Education loan: ఎడ్యుకేషన్ లోన్ లేటుగా చెల్లిస్తే ఇంత పెద్ద ప్రయోజనం ఉందా.. నెట్టింట వైరలవుతున్న పోస్ట్
ఒక ఎంబీఏ గ్రాడ్యుయేట్ రెడిట్ లో పంచుకున్న పోస్ట్ ఇప్పుడు వైరలవుతోంది. తన ఎడ్యుకేషన్ లోన్ ను చెల్లించడంలో అతడు తీసుకున్న కాల వ్యవధే ఇందుకు కారణం. ఇండియన్ ఇన్స్టిట్యూట్ ఆఫ్ బెంగుళూరు పూర్వ విద్యార్థి అయిన తాను తన లోన్ విషయంలో చేసిన పనిని తెలివైనదిగా చెప్పుకుంటున్నాడు. మూడు నుంచి నాలుగేళ్లు పట్టే లోన్ ను తాను ఏకంగా ఎనిమిదేళ్ల పాటు చెల్లించినట్టు చెప్పాడు. ఇతగాడి ఆర్థిక విశ్లేషణ ఇప్పుడు సోషల్ మీడియాలో వైరల్ గా మారింది. ఇంతకీ ఈ యువకుడు లోన్ విషయంలో ఏం చెప్పదలుచుకున్నాడో మీరూ చదివేయండి..
ఐఐఎం బెంగళూరు నుండి పట్టభద్రుడినయ్యాక కూర్చుని ఎంబీఏ తరహా ఆర్థిక విశ్లేషణ చేసాను. తీసుకున్న ఎడ్యుకేషన్ లోన్ ను తిరిగి చెల్లించడానికి తొందరపడటం ఎందుకని అనిపించింది. నేను తీసుకున్న నిర్ణయాల్లో ఇది అతిపెద్దది. చాలా మంది దీని ట్యాక్స్ ప్రయోజనాలను పట్టించుకోరు. ఆదాయపు పన్ను చట్టంలోని సెక్షన్ 80ఇ కింద, పన్ను చెల్లింపుదారులు ఎనిమిది సంవత్సరాల వరకు చెల్లించే వడ్డీపై 100% పన్ను మినహాయింపు పొందుతారు. అదే మీరు ఒక వేళ రెండు నుంచి మూడేళ్ల లోపు లోన్ తిరిగి చెల్లించేస్తే ఈ ముఖ్యమైన బెనిఫిట్ ను నష్టపోతారు. మనకున్న పూర్తి పీరియడ్ ను ఉపయోగించుకుని ట్యాక్స్ పేయబుల్ ఆదాయాన్ని మనమెందుకు ఆదా చేసుకోకూడదు? అంటూ అతడు ప్రశ్నించాడు.
ఇక రెండో కారణం విషయానికొస్తే.. ఈ రెడిట్ యూజర్ రూ. 20 లక్షల రుణం తీసుకున్న రుణగ్రహీత కేసును ఉదాహరణగా చూపించాడు. 9 శాతం వడ్డీతో, రూ. 20 లక్షల అసలు మొత్తం అలాగే ఉండదు. మీరు తిరిగి చెల్లించడం ప్రారంభించే సమయానికి, పెరిగిన వడ్డీ కారణంగా అది రూ. 25-27 లక్షలకు పెరగవచ్చు అని తెలిపాడు. రుణం వడ్డీ విభాగంలో ఎక్కువ భాగాన్ని మొదటి కొన్ని సంవత్సరాలలో బ్యాంకు సేకరిస్తుందని వివరించాడు. ఎందుకంటే ఈఎంఐ వడ్డీ భాగం మొదటి కొన్ని సంవత్సరాలలో ఈ ఎంఐ ప్రధానంగా తిరిగి చెల్లించే భాగం కంటే చాలా ఎక్కువగా ఉంటుంది.
“నా డబ్బునంతా త్వరగా తిరిగి చెల్లించడానికి బదులుగా, నేను దానిని పొదుపులు పెట్టుబడులతో బ్యాలెన్స్ చేసుకున్నాను” అని అతడు తెలిపాడు. “నేను నా తిరిగి చెల్లింపును తెలివిగా రూపొందించుకున్నాను – నాకు పన్ను ప్రయోజనాలు లభిస్తాయని, ద్రవ్యత మరియు పెట్టుబడిని తెలివిగా నిర్వహించాలని నిర్ధారించుకున్నాను. నిజాయితీగా చెప్పాలా? నేను తీసుకున్న ఉత్తమ ఆర్థిక నిర్ణయం అని వినియోగదారు పేర్కొన్నారు. అప్పు భారం లేకుండా ఉండటం కన్నా కూడా ఆర్థికంగా తెలివిగా ఉండటమే సరైందని నాకు అనిపించింది అంటూ ఈ యూజర్ తన అనుభవాన్ని పంచుకున్నాడు. అయితే దీనిపై నెట్టింట భిన్నాభిప్రాయాలు వ్యక్తమవుతున్నాయి. కొందరు నెటిజన్లు తమ విషయంలో ఇదేమంత తెలివైన నిర్ణయం కాదంటున్నారు.
‘అతనికి మంచి నిర్ణయం.. మాకు కాదు’
తన ఆర్థిక ప్రణాళికకు మద్దతుగా ఈ ఐఐఎం గ్రాడ్యుయేట్ వివరించిన పరిస్థితిపై అనేక మంది రెడ్డిట్ వినియోగదారులు ప్రశ్నలు సంధించారు.
కొత్త పన్ను విధానం ప్రకారం, సెక్షన్ 80ఇ ఇకపై చెల్లదని నేను అనుకుంటున్నాను… మనం పన్నులు, వడ్డీని చెల్లించాల్సి ఉంటుంది. అందులో తగ్గింపేమీ ఉండదు” అని ఒక వినియోగదారు వ్యాఖ్యానించారు.
“అతడు లోన్ తిరిగి చెల్లించే కాలంలో, కొత్త పన్ను విధానం లేదు. కాబట్టి మొత్తం మీద, అతనికి మంచి నిర్ణయం, మనకు కాదు ” అని మరొక వినియోగదారు కామెంట్ చేశాడు.
మూడవ వినియోగదారుడు పన్ను మినహాయింపులు కాకుండా వేరే ఏవైనా ప్రయోజనాలు ఉన్నాయా అని అడిగారు “ఎందుకంటే అవి ఇప్పుడు వర్తించవు”.
“మీ జీతంలో పెరుగుదల వడ్డీ రేట్ల కంటే ఎక్కువగా ఉంటే, మీరు దానిని వీలైనంత ఆలస్యంగా చెల్లించడం మంచిది. కానీ చాలా మంది మనశ్శాంతి కోసం ముందుగానే చేస్తారు.”
“ముందుగా నన్ను ఐఐఎం బెంగళూరులో అడ్మిషన్ పొందనివ్వండి, ఎనిమిది లేదా 10 సంవత్సరాలు పట్టినా నేను లోన్ చెల్లిస్తాను” అని ఒక వినియోగదారుడు చమత్కరించారు.