పెళ్లికి ముందు నెల రోజుల పాటు ఏడుస్తారు! ఈ విచిత్ర సాంప్రదాయం గురించి తెలుసా?
తుజియా తెగలో పెళ్లికి ముందు వధువు ఏడవడం ప్రత్యేక సంప్రదాయం. వివాహానికి నెల రోజుల ముందు నుంచి ప్రతిరోజూ ఏడుస్తూ పాటలు పాడే ఆచారం కొన్ని ప్రాంతాల్లో కనిపిస్తుంది. ఇది దుఃఖం కోసం మాత్రమే కాదు.. తల్లిదండ్రులు, బంధువులపై ప్రేమ, కొత్త జీవితంలోకి అడుగుపెట్టే భావోద్వేగాలను వ్యక్తం చేయడానికీ ప్రతీకగా భావిస్తారు.
పెళ్లి అంటే సాధారణంగా ఆనందం, వేడుకలు, పాటలు, నృత్యాలతో సందడిగా ఉండే కార్యక్రమం. కానీ చైనాలోని తుజియా తెగలో పెళ్లికి ముందు వధువు ఏడవడం ఒక ప్రత్యేక సంప్రదాయంగా కొనసాగుతోంది. పెళ్లికి సుమారు నెల రోజుల ముందు నుంచే ఈ ఆచారం ప్రారంభమవుతుంది. కొన్ని ప్రాంతాల్లో వధువు ప్రతిరోజూ సుమారు గంటపాటు ఏడుస్తూ సంప్రదాయ పాటలు పాడుతుందని చారిత్రక వివరాలు చెబుతున్నాయి.
ఏడుపు వెనుక అసలు అర్థం ఏంటి?
ఇది కేవలం దుఃఖాన్ని వ్యక్తం చేయడానికి చేసే ఏడుపు కాదు. తల్లిదండ్రులు, సోదరులు, బంధువులపై ఉన్న ప్రేమ, వారిని విడిచి కొత్త ఇంటికి వెళ్లాల్సి రావడం వంటి భావాలను ఈ పాటల్లో వ్యక్తపరుస్తారు. క్రైయింగ్ మ్యారేజ్ సాంగ్స్గా పిలిచే ఈ పాటల్లో కుటుంబ సభ్యులతో పాటు పాతకాలంలో వివాహాలను ఏర్పాటు చేసే మధ్యవర్తులపై విమర్శలు కూడా ఉండేవి. పాత చైనా సమాజంలో మహిళలకు తమ వివాహంపై నిర్ణయం తీసుకునే స్వేచ్ఛ పరిమితంగా ఉండేది. దీంతో ఈ ఏడుపు పాటలు మహిళల భావాలను, అసంతృప్తిని వ్యక్తం చేసే ఒక సామాజిక మార్గంగా కూడా అభివృద్ధి చెందినట్లు పరిశోధనలు సూచిస్తున్నాయి.
తల్లి, అమ్మమ్మ కూడా పాల్గొంటారు
కొన్ని ప్రాంతాల్లో ఈ ఆచారం దశలవారీగా జరుగుతుంది. మొదట వధువు ప్రారంభించి, కొంతకాలం తర్వాత ఆమె తల్లి, ఆపై అమ్మమ్మ కూడా ఇందులో చేరే సంప్రదాయం ఉన్నట్లు చారిత్రక వర్ణనలు చెబుతున్నాయి. అయితే ప్రాంతాన్ని బట్టి కాలవ్యవధి, పద్ధతుల్లో మార్పులు ఉంటాయి.
మరిన్ని హ్యూమన్ ఇంట్రెస్ట్ స్టోరీస్ కోసం ఇక్కడ క్లిక్ చేయండి