పూరీలు నూనె పీల్చకుండా, క్రిస్పీగా రావాలా?ఈ అద్భుతమైన చిట్కాలు మీ కోసమే..!
తెలుగువారి ఇళ్లల్లో ఆదివారం లేదా పండుగల వేళ చేసుకునే ప్రత్యేక ఉపహారాల్లో పూరీ ఒకటి. చిన్న పిల్లల నుండి పెద్దల వరకు అందరూ ఎంతో ఇష్టంగా తినే ఈ వంటకంలో ఒకే ఒక్క సమస్య తరచూ వేధిస్తుంటుంది. అదే పూరీలు ఎక్కువగా నూనె పీల్చుకోవడం. నూనె జిడ్డుగా మారిన పూరీలు తినడం ఆరోగ్యానికి మంచిది కాదు సరే సరి, రుచిని కూడా పాడుచేస్తాయి. ఈ సమస్యకు పరిష్కారంగా కంటెంట్ క్రియేటర్ అనితా మోహన్ కొన్ని సులువైన, ప్రతిరోజూ పాటించదగిన చిట్కాలను పంచుకున్నారు.
పూరీలు నూనె ఎక్కువగా పీల్చకుండా, బంతిలా పొంగుతూ క్రిస్పీగా రావడానికి ప్రముఖ కంటెంట్ క్రియేటర్ అనితా మోహన్ కొన్ని సులువైన కిచెన్ హ్యాక్స్ పంచుకున్నారు. ఆమె చెప్పిన వివరణ మేరకు.. చాలామంది పూరీ పిండిని చపాతీ పిండిలా మెత్తగా కలుపుతుంటారు. కానీ, పూరీ పిండిని తగినన్ని నీళ్లు మాత్రమే పోసి గట్టిగా, బిగుతుగా కలపాలి. పిండి ఎంత గట్టిగా ఉంటే నూనె అంత తక్కువగా పీల్చుకుని పూరీలు చక్కగా పొంగుతాయి. పిండి కలిపేటప్పుడు ఒకట్రెండు స్పూన్ల ఉప్మా రవ్వ కలిపితే పూరీలు ఎక్కువసేపు మెత్తబడకుండా కరకరలాడుతూ ఉంటాయి. పిండి కలిపిన వెంటనే పూరీలు చేయడం కంటే, దానిని మూతపెట్టి కనీసం 30 నిమిషాల పాటు ఫ్రిజ్‌లో పెట్టాలి. చల్లబడిన పిండి వేడి నూనెలో పడినప్పుడు నూనెను పీల్చుకోదు. పండుగ రోజుల్లో ముందుగానే పిండి సిద్ధం చేసుకునేవారికి ఇది బాగా ఉపయోగపడుతుంది.
పూరీలు వేయించడానికి ముందు కాగుతున్న నూనెలో చిటికెడు ఉప్పు వేయాలి. ఇది నూనెపై ఒక రక్షక పొరలా పనిచేసి పూరీలు ఎక్కువ నూనె పీల్చకుండా అడ్డుకుంటుంది. అయితే ఉప్పు పరిమాణం చాలా తక్కువగా ఉండాలి, లేకపోతే నూనె పైకి తుల్లే ప్రమాదం ఉంటుంది.
అలాగే, పూరీలు ఒత్తేటప్పుడు పొడి పిండి చల్లితే అది నూనెలో మాడిపోయి నూనె పాడవుతుంది. పీట, కర్రకు కాస్త నూనె రాసి పూరీలను ఒత్తుకోవడం మంచిది. ఇప్పుడు నూనె బాగా వేడెక్కిన తర్వాతే మీడియం-హై ఫ్లేమ్‌పై పూరీలను వేయించాలి. చల్లటి నూనెలో వేస్తే పూరీ స్పాంజిలా నూనెను తాగేస్తుంది. ఈ చిన్న చిన్న చిట్కాలు పాటిస్తే తక్కువ నూనెతో, హెల్దీగా, కరకరలాడే రుచికరమైన పూరీలను ఇంట్లోనే సులభంగా తయారు చేసుకోవచ్చు.
మరిన్ని లైఫ్ స్టైల్ న్యూస్ కోసం క్లిక్ చేయండి..