్లాత్ వదులుగా చుట్టాలి. అలా చుట్టిన మూటను ఫ్రిజ్లోని కూరగాయల బాక్స్లో భద్రపరచాలి. ఈ గుడ్డ ఆకులలోని అధిక తేమను పీల్చుకుని, అవి కుళ్లకుండా కాపాడుతుంది.
ఫ్రీజర్లో 6 నెలల పాటు భద్రం
కరివేపాకును ఆరు నెలల వరకు నిల్వ ఉంచుకోవాలనుకునే వారికి ఫ్రీజర్ బెస్ట్ ఆప్షన్. పూర్తిగా తడి ఆరిపోయిన కరివేపాకు ఆకులను ఒక జిప్లాక్ బ్యాగ్లో పెట్టాలి. అందులోని గాలిని పూర్తిగా నొక్కి తీసేసి, జిప్ లాక్ చేసి ఫ్రీజర్లో పెట్టేయాలి. మీకు అవసరమైనప్పుడు కొద్దిగా బయటకు తీసి వాడుకోవచ్చు. ఇలా చేయడం వల్ల కరివేపాకు రుచి, సువాసన అస్సలు చెడిపోవు.
నూనెలో వేయించి నిల్వ చేసుకోండి..
వర్కింగ్ ఉమెన్స్కు ఈ చిట్కా బాగా హెల్ప్ అవుతుంది. ఒక బాణలిలో కేవలం అర టీస్పూన్ నూనె వేసి, కరివేపాకును తక్కువ మంట మీద తేలికగా వేయించాలి. ఆ తర్వాత అది పూర్తిగా చల్లారిన పిమ్మట, ఒక గాజు సీసాలో వేసి ఫ్రిజ్లో భద్రపరుచుకోవాలి. ఈ విధంగా వేయించిన కరివేపాకు వంటల్లో వేసినప్పుడు మరింత రుచిని ఇస్తుంది.
ఈ పొరపాటు ఎప్పుడూ చేయవద్దు..
చాలా మంది కరివేపాకును త్వరగా ఆరాలని ఎండలో పెడుతుంటారు. కానీ అలా అస్సలు చేయకూడదు. ఎండ తగలడం వల్ల కరివేపాకులోని సహజ సువాసన, రుచి మరియు పోషకాలు ఆవిరైపోతాయి. కాబట్టి ఆకులను ఎల్లప్పుడూ నీడలో లేదా ఫ్యాన్ కింద మాత్రమే ఆరబెట్టాలి.