Fact Check: ఏప్రిల్ 1 నుంచి దేశంలోని అన్ని బ్యాంకుల UPI లావాదేవీలు నిలిచిపోతాయా?

UPI లావాదేవీలకు సంబంధించి నేషనల్ పేమెంట్స్ కార్పొరేషన్ ఆఫ్ ఇండియా (NPCI) జారీ చేసిన కొత్త మార్గదర్శకాలను ఉటంకిస్తూ, సోషల్ మీడియా వినియోగదారులు ఏప్రిల్ 1, 2025 నుండి అంటే వచ్చే ఆర్థిక సంవత్సరం ప్రారంభం నుండి అన్ని బ్యాంకులు UPI సేవలను అందించడం నిలిపివేస్తాయని పేర్కొన్న పోస్ట్‌ను షేర్ చేస్తున్నారు. దీని అర్థం ఏప్రిల్ 1, 2025 నుండి కస్టమర్‌లు యూపీఐ సేవను ఉపయోగించలేరు. ఫోన్‌పే, గూగుల్ పే, మరే ఇతర యుపిఐ యాప్ పనిచేయదని చెబుతున్నారు. దీనిపై వినియోగదారుల్లో పెద్ద గందరగోళం నెలకొంది. సోషల్ మీడియా వినియోగదారులు దీని గురించి ఒక పోస్ట్‌ను షేర్ చేస్తూ, “అన్ని బ్యాంకులు ఏప్రిల్ 1, 2025 నుండి UPIని నిలిపివేస్తాయి” అని రాశారు.

UPI లావాదేవీలు నిజంగా ఆగిపోతాయా?:

దీని గురించి పరిశోధించినప్పుడు వైరల్‌ అవుతున్న వార్త ఫేక్‌ అని తేలింది. ఇందులో ఎలాంటి నిజం లేదు. సోషల్‌ మీడియాలో వైరల్‌ అవుతున్న వాటిని నమ్మకూడదని చెబుతున్నారు. ఏప్రిల్ 1, 2025 నుండి యూపీఐ లావాదేవీలలో ఎటువంటి మార్పు ఉండదు. అలాగే కస్టమర్‌లు మునుపటిలాగే ఈ సేవను ఉపయోగించడం కొనసాగిస్తారు. అయితే కస్టమర్ల భద్రతను దృష్టిలో ఉంచుకుని నేషనల్ పేమెంట్స్ కార్పొరేషన్ ఆఫ్ ఇండియా (NPCI) కొత్త మార్గదర్శకాలను జారీ చేసింది. దీని ప్రకారం బ్యాంకులు ఇప్పుడు వాడని బ్యాంకు అకౌంట్లు, అలాగే అందులో ఉన్న మొబైల్‌ నంబర్లను తొలగించాల్సి ఉంటుంది. కొత్త వినియోగదారులకు కేటాయించబడిన మొబైల్ నంబర్‌లను క్రమం తప్పకుండా తొలగించాల్సి ఉంటుంది. NPCI నుండి వచ్చిన ఈ మార్గదర్శకం యూపీఐ లావాదేవీలలో లోపాలను నివారించడంలో సహాయపడుతుంది.

నేషనల్ పేమెంట్స్ కార్పొరేషన్ ఆఫ్ ఇండియా (NPCI) UPI (యూనిఫైడ్ పేమెంట్స్ ఇంటర్‌ఫేస్)ని నిర్వహిస్తుంది. ఫిబ్రవరి 2025 డేటా ప్రకారం.. మొత్తం 652 బ్యాంకులు ఈ ఇంటర్‌ఫేస్‌లో పనిచేస్తున్నాయి. అటువంటి పరిస్థితిలో ఈ సేవ నిలిపివేస్తే అది పెద్ద వార్త అయ్యేది. కానీ కొత్త ఆర్థిక సంవత్సరం ప్రారంభం నుండి యూపీఐ నిలిపివేయడం గురించి వార్తా నివేదికలలో ఎటువంటి ప్రస్తావన కనిపించలేదు. ఈ సేవ నిలిపివేయడం గురించి NPCI వెబ్‌సైట్‌లో మాకు ఎలాంటి సమాచారం కనిపించలేదు.

ఈ సమయంలో NPCI బ్యాంకులకు జారీ చేసిన కొత్త మార్గదర్శకాలను ప్రస్తావిస్తూ అనేక నివేదికలు ఉన్నాయి. యూపీఐ లావాదేవీల భద్రత కోసం NPCI కొత్త మార్గదర్శకాలను జారీ చేసింది. ఇది ఏప్రిల్ 1, 2025 నుండి అమల్లోకి వస్తుంది. ఈ నిబంధనల ప్రకారం.. Google Pay, PhonePe, Paytm వంటి బ్యాంకులు, చెల్లింపు సేవా ప్రదాతలు రద్దు చేయబడిన మొబైల్ నంబర్ల జాబితాను నేషనల్ పేమెంట్స్ కార్పొరేషన్ ఆఫ్ ఇండియాకు సమర్పించాలి. ఇది అనర్హమైన లేదా రద్దు చేయబడిన మొబైల్ నంబర్‌లను తొలగిస్తుంది. దీని అర్థం బ్యాంకుకు లింక్ చేసిన, ఇకపై ఉపయోగంలో లేని నంబర్‌లు తొలగిస్తారు. ఇది 1 మొబైల్ నంబర్‌ను 2 బ్యాంక్ ఖాతాలకు లింక్ చేసి, అదే బ్యాంకుతో ఆ మొబైల్ నంబర్‌ను ఉపయోగించడం కొనసాగించని కస్టమర్లకు కూడా వర్తిస్తుందని నివేదిక పేర్కొంది. అందుకే సోషల్‌ మీడియాలో వైరల్‌ అవుతున్నదానిలో ఎలాంటి నిజం లేదు.

మరిన్ని బిజినెస్ వార్తల కోసం ఇక్కడ క్లిక్ చేయండి