హీరో రాజశేఖర్ స్పీడుకు బ్రేక్.. డ్రైవింగ్ లైసెన్స్ సస్పెండ్!

హీరో రాజశేఖర్ స్పీడుకు బ్రేక్ పడింది. అతని డ్రైవింగ్ లైసెన్స్‌ను రద్దు చేస్తూ ఆర్టీఏ అధికారులు జారీ చేశారు. ఈ అంశంపై సైబరాబాద్ పోలీసులకు కూడా సమాచారం అందించారు. నవంబర్‌లో హైదరాబాద్‌ రింగ్ రోడ్డుపై పెద్ద గోల్కొండ వద్ద రాజశేఖర్ రోడ్డు ప్రమాదానికి గురైన సంగతి తెలిసిందే. వేగంగా కారు నడపడంతో.. అదుపుతప్పి ఫెన్సింగ్‌‌ని ఢీకొని మూడు పల్టీలు కొట్టింది. అదృష్టవశాత్తూ కార్‌లోని ఎయిర్‌ బెలూన్స్ తెరుచుకోవడంతో ఆయన పెద్ద ప్రమాదం నుంచి బయటపడ్డాడు. ఇక 2017లోనూ ఆయన కారు ప్రమాదానికి గురయ్యారు. పీవీపీ ఎక్స్‌ప్రెస్ హైవేపై ఆయన ప్రయానిస్తున్న కారు మరో కారును ఢీ కొట్టిన విషయం తెలిసిందే.

అంతేకాకుండా.. ఆయన అతివేగంగా ప్రయాణిస్తారని కూడా రుజువు అయ్యింది. అతని కారుపై ఏకంగా 22 చలాన్లు కూడా ఉన్నాయి. దీంతో.. ఆయన లైసెన్స్‌ను రద్దు చేయాల్సిందిగా సైబరాబాద్ ట్రాఫిక్ పోలీసులు ఆర్టీఏ అధికారులకు సిఫార్సు చేశారు. ఈ మేరకు ఆర్టీఏకు వారు ఓ లేఖను పంపారు. రాజశేఖర్ నిర్లక్ష్యంగా డ్రైవింగ్ చేస్తున్నారని.. దీనిపై చర్యలు తీసుకోవాలని ఆ లేఖలో పేర్కొన్నారు. ఇది పరిశీలించిన ఆర్టీఏ.. రాజశేఖర్ డ్రైవింగ్ లైసెన్స్ గడువు 2017 సంవత్సరంలోనే ముగిసిందని తేల్చింది. దీంతో ఆర్టీఏ అధికారులు రాజశేఖర్ డ్రైవింగ్ లైసెన్స్‌ను రద్దు చేశారు. అయితే ఇది ఎంతకాలం పాటు అనేది వెల్లడించలేదు.