Texas Shooting: అమెరికాలో మళ్లీ కాల్పుల కలకలం.. పోలీసుల అదుపులో నిందితుడు.. వరుస కాల్పులతో ఆందోళన
Texas Shooting: అగ్రరాజ్యంలో కాల్పులు కలకలం రేపుతోంది. ఇప్పటికే వరుస కాల్పులతో దద్దరిల్లుతున్న అగ్రరాజ్యంలో మళ్లీ కాల్పలు చోటు చేసుకున్నాయి. టెక్సాస్ రాష్ట్రం బ్రియాన్లో...
Texas Shooting: అగ్రరాజ్యంలో కాల్పులు కలకలం రేపుతోంది. ఇప్పటికే వరుస కాల్పులతో దద్దరిల్లుతున్న అగ్రరాజ్యంలో మళ్లీ కాల్పలు చోటు చేసుకున్నాయి. టెక్సాస్ రాష్ట్రం బ్రియాన్లో గురువారం కాల్పులు చోటు చేసుకున్నాయి. ఓ వ్యాపార సంస్థలో ఉద్యోగి జరిపిన కాల్పుల్లో ఓ వ్యక్తి మృతి చెందగా, ఐదుగురు తీవ్రంగా గాయపడ్డారు. అయితే అమెరికా అధ్యక్షుడు జో బైడెన్ తుపాకుల హింసను ‘అంటువ్యాధి’ అని ఈ సంక్షభాన్ని పరిష్కరించే ప్రణాళికను ప్రకటించిన గంటల వ్యవధిలోనే ఈ ఘటన చోటు చేసుకోవడం గమనార్హం. ఈ ఘటనకు పాల్పడిన నిందితుడిని బ్రియాన్ పోలీసులు అదుపులోకి తీసుకున్నారు. అయితే దుండగులు కాల్పులు ఎందుకు జరిపాడనేదానిపై స్పష్టత రావాల్సి ఉందని పోలీసులు చెబుతున్నారు.
గురువారం మధ్యాహ్నం 2.30 గంటల (అమెరికా కాలమాన ప్రకారం) కాల్పులు చోటు చేసుకోగా, సమాచారం అందుకున్నట్లు పోలీసు చీఫ్ ఎరిక్ బస్కే వెల్లడించారు. కెంట్ మూరే కేబినెట్స్లో ఈ ఘటన జరిగిందని, నిందితుడు ఈ సంస్థలోనే పని చేస్తున్నట్లు పోలీసులు వెల్లడించారు. ఇక అగ్రరాజ్యంలో తుపాకుల సంస్కృతికి కళ్లెం వేసే దిశగా అధ్యక్షుడు జో బైడెన్ చర్యలు చేపట్టారు. మద్యం, పొగాకు, ఆయుధాలు, పేలుడు పదార్థాల నిరోధక సంస్థ (ఏటీఎఫ్) డైరెక్టర్గా డేవిడ్ చిప్మాన్ను నియమించిన విషయం తెలిసిందే. అయితే ఈ కాల్పుల్లో గాయపడిన పలువురి పరిస్థితి విషమంగా ఉన్నట్లు తెలుస్తోంది.
అయితే కాల్పుల అనంతరం నిందితుడు పారిపోయాడని, గ్రీమ్స్ కౌంటీలో అదుపులోకి తీసుకున్నట్లు అధికారులు వెల్లడించారు. ఘటనపై టెక్సాస్ గవర్నర్ దిగ్భ్రాంతి వ్యక్తం చేశారు. టెక్సాస్ రేంజర్స్తో కలిసి పని చేస్తున్నామని, స్థానిక చట్ట అమలుకు పూర్తి సహాయం చేస్తామని టెక్సాస్ గవర్నర్ గ్రెగ్ అబోట్ ఒక ప్రకటనలో తెలిపారు.
Indian Techie: అమెరికాలో విషాదం.. భారతీయ దంపతుల అనుమానస్పద మృతి.. అనాథగా మారిన నాలుగేళ్ల చిన్నారి