పీవీ సింధును పెళ్ళాడతా.. లేదా కిడ్నాప్ చేస్తా.. 70 ఏళ్ళ ముసలి వగ్గు వింత కోర్కె..

ఇది సీరియస్ విషయమో, లేదా తమాషా జోక్ ఏమో గానీ తమిళనాడులో 70 ఏళ్ళ ముసలివగ్గు ఒకరు తాను బ్యాడ్మింటన్ స్టార్ పీవీ సింధును పెళ్లాడతానంటున్నాడు. రామనాథపురం జిల్లాకు చెందిన మలైసామి అనే ఈయన.. ఇలా తన వింత కోర్కెను బయటపెట్టాడు. సింధును వివాహం చేసుకుంటానని, అందుకు తగిన ఏర్పాట్లు చేయకపోతే ఆమెను కిడ్నాప్ చేస్తానని హెచ్ఛరిస్తున్నాడు. జిల్లా కలెక్టర్ నిర్వహించిన ప్రజాదర్బార్ లో మలైసామి ఈ మేరకు ఓ వినతిపత్రాన్ని ఆయనకు సమర్పించాడు. (సాధారణంగా ప్రతి వారం ఆ జిల్లాలో ఇలాంటి ప్రజాదర్బార్ లను కలెక్టరేట్ లో నిర్వహిస్తుంటారు. ఆ సందర్భంగా ప్రజలనుంచి అందే విజ్ఞప్తులను స్వీకరిస్తుంటారు). పీవీ సింధు ఫొటోతోను, తన ఫొటోతోను కూడిన లేఖను ఈ ముసలాయన అందజేశాడు. పైగా తాను 2004 ఏప్రిల్ 4 న పుట్టానని, తన వయస్సు
16 ఏళ్ళేనని కూడా అందులో మలైసామి పేర్కొన్నాడు. 24 ఏళ్ళ సింధు బ్యాడ్మింటన్ కెరీర్ ఎలా ఎదిగిపోతోందో చూసి తను ఎంతో ఇంప్రెస్ అయ్యానని, ఇక ఆమెను తన జీవిత భాగస్వామిని చేసుకోవాలన్నదే తన ఆశయమని అంటున్నాడు. ఈ ముసలి వగ్గు విష్ విని అంతా ఆశ్చర్యంతో ముక్కున వేలేసుకుంటున్నారు. సింధుకి ఈ విషయం తెలిసి పడీపడీ నవ్వుకుంటుందేమో చూడాలి !