మొహమాటానికి పోయి ఆ 10 సినిమాలు చేశాను.. షాకింగ్ విషయం చెప్పిన సూపర్ స్టార్ కృష్ణ

Krishna

గతంలో ఓ ప్రత్యేక ఇంటర్వ్యూలో తెలుగు సినీ అభిమానుల ఆరాధ్య దైవం, సూపర్‌స్టార్ కృష్ణ తన అద్భుతమైన, రికార్డులు సృష్టించిన సినీ ప్రస్థానం గురించి అనేక ఆసక్తికర విషయాలను పంచుకున్నారు. 350కి పైగా చిత్రాల్లో హీరోగా నటించిన ఏకైక రికార్డు తనకే ఉందని, అది ఒక అద్భుతమైన ఘనత అని ఆయన అన్నారు. తన కెరీర్ తొలి నాళ్లలో ఎదురైన సవాళ్లు, విజయాలు, ఐకానిక్ చిత్రాల వెనుక గల కథనాలను వివరించారు. సినీ రంగ ప్రవేశం చేసిన మొదటి సంవత్సరంలోనే తేనె మనసులు, కన్నె మనసులు, గూఢచారి వంటి మూడు చిత్రాలు చేశానని కృష్ణ తెలిపారు. గూఢచారి చిత్రం విడుదలైన తర్వాత, ఉదయం 7 నుంచి 1 గంట వరకు ఒకరికి, మధ్యాహ్నం 2 నుంచి 9 గంటల వరకు మరొకరికి, రాత్రి 10 నుంచి 12 గంటల వరకు ఇంకొకరికి కాల్ షీట్లు ఇచ్చేవారని గుర్తు చేసుకున్నారు. ఒకే సంవత్సరంలో 18 చిత్రాలు విడుదలైన అరుదైన రికార్డు కూడా తన పేరు మీద ఉందని చెప్పారు. అంతేకాకుండా, తన చిత్రాలలో రెండు సినిమాలు ఒకే రోజు విడుదలైన సందర్భాలు కూడా చాలా ఉన్నాయని అన్నారు. అంత శ్రమ అనిపించేదా అని ప్రశ్నించగా, అప్పుడు తాము యువకులమని, నటననే తమ జీవితమని, అందుకే శ్రమను మర్చిపోయి పని చేసేవాళ్లమని కృష్ణ జవాబిచ్చారు.

గూఢచారి చిత్రం తర్వాత ఈ రంగంలో తాను విజయం సాధిస్తాననే పూర్తి నమ్మకం కలిగిందని ఆయన వివరించారు. కలర్ చిత్రాల యుగం వచ్చిన తర్వాత నిర్మాణ వ్యయం పెరగడంతో, నాణ్యతకు ప్రాధాన్యతనిస్తూ సంవత్సరానికి 7 – 8 చిత్రాలు మాత్రమే చేయాలని నిర్ణయించుకున్నట్లు తెలిపారు. అయితే మొహమాటాలకు పోయి 10 చిత్రాల వరకు చేశానని అన్నారు. అల్లూరి సీతారామరాజు సినిమా నిర్మాణం వెనుక ఒక ఆసక్తికర కథ ఉందని కృష్ణ వివరించారు. మొదట రామచంద్రరావు గారు తీసిన అసాధ్యుడులో 15 నిమిషాల అల్లూరి సీతారామరాజు బ్యాలే ఉండేదని తెలిపారు. తర్వాత ఎన్.టి. రామారావు గారు ఈ సినిమా తీస్తారని ఎదురు చూశామని, ఆయన తీయడం లేదని అర్థమైన తర్వాత డీఎల్ నారాయణ గారు శోభన్ బాబుతో తీస్తామని చెప్పారని అన్నారు. అయితే శోభన్ బాబు మరొక ప్రాజెక్టులో ఉండటంతో, తాను ఈ సినిమా చేస్తానని డీఎల్ నారాయణ గారిని కోరానని, అయితే ఆయనకు అప్పుడు ఆర్థిక స్తోమత లేకపోవడంతో, ఉన్న మెటీరియల్ అంతా తనకు ఇచ్చి, తాను తీయగలనని ప్రోత్సహించడంతో అప్పటి నుంచే ఈ సినిమా తీయాలని నిర్ణయించుకున్నానని చెప్పారు.

నిర్మాతగా మారడం గురించి ప్రస్తావించగా, అగ్ని పరీక్ష, మోసగాళ్లకు మోసగాడు, పండంటి కాపురం వంటి అనేక చిత్రాలను అంతకుముందే నిర్మించానని తెలిపారు. మోసగాళ్లకు మోసగాడు చిత్రం ఐడియా గురించి మాట్లాడుతూ, మద్రాసులో అప్పుడు విడుదలైన గుడ్, బ్యాడ్, అగ్లీ, మెకెన్నాస్ గోల్డ్ వంటి హాలీవుడ్ కౌబాయ్ చిత్రాల స్ఫూర్తితో ఈ చిత్రాన్ని నిర్మించానని, క్లైమాక్స్ మాత్రం మెకెన్నాస్ గోల్డ్ లాగా ఉండేలా వర్కౌట్ చేశామని వివరించారు. భారతదేశంలో కౌబాయ్ చిత్రాలు చేసిన మొదటి వ్యక్తి తానేనని, హిందీలో కూడా ఎవరూ చేయలేదని గర్వంగా చెప్పారు. ఈ సినిమా తమిళ, హిందీ డబ్బింగ్‌లు కూడా బ్రహ్మాండంగా ఆడాయని అన్నారు. అల్లూరి సీతారామరాజు చిత్రం జాతీయ స్థాయిలో గుర్తింపు పొందిన సినిమాలలో ఒకటని, శ్రీశ్రీ గారు రాసిన తెలుగు వీర లేవరా పాటలో నటిస్తున్నప్పుడు చాలా ఉత్సాహంగా ఫీల్ అయ్యానని కృష్ణ తెలిపారు. అల్లూరి సీతారామరాజు ఉద్యమం నడిపిన చింతపల్లి, సీలేరు ప్రాంతాల్లోనే షూటింగ్ చేశామని, ఆ గెటప్‌లో లొకేషన్‌లో ఉన్నప్పుడు అక్కడి గిరిజనులు వచ్చి తమ బాబు వచ్చారని నమస్కారాలు చేయడం మరచిపోలేని అనుభవమని వివరించారు. సీతారామరాజే అనుకొని అంతటి ప్రభావం కనపరచారని కృష్ణ గుర్తుచేసుకున్నారు.

మరిన్ని సినిమా వార్తల కోసం ఇక్కడ క్లిక్ చేయండి