వామ్మో.. AIతో భారత బ్యాంకింగ్ వ్యవస్థకు పెను ముప్పు తప్పదా..?
ఆధునిక ఏఐ మోడల్ 'మిథోస్' భారత బ్యాంకింగ్ రంగానికి కొత్త సైబర్ ముప్పుగా పరిణమించింది. జీరో-డే లోపాలను వేగంగా గుర్తించి, హ్యాకింగ్ను తీవ్రతరం చేసే సామర్థ్యం దీనికి ఉంది. కేంద్ర ఆర్థిక మంత్రి నిర్మలా సీతారామన్ ఈ ముప్పుపై బ్యాంకర్లతో చర్చించారు. ముందస్తు చర్యలు, సమన్వయ స్పందన కోసం భారత్ సన్నద్ధమవుతోంది.
ప్రపంచవ్యాప్తంగా సైబర్ భద్రత రంగంలో కొత్త రకమైన ముప్పు ప్రభుత్వాలను వేగంగా స్పందించేలా చేస్తోంది. ఇటీవల కేంద్ర ఆర్థిక మంత్రి నిర్మలా సీతారామన్ అగ్రశ్రేణి బ్యాంకర్లతో నిర్వహించిన ఉన్నత స్థాయి సమావేశంలో ఇదే ప్రధాన చర్చగా నిలిచింది. ఈసారి ఆందోళనకు కారణం సాధారణ మాల్వేర్ కాదు ఒక అధునాతన కృత్రిమ మేధస్సు మోడల్ ‘మిథోస్’. ఆంథ్రోపిక్ అభివృద్ధి చేసిన ఈ మోడల్, ఇప్పటివరకు గుర్తించని జీరో-డే లోపాలను కనుగొనగల సామర్థ్యంతో ప్రత్యేకంగా నిలుస్తోంది. అంటే సాఫ్ట్వేర్లో ఉన్న కానీ ఇంకా ఎవరూ గుర్తించని బలహీనతలను ఇది వేగంగా గుర్తించి, వాటిని ఎలా వినియోగించుకోవాలో సూచించగలదు. దీంతో వారాల పాటు పట్టే హ్యాకింగ్ ప్రక్రియలు గంటల్లోనే పూర్తయ్యే ప్రమాదం ఉందని నిపుణులు హెచ్చరిస్తున్నారు. ఈ కారణంగానే ఈ మోడల్ను పూర్తిగా బహిరంగంగా విడుదల చేయకుండా నియంత్రిత ప్రాప్యతకే పరిమితం చేశారు.
ఈ నేపథ్యంలో భారత్ ముందస్తు చర్యలు చేపట్టింది. బ్యాంకుల మధ్య రియల్-టైమ్ ముప్పు సమాచార మార్పిడి, అత్యవసర పరిస్థితుల్లో సమిష్టి స్పందన, సమన్వయ యంత్రాంగం ఏర్పాటు వంటి అంశాలపై ప్రభుత్వం దృష్టి సారించింది. RBI, ఇండియన్ బ్యాంక్స్ అసోసియేషన్ వంటి సంస్థలు ఈ ప్రక్రియలో కీలక పాత్ర పోషిస్తున్నాయి. దాడి జరిగినా ఏ బ్యాంకు ఒంటరిగా నిలవకుండా మొత్తం వ్యవస్థ కలిసి ఎదుర్కొనేలా ప్రణాళికలు రూపొందిస్తున్నారు. నిపుణుల అభిప్రాయం ప్రకారం ఈ ముప్పు సాధారణ సైబర్ దాడులకు మించి ఉంది. అత్యంత తీవ్రమైన పరిస్థితుల్లో చెల్లింపు వ్యవస్థలు నిలిచిపోవడం, ఏటీఎంలు పనిచేయకపోవడం, ప్రజల్లో భయాందోళనలు కలగడం వంటి పరిణామాలు చోటుచేసుకోవచ్చు. ముఖ్యంగా దాడుల వేగం పెరగడం వల్ల, వాటిని గుర్తించి స్పందించే సమయం గణనీయంగా తగ్గిపోతుంది.
అయితే ఇదే ఏఐ సాంకేతికత ఒక అవకాశంగా కూడా మారవచ్చు. మోసాలను ముందుగానే గుర్తించడం, రియల్-టైమ్ రిస్క్ అంచనా, భద్రతా వ్యవస్థలను బలోపేతం చేయడంలో ఇది సహాయపడగలదు. కానీ దీనిని ఎంత బాధ్యతాయుతంగా వినియోగిస్తామన్నదే కీలకం. మొత్తంగా మిథోస్ వంటి ఏఐ వ్యవస్థలు సైబర్ భద్రతను కొత్త దశలోకి తీసుకెళ్తున్నాయి. ప్రభుత్వాలు, బ్యాంకులు వేగంగా మారుతున్న ఈ పరిస్థితులకు అనుగుణంగా తమ వ్యవస్థలను బలోపేతం చేయాల్సిన అవసరం స్పష్టంగా కనిపిస్తోంది.
మరిన్ని బిజినెస్ వార్తల కోసం ఇక్కడ క్లిక్ చేయండి