
పసిడి ప్రియులకు, పెట్టుబడిదారులకు ఇది నిజంగా ఒక పెద్ద సువర్ణావకాశం. గత కొన్ని రోజులుగా బంగారం, వెండి ధరలు భారీగా పడిపోతున్నాయి. వారంలో మొదటి రోజైన సోమవారం నాడు మల్టీ కమోడిటీ ఎక్స్ఛేంజ్ ఫ్యూచర్స్ మార్కెట్ తెరుచుకోగానే బంగారం, వెండి ధరలలో భారీ పతనం కనిపించింది. ఒక్కరోజే 10 గ్రాముల 24 క్యారెట్ల బంగారం ధర ఏకంగా రూ. 2,320 మేర చౌకైంది. ఇదే సమయంలో కిలో వెండి ధర కూడా రూ. 6,000 తగ్గి కొనుగోలుదారులకు భారీ ఊరటనిచ్చింది.
గత వారం చివరి రోజున డిసెంబర్ 4న గడువు ముగిసే 10 గ్రాముల 24 క్యారెట్ల బంగారం ధర రూ. 1,36,705 వద్ద ముగిసింది. అయితే సోమవారం మార్కెట్ ప్రారంభం కాగానే బంగారం ధర రూ. 1,35,312కు పడిపోయింది. ఆ తర్వాత కూడా పతనం కొనసాగడంతో మధ్యాహ్నానికి రూ.1,34,385కు చేరుకుంది. అంటే ఒక్కరోజే రూ.2,320 మేర తగ్గింది. ఇక జీవితకాల గరిష్ఠ స్థాయి రూ.1,77,590తో పోల్చి చూస్తే, ప్రస్తుతం 10 గ్రాముల బంగారం ఏకంగా రూ. 43,205 మేర తక్కువ ధరకు లభిస్తుండటం గమనార్హం.
గతంలో మార్కెట్ నిపుణులు అంచనా వేసినట్లుగానే బంగారం ధర రూ. 1 లక్ష దిశగా పయనిస్తున్నట్లు కనిపిస్తోంది. అంతర్జాతీయ మార్కెట్లో జనవరిలో నమోదైన రికార్డు గరిష్ఠ స్థాయి నుంచి పసిడి ధర ఇప్పటికే 30 శాతం పడిపోయింది. పెళ్లిళ్ల సీజన్కు ముందు ధరలు తగ్గుతుండటంతో కొనుగోలుదారుల్లో ఆసక్తి పెరుగుతోంది. యూఎస్ 10 సంవత్సరాల బాండ్ దిగుబడి పెరిగితే, స్వల్పకాలంలో అంతర్జాతీయ స్పాట్ బంగారం ధర ఔన్సుకు 4,025 – 3,950 డాలర్లకు తగ్గే అవకాశం ఉందని నిపుణులు చెబుతున్నారు. అదే జరిగితే భారత మార్కెట్లో 10 గ్రాముల బంగారం ధర రూ. 1 లక్ష నుంచి రూ. 1.25 లక్షల స్థాయికి దిగివచ్చే అవకాశాలు మెండుగా ఉన్నాయి.
బంగారం బాటలోనే వెండి ధరలు కూడా వేగంగా పడిపోతున్నాయి. సోమవారం MCX ఫ్యూచర్స్ మార్కెట్ తెరుచుకున్న వెంటనే, డిసెంబర్ 4న గడువు ముగిసే కిలో వెండి ధర రూ.6,000 తగ్గి రూ. 1.70 లక్షలకు పడిపోయింది. తన జీవితకాల గరిష్ఠ స్థాయి అయిన రూ.4,20,048తో పోల్చి చూస్తే, ఇప్పటివరకు కిలో వెండి ధర దాదాపు రూ. 2.50 లక్షల మేర తగ్గడం విశేషం. ఫ్యూచర్స్ మార్కెట్లో పెట్టుబడి పెట్టాలనుకునే వారికి ఇదే సరైన సమయమని మార్కెట్ వర్గాలు విశ్లేషిస్తున్నాయి.