కేరళలో రికార్డ్‌ స్థాయిలో కేసులు నమోదు.. తాజా వివరాలు ఇవే..

కేరళలో రికార్డు స్థాయిలో కరోనా కేసులు నమోదయ్యాయి. తాజాగా శనివారం నాడు ఒక్కరోజే.. కొత్తగా 127 కరోనా పాజిటివ్ కేసులు నమోదయ్యాయి. ఇప్పటి వరకు ఒక్క రోజులో నమోదైన అత్యధిక కేసులు ఇవేనని కేరళ సీఎం పినరయ్ విజయన్ తెలిపారు. ప్రస్తుతం రాష్ట్ర వ్యాప్తంగా 1,450 యాక్టివ్ కేసులు ఉన్నాయని తెలిపారు. రాష్ట్రంలో 111 హాట్‌స్పాట్‌లను గుర్తించి కరోనా పరీక్షలు పెంచామన్నారు. ప్రజలంతా సోషల్ డిస్టెన్స్ పాటిస్తూ.. మాస్క్‌లు ధరించి కరోనా సోకకుండా ముందస్తు జాగ్రత్తలు తీసుకోవాలని సూచించారు.

ఇదిలావుంటే.. దేశ వ్యాప్తంగా కరోనా వైరస్ కేసులు రోజురోజుకు పెరుగుతున్నాయి. గడిచిన 24 గంటల్లో కొత్తగా మరో 14 వేల కేసులు నమోదయ్యాయి. దీంతో ఇప్పటి వరకు దేశ వ్యాప్తంగా నమోదైన కేసుల సంఖ్య 3.95 లక్షలకు చేరింది. ఇక కరోనా బారినపడి ఇప్పటి వరకు 12 వేల మందికి పైగా మరణించారు.