వరల్డ్ అప్డేట్: కరోనా పాజిటివ్ కేసులు @ 83 లక్షలు..

ప్రపంచదేశాలలో కరోనా వైరస్ మహమ్మారి మరణ మృదంగం వాయిస్తోంది. ఇప్పటికే అన్ని దేశాలూ వివిధ దశల్లో లాక్ డౌన్ ప్రకటిస్తున్నప్పటికీ.. దీనికి అడ్డుకట్ట వేయడంలో మాత్రం విఫలమవుతూనే వస్తున్నాయి. ఇప్పటివరకు ఈ వైరస్ 213 దేశాలకు పాకింది. తాజా సమాచారం ప్రకారం ప్రపంచవ్యాప్తంగా 8,307,663 పాజిటివ్ కేసులు నమోదు కాగా, 447,108 మంది మృత్యువాతపడ్డారు. ఇదిలా ఉంటే 4,348,424 ఈ వైరస్ బారి నుంచి కోలుకుని ఆసుపత్రి నుంచి డిశ్చార్జ్ అయ్యారు. గడిచిన 24 గంటల్లో ప్రపంచంలో ఏకంగా 1,42,557 కేసులు, 6,592 మరణాలు సంభవించాయి. దీనితోనే వైరస్ తీవ్రత ఏమేరకు ఉందో అంచనా వేయొచ్చు.

అమెరికా, బ్రెజిల్, స్పెయిన్, ఇటలీ, బ్రిటన్, రష్యా దేశాల్లో కరోనా తీవ్రతరంగా ఉంది. ప్రస్తుతం అన్ని దేశాలూ లాక్ డౌన్ దశల వారీగా సడలిస్తుండటంతో ఈ వైరస్ వ్యాప్తి ఎక్కువగా ఉంది. అగ్రరాజ్యం అమెరికాలో అత్యధిక కేసులు(2,212,447), మరణాలు(119,197) సంభవించాయి. అటు బ్రెజిల్ లో పాజిటివ్ కేసులు 929,149 నమోదు కాగా, మృతుల సంఖ్య 45,467కు చేరింది. ఇక రష్యాలో 553,301 పాజిటివ్ కేసులు, 7,478 మరణాలు నమోదయ్యాయి. భారత్‌లో కరోనా కేసులు 359,398 నమోదు కాగా, మృతుల సంఖ్య 12,028కి చేరింది. కాగా, గత వారం రోజులుగా ఇండియాలో రికార్డు స్థాయిలో పాజిటివ్ కేసులు నమోదవుతున్నాయి. అటు గడిచిన 24 గంటల్లో ఏకంగా 2003 మంది వైరస్ కారణంగా చనిపోయారు.