Actor Karunas: ఎయిర్‌పోర్టులో బుల్లెట్లతో పట్టుబడ్డ ప్రముఖ నటుడు.. వీడియో వైరల్

Actor Karunas

ప్రముఖ తమిళ సీనియర్ న‌టుడు, మాజీ ఎమ్మెల్యే కరుణాస్‌ను పోలీసులు ఆదివారం (జూన్‌ 2) అరెస్ట్‌ చేశారు. ఎయిర్‌ పోర్టులో ఆయన లగేజీని తనఖీ చేయగా అత‌డి బ్యాగ్‌లో బుల్లెట్లు ఉన్నట్లు భద్రతా అధికారులు గుర్తించారు. తిరుచ్చి వెళ్లేందుకు నేడు ఉద‌యం చెన్నై విమానాశ్రయానికి నటుడు కరుణాస్‌ చేరుకున్నారు. అయితే ఎయిర్ పోర్టులో సాధారణ భద్రతా తనిఖీల్లో భాగంగా అధికారులు కరుణాస్‌ లగేజీ సోదా చేశారు. ఆయనతోపాటు తీసుకొచ్చిన హ్యాండ్‌ బ్యాగ్‌లో బుల్లెట్లు ఉన్నట్లు అధికారులు గుర్తించారు.

మొత్తం ఆ బ్యాగ్‌లో 40 బుల్లెట్లు ఉన్నట్లు ఎయిర్‌పోర్టు సెక్యూరిటీ అధికారులు గుర్తించారు. దీంతో హ్యాండ్‌బ్యాగ్‌లో ఉన్న 40 బుల్లెట్లను అధికారులు స్వాధీనం చేసుకోవడంతో పాటు ఆయన ప్రయాణాన్ని కూడా రద్దు చేశారు. ప్రస్తుతం తమిళనాడులో మోడల్ కోడ్ ఆఫ్ కండక్ట్ అమలులో ఉన్నందున బుల్లెట్లు కలిగి ఉండటం నేరంగా భావించి అధికారులు వాటిని స్వాధీనం చేసుకున్నారు.

దీనిపై భద్రతా అధికారులు కరుణాస్‌ను వివరణ కోరగా.. తన రక్షణ కోసమే లైసెన్స్‌ ఉన్న తుపాకీ వాడుతున్నానని, అయితే తన హ్యాండ్‌ బ్యాగ్‌లోని బుల్లెట్లు పొరబాటున తనతోపాటు తీసుకొచ్చానని అధికారులకు తెలిపాడు. తన వద్ద ఉన్న తుపాకీని డిండిగల్ పోలీస్ స్టేషన్‌లో అప్పగించానని, అందుకు సంబంధించిన పత్రాలను కూడా నటుడు కరుణాస్‌ భద్రతా అధికారులకు తెలిపాడు. భద్రతా సిబ్బంది అతని వద్ద ఉన్న ధృవీకరణ పత్రాలను పరిశీలించి, వాటిని దిండిగల్‌ పోలీస్ స్టేషన్‌తో నిర్ధారించారు. అనంతరం కరుణాస్‌ చెప్పినదంతా నిజమేనని తేలడంతో భద్రతా సిబ్బంది అతన్ని తిరుచ్చి వెళ్లేందుకు అనుమతించారు.

మరిన్ని సినిమా కథనాల కోసం క్లిక్‌ చేయండి.