Andhra: తండ్రి కూలీ.. టైలరింగ్ చేసే తల్లి.. కూతురికి అమెజాన్‌లో రూ.46 లక్షల జాబ్!

కూలీ పనులు చేసే తండ్రి, టైలరింగ్‌తో కుటుంబాన్ని నడిపించే తల్లి.. ఎన్నో కష్టాలు పడి కూతురిని చదివించారు. వారి కష్టానికి తగిన ఫలితంగా గుంటూరుకు చెందిన వరలక్ష్మీ అమెజాన్‌లో ఉద్యోగం సాధించింది. వీవీఐటీలో కంప్యూటర్ సైన్స్ ఇంజినీరింగ్ చదివిన ఆమెకు ఏడాదికి రూ.46 లక్షల ప్యాకేజీ లభించింది. మరో విద్యార్థిని కుసుమ కూడా ఇదే ప్యాకేజీతో అమెజాన్‌కు ఎంపికైంది.

Andhra: తండ్రి కూలీ.. టైలరింగ్ చేసే తల్లి.. కూతురికి అమెజాన్‌లో రూ.46 లక్షల జాబ్!
Varalakshmi

Edited By:

Updated on: Nov 21, 2026 | 1:35 PM

 

ఒకవైపు తండ్రి కూలీ పనులకు వెళ్తాడు. మరోవైపు తల్లి టైలరింగ్ చేస్తూ కుటుంబాన్ని నెట్టుకొస్తుంది. రోజంతా కష్టపడితేనే ఇల్లు గడిచే పరిస్థితి. అయినా ఆ తల్లిదండ్రులు తమ పిల్లల చదువుల విషయంలో మాత్రం ఎక్కడా రాజీపడలేదు. తాము పడుతున్న కష్టం తమ పిల్లల భవిష్యత్తుకు అడ్డంకి కాకూడదని భావించారు. వాళ్లు ఉన్నత చదువులు చదివి జీవితంలో స్థిరపడాలని కలలు కన్నారు. ఆ కలను నిజం చేస్తూ వారి కూతురు ఏకంగా ప్రపంచ ప్రఖ్యాత టెక్ కంపెనీ అమెజాన్‌లో ఉద్యోగం సంపాదించింది. అది కూడా ఏడాదికి రూ.46 లక్షల ప్యాకేజీతో! ఇప్పుడు ఆ తల్లిదండ్రుల ఆనందానికి అవధుల్లేవు.

గుంటూరుకు చెందిన రాంబాబు, లక్ష్మీ సుజాత దంపతులకు ఇద్దరు పిల్లలు. ఆర్థికంగా పెద్దగా స్థోమత లేకపోయినా, పిల్లలకు మంచి చదువు చెప్పించాలన్న విషయంలో మాత్రం వెనక్కి తగ్గలేదు. తండ్రి కూలీ పనులు చేస్తూ, తల్లి టైలరింగ్ చేస్తూ వచ్చిన సంపాదనలోనే పిల్లల చదువులకు ప్రాధాన్యం ఇచ్చారు. కూతురు వరలక్ష్మిని గుంటూరులోని వాసిరెడ్డి వెంకటాద్రి ఇన్‌స్టిట్యూట్ ఆఫ్ టెక్నాలజీ (వీవీఐటీ)లో కంప్యూటర్ సైన్స్ ఇంజినీరింగ్‌లో చేర్పించారు.

