Personal Loan: క్రెడిట్ స్కోర్ తక్కువున్నా పర్లేదు.. ఇలా చేస్తే ఈజీగా పర్సనల్ లోన్ పొందవచ్చు..

Personal Loan

రాఘవ్‌కు రుణం అవసరం. అందుకే అతను బ్యాంక్‌లో దరఖాస్తు చేసుకున్నాడు. కానీ క్రెడిట్ స్కోర్ తక్కువగా ఉన్నందున ఆ దరఖాస్తును తిరస్కరించారు. దీంతో ఏం చేయాలో తోచని స్థితిలో ఉన్నాడు. రాఘవ్ మాత్రమే కాదు, మీరు కూడా తక్కువ క్రెడిట్ స్కోర్‌ని కలిగి ఉంటే.. బ్యాంక్ నుండి వ్యక్తిగత రుణాన్ని పొందలేరు.

క్రెడిట్ స్కోర్ అనేది మీ క్రెడిట్ చరిత్ర ఆధారంగా వచ్చే 3-అంకెల స్కోర్. ఇది 300 నుండి 900 పరిధిలో ఉంటుంది. 700నుండి 900 మధ్య స్కోర్ ను మంచి క్రెడిట్ స్కోర్‌గా లెక్కేస్తారు. ఇది తక్కువ వడ్డీ రేట్లతో రుణ ఆమోదాన్ని అందించే ఛాన్స్ ను పెంచుతుంది. మరోవైపు, 699 కంటే స్కోర్ తక్కువ ఉంటే అది పేలవమైన స్కోర్‌గా పరిగణిస్తారు. దీనివల్లే రాఘవ్ వంటి వ్యక్తులకు రుణం పొందడం సవాలుగా మారింది. అయినా, తక్కువ క్రెడిట్ స్కోర్‌లు ఉన్న వ్యక్తులు ఇప్పటికీ రుణ ఆమోదాలకు అర్హతను పొందవచ్చు.

తమ ఆదాయం ఆధారంగా EMI చెల్లింపులు చేయగల సామర్థ్యాన్ని చూపించగలిగితే.. తక్కువ క్రెడిట్ స్కోర్ ఉన్నా సరే వారు రుణ ఆమోదాన్ని పొందవచ్చు. మీ జీతం పెరిగినా లేదా మీకు మరొక ఆదాయ వనరు ఉన్నా, బ్యాంకులు లేదా NBFCలు తక్కువ క్రెడిట్ స్కోర్‌తో కూడా మీ వ్యక్తిగత రుణ దరఖాస్తును ఆమోదించవచ్చు. మీ ఉద్యోగం, ఆదాయం స్థిరంగా ఉన్నాయని మీరు రుణదాతకు హామీ ఇవ్వాలి. ఆ తర్వాత మీరు వ్యక్తిగత రుణం కోసం అర్హత పొందవచ్చు. కానీ ఎక్కువ వడ్డీ రేట్లకు సిద్ధంగా ఉండాలి. మరొక విధానం ఏమిటంటే, మీరు చిన్న రుణ మొత్తానికి అప్లై చేయడం.

తక్కువ క్రెడిట్ స్కోర్‌తో పెద్ద పరిమాణంలో రుణం పొందడం సవాలుగా ఉంటుంది. రుణదాతలు తిరిగి చెల్లింపు డిఫాల్ట్‌ల గురించి ఆందోళన చెందుతారు. అందుకే మీరు తక్కువ మొత్తంలో రుణం కోసం దరఖాస్తు చేసుకోవచ్చు. దీనివల్ల మీ అప్లికేషన్ ను బ్యాంక్ ఆమోదించే అవకాశాలను పెరుగుతాయి. మీరు సహ-దరఖాస్తుదారుడితో దరఖాస్తు చేసుకోవడాన్ని కూడా పరిగణనలోకి తీసుకోవచ్చు. లేదా మీరు గ్యారంటీర్‌ని చూపించొచ్చు. కానీ రెండో అప్లికెంట్ కోసం KYC వంటి అదనపు వ్రాతపని అవసరం. ఇక్కడ ప్రయోజనం ఏమిటంటే సహ-దరఖాస్తుదారు లేదా హామీదారు స్థిరమైన ఆదాయాన్ని కలిగి ఉంటే.. వారు మెరుగైన క్రెడిట్ స్కోర్‌ను కలిగి ఉంటే.. మీరు వ్యక్తిగత రుణం ఆమోదం పొందే అవకాశాలు ఎక్కువగా ఉంటాయి.

మీరు సురక్షితమైన వ్యక్తిగత రుణాన్ని కూడా ఎంచుకోవచ్చు:

సురక్షిత వ్యక్తిగత లోన్ అంటే మీరు కొలేటరల్‌పై లోన్ తీసుకోవచ్చు. ఇక్కడ మీరు ఆస్తి, బంగారం, బ్యాంక్ FD లేదా మ్యూచువల్ ఫండ్స్ వంటి ఆస్తిని తాకట్టు పెట్టాలి. మీరు రుణాన్ని తిరిగి చెల్లించేంత వరకు బ్యాంకు మా రుణ పత్రాలను తన దగ్గర ఉంచుతుంది. మీరు తిరిగి చెల్లించడంలో విఫలమైతే, ఆ డబ్బును తిరిగి పొందడానికి బ్యాంక్ మీ ఆస్తిని వేలం వేయవచ్చు. అందుకే ఈ ఆప్షన్ ను ఎంచుకునే ముందు ఈ అంశాన్ని జాగ్రత్తగా చెక్ చేయండి. ఇలా తక్కువ క్రెడిట్ స్కోర్ ఉన్నా, వ్యక్తిగత రుణాన్ని ఎలా పొందవచ్చు.