‘పీఎం నరేంద్రమోదీ’ బయోపిక్ విడుదల వాయిదా

న్యూఢిల్లీ: ప్రధాని నరేంద్రమోదీ జీవితం ఆధారంగా తెరకెక్కిన చిత్రం ‘ పీఎం నరేంద్రమోదీ’. దేశ్ భక్తి యే మేరా శక్తి అనేది ఈ చిత్ర క్యాప్షన్. ఈ సినిమాలో వివేక్ ఒబేరాయ్ నరేంద్రమోడీ పాత్రలో న‌టించాడు. అయితే ఈ చిత్రం ముందుగా నిర్ణయించిన ప్రకారం ఏప్రిల్ 5న విడుదల కావడం లేదని నిర్మాత సందీప్ సింగ్ వెల్లడించారు. మా సినిమా పీఎం నరేంద్రమోదీ ఏప్రిల్ 5న విడుదల కావడం లేదు. విడుదలకు సంబంధించిన అప్‌డేట్ త్వరలో అందిస్తామని సందీప్ సింగ్ ట్వీట్ చేశారు. పీఎం నరేంద్రమోదీ విడుదలను నిలిపేయాలని కాంగ్రెస్ పార్టీ సుప్రీంకోర్టులో పిటిషన్ దాఖలు చేసిన విషయం తెలిసిందే. పిటిషన్‌ను సుప్రీంకోర్టు పరిగణనలోకి తీసుకున్న నేపథ్యంలో.. సినిమా విడుదల మరింత ఆలస్యం కానుంది. లోక్‌సభ ఎన్నికల నేపథ్యంలో పీఎం నరేంద్రమోదీ చిత్రం బీజేపీకి రాజకీయంగా లబ్ధిచేకూర్చేవిధంగా ఉందని కాంగ్రెస్‌ ఆరోపిస్తోంది.