రోజుకో రంగు మారే వింత పువ్వు.. నిన్న, నేడు, రేపు మొక్కను ఇంట్లోనే ఎలా పెంచాలో తెలుసా?
ఒకే మొక్క.. ఒకే పువ్వు.. కానీ మూడు రోజుల్లో మూడు వేర్వేరు రంగులు.. వినడానికే ఎంతో వింతగా ఉంది కదూ? మొదటి రోజు ఊదా, మరుసటి రోజు లావెండర్, మూడో రోజుకు స్వచ్ఛమైన తెలుపు రంగులోకి మారిపోయే అద్భుతమైన పువ్వు ప్రకృతిలో ఒకటి ఉంది. నిన్న, నేడు, రేపు అని పిలిచే ఈ మాయాజాలపు మొక్క విశేషాలేంటో, దీన్ని ఇంట్లోనే ఎలా పెంచుకోవచ్చో ఇప్పుడు తెలుసుకుందాం..
పూల మొక్కలంటే ఇష్టపడని ప్రకృతి ప్రేమికులు ఉండరు. అయితే, ఒకే మొక్కకు రోజుకో రంగులో పూలు వికసిస్తూ, చూసేవారిని మంత్రముగ్ధులను చేస్తే ఆ అనుభూతే వేరు. మొదటి రోజు ముదురు ఊదా, మరుసటి రోజు లావెండర్, మూడో రోజుకు స్వచ్ఛమైన తెలుపు రంగులోకి మారిపోయే అద్భుతమైన మొక్కే నిన్న, నేడు, రేపు. వృక్షశాస్త్రంలో దీనిని బ్రున్ఫెల్సియా పాసిఫ్లోరా అని పిలుస్తారు. దక్షిణ అమెరికా మూలాలు కలిగిన ఈ హరిత మొక్కను అక్కడ రైన్ట్రీ అని కూడా పిలుస్తారు. వసంత కాలంలో విరివిగా పూలు పూసే ఈ మొక్క, అనుకూల వాతావరణం ఉంటే ఏడాది పొడవునా పూస్తూనే ఉంటుంది. రాత్రివేళల్లో పరిసరాలను సువాసనతో నింపే ఈ మొక్కను బాల్కనీ కుండీల్లో లేదా తోట సరిహద్దుల వద్ద ఎంతో సులభంగా పెంచుకోవచ్చు.
మట్టి మిశ్రమం – కుండీ తయారీ
ఈ మొక్క ఆరోగ్యంగా పెరగడానికి సారవంతమైన, సేంద్రియ పదార్థాలు పుష్కలంగా ఉన్న, కొద్దిగా ఆమ్లత్వం కలిగిన నేల అవసరం.
మట్టి మిశ్రమం: 2 వంతుల తోట మట్టి, 1 వంతు వర్మీకంపోస్ట్ లేదా పశువుల ఎరువు, 1 వంతు ఇసుక లేదా పెర్లైట్, 1 వంతు కోకోపీట్ లేదా పీట్ మాస్ కలపాలి.
ఆమ్లత్వం పెంచడానికి: కొద్దిగా వాడిన టీ పొడి ఎరువును మట్టిలో కలుపుకుంటే మంచిది.
కుండీ అడుగున నీరు సాఫీగా బయటకు పోయే రంధ్రాలు ఉండేలా చూసుకోవాలి.
కొమ్మ ద్వారా కొత్త మొక్కను నాటే విధానం
నర్సరీల నుంచి కొనుగోలు చేయడమే కాకుండా, కొమ్మల ద్వారా కూడా ఈ మొక్కను సులభంగా పెంచవచ్చు:
కొమ్మ ఎంపిక: కనీసం 8 అంగుళాల పొడవు ఉండి, గట్టిగా ఉన్న ముదురు కొమ్మను ఎంచుకోవాలి.
ఆకుల తొలగింపు: కొమ్మ పైభాగంలో కేవలం 2 ఆకులను మాత్రమే ఉంచి, మిగిలిన ఆకులన్నింటినీ తీసేయాలి. కింది భాగాన్ని ఏటవాలుగా కత్తిరించాలి.
నాటడం: రూటింగ్ హార్మోన్ అందుబాటులో ఉంటే కొమ్మ చివరను అందులో ముంచి, సిద్ధం చేసుకున్న తేమగల మట్టి సంచిలో కనీసం 3 అంగుళాల లోతులో నాటాలి.
తేమ సంరక్షణ: కొమ్మపై ఒక ప్లాస్టిక్ కవర్ను తగలకుండా కప్పి, పాక్షిక నీడలో ఉంచాలి.
వేర్లు రావడం: 4 నుండి 5 వారాలలో కొత్త వేర్లు వస్తాయి. ఆ తర్వాత దానిని శాశ్వత కుండీలోకి మార్చుకోవచ్చు.
ఎండ, నీరు – సంరక్షణ చిట్కాలు
సూర్యరశ్మి: దీనికి లేత ఎండ చాలా అనుకూలం. తీవ్రమైన వేసవి ఎండల సమయంలో మొక్కను ఇతర పెద్ద చెట్ల నీడలో లేదా గ్రీన్ నెట్ కింద ఉంచాలి.
నీటి సరఫరా: మట్టిలో ఎల్లప్పుడూ తేమ ఉండాలి కానీ బురదగా మారకూడదు. కుండీ పైమట్టి ఆరినప్పుడు మాత్రమే నీరు అందించాలి.
ఎరువులు: పూలు సమృద్ధిగా పూయడానికి ఫాస్ఫరస్ అధికంగా ఉండే సేంద్రియ ఎరువులను క్రమం తప్పకుండా వేయాలి.
తెగుళ్ల నివారణ: సాలీడు పురుగులు, పేనుబంక వంటివి ఆకుల రసాన్ని పీల్చకుండా ఉండటానికి క్రమం తప్పకుండా వేప నూనెను పిచికారీ చేయాలి. ఆకులపై అప్పుడప్పుడు నీటిని చిలకరించడం వల్ల కీటకాల బెడద తగ్గుతుంది.
ఈ చిన్నపాటి జాగ్రత్తలతో బ్రున్ఫెల్సియా మొక్కను నాటుకుంటే, ప్రతిరోజూ రంగులు మార్చే పూల అందాలతో మీ ఇల్లు, బాల్కనీ సరికొత్త శోభను సంతరించుకుంటుంది.