విత్తనాలు నాటబోతే వజ్రం దొరికింది..!

అదృష్టం చెప్పిరాదు.. దురదృష్టం చెప్పి పోదు అంటారు పెద్దలు. కూలీ పని చేసుకుంటున్న ఓ మహిళకు అనుకోకుండా అదృష్టం కలిసి వచ్చింది. ఒక్కరోజులోనే కూలీని లక్షాధికారిణి చేసింది. వేరుశెనగ విత్తనాలు నాటబోతే వజ్రం చేతికి తగిలింది. దీంతో మహిళ సంతోషానికి అవధులు లేకుండాపోయాయి. తుగ్గలి మండలంలోని రామాపురం గ్రామానికి చెందిన ఓ మహిళా కూలీ పని చేసుకుంటూ కుటుంబాన్ని పోషిస్తోంది. ఇందులో భాగంగా వేరుశనగ విత్తనం విత్తేందుకు వెళ్లింది. మహిళా కూలీకి వజ్రం కంట పడడంతో ఆగి తీసుకుంది. ఇదే విషయాన్ని కుటుంబసభ్యులకు చెప్పడంతో వెంటనే అమ్మాలని నిర్ణయించుకున్నారు. దీంతో 5 క్యారెట్లకు పైగా ఉన్న ఈ వజ్రాన్ని అదే రోజు రాత్రి అనంతపురం జిల్లా గుత్తికి చెందిన ఓ వ్యాపారికి అమ్మేసింది. ఆ మహిళకు రూ.5.50 లక్షల నగదు, 3తులాల బంగారం ఇచ్చి పంపించాడు ఆ వ్యాపారి. అనుకోకుండా వచ్చిన సొమ్ముతో ఆ మహిళ కుటుంబం అనందంలో మునిగిపోయింది.