AP Crime: ఉసురు తీసిన అప్పులు.. గడ్డి మందు తాగిన దంపతులు.. భర్త మృతి

Poison Suicide

జీవితాంతం తోడుంటామని పెళ్లినాడు చేసుకున్న ప్రమాణాలను ఆ దంపతులు తూచా తప్పకుండా పాటించాలనుకున్నారు. కాయా కష్టం చేసుకునే ఆ దంపతులను కరోనా మహమ్మారి ఆర్థికంగా కుంగదీసింది. మట్టి పనులు చేసుకుని జీవిస్తున్న ఆ కుటుంబాన్ని అప్పుల ఊబిలోకి పడేసింది. దీంతో తీవ్ర మనోవేదనకు గురైన ఆ దంపతులు తనువు చాలించాలని నిశ్చయించుకున్నారు. గడ్డిమందు తాగారు. గమనించిన కుమారుడు.. కన్నీరు మున్నీరుగా విలపిస్తూ గ్రామస్థుల సహకారంతో తల్లిదండ్రులను ఆస్పత్రికి తరలించాడు. వైద్యశాలలో చికిత్స పొందుతూ తండ్రి మృతి చెందాడు. తల్లి పరిస్థితి విషమించడంతో మెరుగైన వైద్యం కోసం మరో ఆస్పత్రికి తరలించారు. ఈ ఘటనతో స్థానికంగా విషాద ఛాయలు అలుముకున్నాయి.

ఆంధ్రప్రదేశ్ లోని శ్రీకాకుళం జిల్లా పాలకొండ మండలం చినమంగళాపురం గ్రామానికి చెందిన నాగవరపు రామారావు, తవిటమ్మ దంపతులు. గత కొన్నేళ్లుగా ఇటుకల తయారీ పరిశ్రమను నిర్వహిస్తూ జీవనం సాగిస్తున్నారు. అప్పులు చేసి పరిశ్రమను నడిపిస్తున్న సమయంలో.. కరోనా లాక్‌డౌన్‌ వారి ఆర్థిక పరిస్థితిని మరింత దిగజార్చింది. ఏడాది పాటు వ్యాపారం సరిగ్గా సాగకపోవడంతో మరింత అప్పుల పాలయ్యారు. వడ్డీలు కూడా చెల్లించలేని పరిస్థితి రావడంతో దిక్కుతోచని స్థితిలో మనోవేదనకు గురయ్యారు. ఈ క్రమంలో దంపతులిద్దరూ గడ్డి మందు తాగారు.

ఆ సమయంలో ఇంటికి వచ్చిన కుమారుడు గౌరి.. తల్లిదండ్రులు అపస్మారక స్థితిలో పడి ఉండటాన్ని గమనించాడు. గ్రామస్థుల సహాయంతో ఇద్దరినీ పాలకొండ ప్రభుత్వ ఆస్పత్రికి తరలించారు. అప్పటికే రామారావు మృతి చెందినట్లు వైద్యులు ధ్రువీకరించారు. తవిటమ్మ పరిస్థితి విషమంగా ఉండటంతో శ్రీకాకుళం సర్వజన ఆసుపత్రికి తరలించారు. ఘటనా స్థలాన్ని పోలీసులు పరిశీలించారు. కుటుంబ సభ్యులు, గ్రామస్థుల నుంచి వివరాలు సేకరించారు. మృతుడి కుమారుడు గౌరి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు తెలిపారు.

ఇవీ చదవండి.

Viral Video: ఈ కింగ్ కోబ్రా దాడి చూస్తే దడ పుట్టాల్సిందే.. ఒళ్లు గగుర్పొడిచే వీడియో

చిన్నారులను అనాథలుగా చేసి.. కానరానిలోకాలకు తరలిపోయిన తల్లి

Shocking Video: చైన్ స్మోకర్‌లా స్మోక్ చేస్తున్న మేకపోతు.. వీడియో చూస్తే కంగు తినాల్సిందే