డబ్బు కోసం రష్యా సైన్యంలో చేరొద్దు.. భారతీయులకు విదేశాంగ శాఖ హెచ్చరిక!
రష్యా పర్యటన, అక్కడ ఉద్యోగ అవకాశాల కోసం ప్రయత్నించే భారతీయులకు కేంద్ర ప్రభుత్వం కీలక సూచనలు చేసింది. రష్యా సాయుధ దళాల్లో భారతీయులను నియమిస్తున్నట్లు తమకు నివేదికలు అందుతున్నాయని విదేశాంగ మంత్రిత్వ శాఖ తెలిపింది. రష్యా సైన్యంలో చేరడం అత్యంత ప్రమాదకరమైన చర్య అని, భారతీయులు ఇలాంటి అవకాశాలకు దూరంగా ఉండాలని సూచించింది..
Updated on: Oct 01, 2026 | 7:03 PM
న్యూఢిల్లీ, అక్టోబర్ 1: విదేశాల్లో ఉద్యోగాల కోసం ప్రయత్నించే భారతీయులు ధృవీకరించని వ్యక్తులు, ఏజెంట్లు ఇచ్చే ఉద్యోగ ఆఫర్లకు ఆకర్షితులు కావొద్దని విదేశాంగ శాఖ హెచ్చరించింది. ఉద్యోగం ఇచ్చే ఏజెంట్ భారత విదేశాంగ మంత్రిత్వ శాఖ (MEA)లో నమోదై ఉన్నారా లేదా అన్న విషయాన్ని ముందుగా నిర్ధారించుకోవాలని సూచించింది. రష్యా సాయుధ దళాల్లో చేరితే భారీగా డబ్బు లభిస్తుందని, భవిష్యత్తులో భారత ప్రభుత్వం జోక్యం చేసుకుని తమను తిరిగి స్వదేశానికి తీసుకువస్తుందని భావించి కొందరు భారతీయులు స్వచ్ఛందంగా రష్యా సైన్యంలో చేరుతున్నట్లు ప్రభుత్వం దృష్టికి వచ్చినట్లు విదేశాంగ శాఖ తెలిపింది. అయితే తాత్కాలిక ఆర్థిక ప్రయోజనాల కోసం ఇలాంటి నిర్ణయాలు తీసుకోవడం వల్ల ప్రాణాలకు తీవ్ర ముప్పు ఏర్పడే అవకాశం ఉందని కేంద్రం హెచ్చరించింది. కొందరు భారతీయులు తమ భారత పౌరసత్వాన్ని స్వచ్ఛందంగా వదులుకుని, రష్యా పాస్‌పోర్టు పొందిన అనంతరం అక్కడి సాయుధ దళాల్లో చేరేందుకు ప్రయత్నిస్తున్న ఘటనలు కూడా తమ దృష్టికి వచ్చినట్లు విదేశాంగ శాఖ తెలిపింది. ఇలాంటి నిర్ణయాలు తీసుకోవడం ద్వారా వ్యక్తులు తమను తాము అత్యంత ప్రమాదకర పరిస్థితుల్లోకి నెట్టుకునే అవకాశం ఉందని ప్రభుత్వం హెచ్చరించింది.
డబ్బు కోసం రష్యా సైన్యంలో చేరొద్దు
విదేశీ పౌరులను రష్యా సాయుధ దళాల్లో చేర్చేందుకు కొన్ని ప్రైవేట్ సంస్థలు, స్వచ్ఛంద సంస్థలు, ఇతర గ్రూపులు కూడా ప్రయత్నిస్తున్నట్లు భారత ప్రభుత్వానికి సమాచారం అందినట్లు విదేశాంగ శాఖ పేర్కొంది. ఈ నేపథ్యంలో రష్యాలో ఉద్యోగాలు, ముఖ్యంగా ఆకర్షణీయమైన జీతాలు, ఇతర ప్రయోజనాలు చూపిస్తూ వచ్చే ఆఫర్ల విషయంలో భారతీయులు అప్రమత్తంగా ఉండాలని సూచించింది. రష్యా సైన్యంలో చేరడం వల్ల ఎదురయ్యే ప్రమాదాలపై గత రెండేళ్లుగా భారత ప్రభుత్వం అనేక సందర్భాల్లో భారతీయులను హెచ్చరిస్తూ వస్తోంది. అయినప్పటికీ కొందరు వ్యక్తులు ఉద్యోగాల పేరుతో రష్యా సాయుధ దళాల్లో చేరుతున్నట్లు సమాచారం అందుతోంది. విదేశాల్లో ఉద్యోగ అవకాశాల కోసం ప్రయత్నించే వారు ఆఫర్ ఇచ్చే వ్యక్తులు, సంస్థలు, ఏజెంట్ల విశ్వసనీయతను పూర్తిగా తనిఖీ చేసిన తర్వాతే ముందుకు వెళ్లాలని కేంద్రం సూచించింది.
విదేశాల్లో ఉద్యోగం ఇప్పిస్తామని చెప్పే ఏజెంట్లను సంప్రదించే ముందు వారు భారత విదేశాంగ మంత్రిత్వ శాఖ వద్ద నమోదై ఉన్నారా లేదా అన్నది తెలుసుకోవాలని భారతీయులకు సూచించింది. తెలియని వ్యక్తులు లేదా ధృవీకరించని ఏజెంట్లు ఇచ్చే ఉద్యోగ ఆఫర్లను నమ్మి ప్రయాణం చేయడం, ముఖ్యంగా సైనిక సంబంధిత కార్యకలాపాల్లో చేరడం వంటి చర్యలకు దూరంగా ఉండాలని పేర్కొంది. ప్రస్తుతం రష్యా సాయుధ దళాల్లో ఉన్న భారతీయుల భద్రత, సంక్షేమం, త్వరితగతిన విడుదల కోసం భారత ప్రభుత్వం రష్యా ప్రభుత్వంతో నిరంతరం సంప్రదింపులు జరుపుతోందని విదేశాంగ శాఖ తెలిపింది. అయితే భారతీయులు స్వయంగా ప్రమాదకర పరిస్థితుల్లోకి వెళ్లకుండా అప్రమత్తంగా ఉండటం అత్యంత ముఖ్యమని కేంద్రం స్పష్టం చేసింది. విదేశాల్లో ఉద్యోగం కోసం వెళ్లే ముందు ఆఫర్ ఇచ్చే సంస్థ, ఏజెంట్, ఉద్యోగ స్వభావం, ఒప్పంద నిబంధనలు తదితర అంశాలను పూర్తిగా ధృవీకరించుకోవాలని భారతీయులకు విదేశాంగ శాఖ సూచించింది.
