CBSE Revaluation 2026: 56 వేలకుపైగా దరఖాస్తులు.. వెబ్‌సైట్‌పై భారీ సైబర్ దాడి కూడా, జూన్ 6 వరకే ఛాన్స్
Cyber Attack on CBSE Website: CBSE పునర్మూల్యాంకన ప్రక్రియకు భారీ స్పందన లభించింది. జూన్ 3 నాటికి 56 వేలకుపైగా దరఖాస్తులు అందగా, అదే సమయంలో వెబ్‌సైట్‌పై జరిగిన 3.8 మిలియన్ ప్యాకెట్ల సైబర్ దాడిని బోర్డు విజయవంతంగా అడ్డుకుంది. జూన్ 6 వరకు విద్యార్థులు ఆన్‌లైన్‌లో దరఖాస్తు చేసుకోవచ్చు.
CBSE Revaluation 2026: సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) 2026 పరీక్ష ఫలితాల పునఃపరిశీలన ప్రక్రియకు విద్యార్థుల నుంచి భారీ స్పందన లభిస్తోంది. జూన్ 3, 2026 రాత్రి 9:30 గంటల వరకు మార్కుల ధృవీకరణ (Verification), పునర్మూల్యాంకనం (Revaluation) కోసం 56,000కు పైగా దరఖాస్తులు అందినట్లు బోర్డు వెల్లడించింది.
జూన్ 2 నుంచి ప్రారంభమైన ఈ ఆన్‌లైన్ సేవలు జూన్ 6 అర్ధరాత్రి వరకు అందుబాటులో ఉంటాయి. తమ ఫలితాలపై సందేహాలు ఉన్న విద్యార్థులు అధికారిక పోర్టల్ ద్వారా దరఖాస్తులు సమర్పించుకోవచ్చు.
ఇదిలా ఉండగా, దరఖాస్తుల స్వీకరణ సమయంలో CBSE వెబ్‌సైట్‌పై 3.8 మిలియన్ ప్యాకెట్ల డినైల్ ఆఫ్ సర్వీస్ (DoS) సైబర్ దాడి జరిగినప్పటికీ, తమ సాంకేతిక బృందాలు దానిని విజయవంతంగా అడ్డుకున్నాయని బోర్డు తెలిపింది. విద్యార్థులకు ఎలాంటి అంతరాయం లేకుండా సేవలు అందించేందుకు పనితీరును నిరంతరం పర్యవేక్షిస్తూ, వ్యవస్థలో మరిన్ని మెరుగుదలలు చేపడుతున్నట్లు పేర్కొంది.
మార్కుల ధృవీకరణ కోసం ఒక్కో సబ్జెక్టుకు రూ.100, పునర్మూల్యాంకనం కోసం ఒక్కో ప్రశ్నకు రూ.25 రుసుము నిర్ణయించారు. భద్రతను మరింత బలోపేతం చేయడానికి పునర్మూల్యాంకన పోర్టల్‌లో ఆధార్ ధృవీకరణను తప్పనిసరి చేశారు. ఆధార్ లేని విద్యార్థులు తల్లిదండ్రులు, సంరక్షకులు లేదా బంధువుల ఆధార్ వివరాలను ఉపయోగించుకోవచ్చని CBSE స్పష్టం చేసింది.
ఇక 12వ తరగతి విద్యార్థుల కోసం అమలు చేస్తున్న ఆన్-స్క్రీన్ మార్కింగ్ (OSM) విధానంపై కొన్ని ఆందోళనలు వ్యక్తమవుతున్న నేపథ్యంలో, ఈ పునర్మూల్యాంకన ప్రక్రియపై విద్యార్థులు, తల్లిదండ్రులు ఆసక్తిగా ఎదురుచూస్తున్నారు.