RBI Big Update: 2000 నోట్లపై కీలక అప్‌డేట్ ఇచ్చిన రిజర్వ్ బ్యాంక్ ఆఫ్ ఇండియా
దేశంలో రెండు వేల రూపాయల నోట్లను రిజర్వ్ బ్యాంక్ ఆఫ్ ఇండియా (ఆర్బీఐ) ఉపసంహరించుకుంటున్నట్లు గతంలో ప్రకటన చేసిన విషయం తెలిసిందే. అందుకు గడువు కూడా ఇచ్చింది. పెద్ద నోట్ల ఉన్నవాళ్లంతా బ్యాంకులకు వెళ్లి మార్చుకున్నారు. ఈ రెండు వేల రూపాయల నోట్లను ముద్రించడం కూడా నిలిపివేసినట్లు ఆర్బీఐ గతంలో తెలిపింది. 2000 నోట్లు ఉన్నవాళ్లు ఇప్పటి వరకు బ్యాంకులకు వెళ్లి మార్పిడి చేసుకున్నారు..
భారతీయ రిజర్వ్ బ్యాంక్ రూ.2000 నోటుపై ఒక కీలక అప్‌డేట్‌ను అందించింది. గతేడాది రూ.2000 నోట్లను చెలామణి నుంచి ఉపసంహరించుకుంటున్నట్లు ఆర్బీఐ ప్రకటన చేసిన విషయం తెలిసిందే. రిజర్వ్ బ్యాంక్ ఆఫ్ ఇండియా ఫిబ్రవరి 29, 2024 వరకు రూ. 2000 నోట్లలో మొత్తం 97.62 శాతం తిరిగి వచ్చినట్లు వెల్లడించగా, ఇప్పుడు రూ.8,470 కోట్ల విలువైన 2000 నోట్లు మాత్రమే బ్యాంకులకు రాలేదని తెలిపింది. దేశంలో అతిపెద్ద కరెన్సీ నోటు రూ.2000 నోటును 19 మే 2023న రద్దు చేయాలని ఆర్బీఐ నిర్ణయించింది.
క్లీన్ నోట్ పాలసీ కింద రిజర్వ్ బ్యాంక్ ఆఫ్ ఇండియా ఈ నిర్ణయం తీసుకుంది. ఈ రెండు వేల రూపాయల నోట్లను మార్చేందుకు అక్టోబర్ 7, 2023 వరకు గడువు ఇచ్చారు. దేశంలోని అన్ని బ్యాంకుల్లో ఈ నోట్లను మార్చుకునేందుకు అనుమతించారు. ఇప్పుడు సాధారణ బ్యాంకులు, ఇతర ప్రదేశాలలో ఈ 2000 నోట్లను మార్చుకునే సదుపాయం ఇప్పుడు లేదు. ఎవరైనా రూ.2000 నోట్లను మార్చుకోవాలనుకుంటే ఆ నోట్లను రిజర్వ్ బ్యాంకుకు పోస్ట్ ద్వారా పంపించాల్సి ఉంటుంది.
2000 నోటు ఎప్పుడు ప్రారంభించారు?
కొత్త 2000 నోటును రిజర్వ్ బ్యాంక్ ఆఫ్ ఇండియా నవంబర్ 2016న విడుదల చేసింది. ఆ సమయంలో ప్రభుత్వం పెద్ద నోట్ల రద్దును ప్రకటించి పాత 500, 1000 రూపాయల నోట్లను రద్దు చేస్తూ నిర్ణయం తీసుకుంది. అప్పట్లో 1000 రూపాయల నోటు అతిపెద్ద కరెన్సీ నోటు. 2018-19 ఆర్థిక సంవత్సరంలో 2000 నోట్ల ముద్రణను కూడా ఆర్బీఐ నిలిపివేసింది. అలాగే మే 2023లో జాబితా నుండి తొలగించబడింది. ఇప్పుడు 500 రూపాయల నోటు అతిపెద్ద కరెన్సీ నోటు.
మరిన్ని బిజినెస్ వార్తల కోసం ఇక్కడ క్లిక్ చేయండి