తల్లిదండ్రులు తన కోసం పడుతున్న కష్టాన్ని వరలక్ష్మీ అర్థం చేసుకుంది. చదువుపై దృష్టి పెట్టింది. క్లాస్‌లో మంచి మార్కులు సాధిస్తూ ముందుకు సాగింది. ఈ క్రమంలో కాలేజీలో క్యాంపస్ ప్లేస్‌మెంట్స్ ప్రారంభమయ్యాయి. వరలక్ష్మీ కూడా ఇంటర్వ్యూలకు హాజరైంది. పెద్ద కంపెనీలో ఉద్యోగం వస్తుందని, ఇంత భారీ ప్యాకేజీ వస్తుందని మొదట్లో ఆమె కూడా ఊహించలేదు. కానీ అమెజాన్ నిర్వహించిన ఎంపిక ప్రక్రియలో తన ప్రతిభను నిరూపించుకుంది. అమెజాన్‌లో డేటా ఇంజినీర్ ఇంటర్న్‌గా ఎంపికైంది. దీంతో పాటు ఏడాదికి రూ.46 లక్షల ప్యాకేజీ ప్రకటించింది. ఒక సాధారణ కుటుంబం నుంచి వచ్చిన అమ్మాయికి ఇంత పెద్ద అవకాశం రావడంతో కుటుంబంలో ఆనందం వెల్లివిరిసింది. ఇన్నాళ్లూ పిల్లల భవిష్యత్తు కోసం కష్టపడిన తల్లిదండ్రులకు ఇది మర్చిపోలేని క్షణంగా మారింది.

తన విజయంపై వరలక్ష్మీ కూడా సంతోషం వ్యక్తం చేసింది. ఇంటర్వ్యూలకు వెళ్లినప్పుడు పెద్ద పెద్ద కార్పొరేట్ కంపెనీల్లో ఉద్యోగం వస్తుందని అనుకోలేదని చెప్పింది. తన అన్న చంద్రశేఖర్ పవన్ కుమార్ ఇచ్చిన ప్రోత్సాహం, కాలేజీ అధ్యాపకుల మార్గదర్శకత్వం తనకు ఎంతో ఉపయోగపడ్డాయని తెలిపింది. క్యాంపస్ ఇంటర్వ్యూల్లో వచ్చిన ప్రతి అవకాశాన్నీ సీరియస్‌గా తీసుకుని, తనకు చేతనైనంత బాగా సమాధానాలు చెప్పానని వివరించింది. అలా ప్రయత్నిస్తుండగానే అమెజాన్‌లో అవకాశం రావడం తనకు ఎంతో సంతోషాన్నిచ్చిందని చెప్పింది.

తాను ఏ కుటుంబ నేపథ్యం నుంచి వచ్చానన్నది ముఖ్యం కాదని, ప్రస్తుత పరిస్థితులకు తగ్గట్టుగా మనల్ని మనం సిద్ధం చేసుకుంటూ, పట్టుదలతో ప్రయత్నిస్తే విజయం సాధించవచ్చని వరలక్ష్మీ అభిప్రాయపడింది. అమెజాన్‌లో ఉద్యోగం సాధించిన వరలక్ష్మీని ఆమె తోటి విద్యార్థులతో పాటు వీవీఐటీ ఛైర్మన్ విద్యాసాగర్ అభినందించారు. మరో ఆసక్తికరమైన విషయం ఏంటంటే.. అదే కాలేజీకి చెందిన కుసుమ అనే విద్యార్థిని కూడా అమెజాన్‌లో ఏడాదికి రూ.46 లక్షల ప్యాకేజీతో ఎంపికైంది. దీంతో ఇద్దరు విద్యార్థినుల విజయంపై కాలేజీ అధ్యాపకులు హర్షం వ్యక్తం చేశారు.

నిజానికి వరలక్ష్మీకి వచ్చిన ఈ ఉద్యోగం కేవలం రూ.46 లక్షల ప్యాకేజీ మాత్రమే కాదు. ఆమె తల్లిదండ్రులు కూలీ పనులు చేస్తూ, కుట్టుమిషన్‌పై బట్టలు కుడుతూ కన్న కలలకు దక్కిన ప్రతిఫలం. తాము ఎండలో చెమటోడ్చి సంపాదించిన ప్రతి రూపాయిని పిల్లల చదువుల కోసం ఖర్చు చేసిన ఆ తల్లిదండ్రులకు, ఇప్పుడు తమ కూతురు సాధించిన విజయం ఎంతో గర్వకారణం. కష్టం చేసే చేతులు చిన్నవి కావు.. కలలు కనడానికి పెద్ద బ్యాక్‌గ్రౌండ్ అవసరం లేదు. వాటిని నిజం చేసుకోవాలనే పట్టుదల ఉంటే చాలని వరలక్ష్మీ ప్రయాణం మరోసారి నిరూపిస్తోంది.

Loading...
Unable to load recommendations.
Follow Us