తెలంగాణ ఇంటర్ పబ్లిక్‌ పరీక్షల 2027 తేదీలు విడుదల.. ఈసారి ఫిబ్రవరి 24 నుంచే ప్రారంభం

తెలంగాణ ఇంటర్మీడియట్ విద్యార్థులకు కీలక అప్డేట్ వచ్చింది. 2027 ఇంటర్ పబ్లిక్ పరీక్షలు ఫిబ్రవరి 24 నుంచి ప్రారంభమయ్యే అవకాశం ఉంది. ఫిబ్రవరి 1 నుంచి ప్రాక్టికల్ పరీక్షలు నిర్వహించే యోచనలో విద్యామండలి ఉంది. ఈ ఏడాది నుంచి ఫస్టియర్ విద్యార్థులకు కూడా ప్రాక్టికల్ పరీక్షలు నిర్వహించనున్నారు. దీపావళి తర్వాత అధికారిక టైమ్‌టేబుల్ విడుదలయ్యే అవకాశం ఉంది. పరీక్ష ఫీజు చెల్లింపు గడువు, ఆలస్య రుసుములు, ఇంటర్ అడ్మిషన్ల వివరాలు తెలుసుకోండి..

Telangana Inter Public Exam Dates 2027

Srilakshmi C |
Updated on: Nov 07, 2026 | 7:27 AM

హైదరాబాద్, నవంబర్ 7: తెలంగాణలో ఇంటర్మీడియట్ విద్యార్థులకు కీలక అప్డేట్ వచ్చింది. 2026–27 విద్యా సంవత్సరానికి సంబంధించిన ఇంటర్మీడియట్ పబ్లిక్ పరీక్షలు 2027 ఫిబ్రవరి 24 నుంచి ప్రారంభమయ్యే అవకాశం ఉంది. ఈ మేరకు తెలంగాణ ఇంటర్మీడియట్ విద్యామండలి (TG BIE) పరీక్షల ప్రతిపాదిత షెడ్యూల్‌ను రాష్ట్ర ప్రభుత్వ ఆమోదం కోసం పంపించింది. దీపావళి తర్వాత అధికారిక పరీక్షల టైమ్‌టేబుల్ విడుదలయ్యే అవకాశం ఉందని తెలుస్తోంది.

ఫిబ్రవరి 1 నుంచి ప్రాక్టికల్ పరీక్షలు?

ఇంటర్మీడియట్ ప్రాక్టికల్ పరీక్షలు ఫిబ్రవరి 1 నుంచి ప్రారంభమయ్యే అవకాశం ఉంది. ఈ విద్యా సంవత్సరం నుంచి ఇంటర్ ప్రథమ సంవత్సరం విద్యార్థులకు కూడా ప్రాక్టికల్ పరీక్షలు నిర్వహించాలని విద్యామండలి నిర్ణయించింది. దీంతో ఫస్టియర్ విద్యార్థులు కూడా ప్రాక్టికల్ పరీక్షలకు సిద్ధం కావాల్సి ఉంటుంది. మరోవైపు, ఈ ఏడాది ఇంటర్మీడియట్ పబ్లిక్ పరీక్షల హాల్‌టికెట్లపై విద్యాశాఖ మంత్రిగా ఉన్న వ్యక్తి పేరు ముద్రించనున్నారు. ఇంటర్ పబ్లిక్ పరీక్షలకు హాజరయ్యే విద్యార్థులు ఎలాంటి ఆలస్య రుసుము లేకుండా పరీక్ష ఫీజు చెల్లించేందుకు నవంబర్ 9 చివరి తేదీగా నిర్ణయించారు. ఇప్పటివరకు కేవలం 10 శాతం మంది విద్యార్థులు మాత్రమే పరీక్ష ఫీజు చెల్లించినట్లు సమాచారం. గడువు తర్వాత ఆలస్య రుసుముతో ఫీజు చెల్లించేందుకు బోర్డు అవకాశం కల్పించింది.

ఆలస్య రుసుముల వివరాలు..

నవంబర్ 9 వరకు: ఎలాంటి ఆలస్య రుసుము లేదు.
నవంబర్ 21 వరకు: రూ.100 ఆలస్య రుసుము.
నవంబర్ 30 వరకు: రూ.500 ఆలస్య రుసుము.
డిసెంబర్ 8 వరకు: రూ.1,000 ఆలస్య రుసుము.
డిసెంబర్ 15 వరకు: రూ.2,000 ఆలస్య రుసుము.

విద్యార్థులు చివరి తేదీ వరకు వేచి ఉండకుండా వీలైనంత త్వరగా పరీక్ష ఫీజు చెల్లించాలని సూచిస్తున్నారు.

ఇవి కూడా చదవండి

పరీక్షల నిర్వహణలో కీలక మార్పులు

ఇంటర్మీడియట్ పరీక్షల నిర్వహణలో భాగంగా TG BIE పలు మార్పులు చేపట్టింది. పరీక్షలకు సంబంధించి కొత్త నామినల్ రోల్ నంబర్లు, ఇంటర్నల్ అసెస్‌మెంట్ కోడ్లు, ప్రాక్టికల్ పరీక్షల కోడ్లను కేటాయించింది. ప్రతి సబ్జెక్టుకు ప్రత్యేకంగా ఇంటర్నల్ అసెస్‌మెంట్ కోడ్లను కేటాయిస్తూ ఉత్తర్వులు జారీ చేసింది. మరోవైపు, 2026–27 విద్యా సంవత్సరానికి ఇంటర్మీడియట్ ప్రథమ సంవత్సర ప్రవేశాల గడువును కూడా తెలంగాణ ఇంటర్మీడియట్ విద్యామండలి పొడిగించింది. నవంబర్ 11 నుంచి 14 వరకు జూనియర్ కళాశాలల్లో ప్రవేశాలు పొందేందుకు అవకాశం కల్పించింది. ప్రైవేట్ జూనియర్ కళాశాలల్లో రూ.1,000 ఆలస్య రుసుముతో ప్రవేశాలు కల్పించనున్నారు. ప్రభుత్వ జూనియర్ కళాశాలల్లో మాత్రం ఎలాంటి ఆలస్య రుసుము లేకుండా ప్రవేశాలు పొందవచ్చు.