Subhashini: KCR వల్లే క్యాన్సర్‌ నుంచి బయటపడ్డా.. ఇండస్ట్రీలో అందరూ మారారు అంటూ.. సుభాషిణి ఎమోషనల్

టాలీవుడ్ నటి సుభాషిణి తన సుదీర్ఘ సినీ ప్రస్థానంలో ఎదురైన అనుభూతులను, సవాళ్లను తన రీసెంట్‌ ఇంటర్వ్యూలో పంచుకున్నారు. చిరంజీవి, బాలకృష్ణలతో కలిసి పనిచేసిన క్షణాలను వివరించారు. చిరంజీవి తనను బాగా రిసీవ్ చేసుకున్నారని, బాలకృష్ణ అయితే తన చేత పద్యాలు పాడించుకునేవారని గుర్తుచేసుకున్నారు. గతంలో సినీ పరిశ్రమలో ఉన్న ఆత్మీయత, సహాయ సహకారాలు, కలసి భోజనం చేయడం వంటి విషయాలను ఆమె ప్రస్తావించారు. ప్రస్తుత కాలంలో ఆ వాతావరణం కొరవడిందని, స్వార్థం పెరిగిపోయిందని, పక్కవారి గురించి పట్టించుకునే పరిస్థితి లేదని ఆవేదన వ్యక్తం చేశారు. దాదాపు పదేళ్లలో సినీ రంగంలో వచ్చిన మార్పులు హైదరాబాద్‌ మారినంత వేగంగా ఉన్నాయని సుభాషిణి అన్నారు. బెండు అప్పారావు సినిమా షూటింగ్‌ సమయంలో తనకు కళ్లు తిరగడంతో ఆసుపత్రికి వెళ్లానని.. అక్కడే తనకు క్యాన్సర్‌ నిర్ధారణ అయ్యిందని సుభాషిణి వెల్లడించారు. ప్రాథమిక దశలోనే గుర్తించబడినప్పటికీ, చికిత్సకు అవసరమైన రూ. 10-15 లక్షలు తన వద్ద లేకపోవడంతో ఆదుకోవాలని అప్పటి ముఖ్యమంత్రి కేసీఆర్‌ను ఆశ్రయించినట్లు గుర్తు చేసుకున్నారు. కేసీఆర్ నేరుగా కలవకపోయినా, తన ఆర్టిస్ట్ గుర్తింపుతో వెంటనే ఆపరేషన్ ఖర్చును మంజూరు చేయించి, ఆమె ప్రాణాలను కాపాడారని సుభాషిణి గుర్తు చేసుకున్నారు. తన ఆర్థిక ఇబ్బందులకు గల కారణాన్ని కూడా ఆమె వివరించారు. దూరదర్శన్‌లో ప్రసారమైన అభిమానం అనే సీరియల్‌ నిర్మాణానికి తాను సంపాదించిన డబ్బంతా పెట్టానని, అప్పులు కూడా చేశానని తెలిపారు. అయితే, ఆ సీరియల్‌కు సంబంధించిన బిల్లులు ఇప్పటికీ ప్రభుత్వం నుంచి రాలేదని, దీంతో తాను తీవ్ర ఆర్థిక సంక్షోభంలో కూరుకుపోయానని పేర్కొన్నారు. ఈ విషయంలో ప్రస్తుతం కందుల గణేష్, కే. విశ్వనాథ్ వంటి అధికారుల సహాయం కోసం ఎదురుచూస్తున్నట్లు తెలిపారు. తాను కట్టిన ఇల్లు కూడా బ్యాంకుకు తనఖా పెట్టాల్సి వచ్చిందని ఆమె కన్నీటి పర్యంతమయ్యారు. ఒకసారి రైల్వే స్టేషన్‌లో తాను కూర్చొని ఉండగా, తన అనుమతి లేకుండా కొందరు తన ఫోటోలు తీసి యూట్యూబ్‌లో పోస్ట్ చేసి, తన గురించి అసభ్యకర వ్యాఖ్యలు చేశారని ఆమె ఆగ్రహం వ్యక్తం చేశారు. చిరంజీవి, నాగబాబు తన అనారోగ్య సమయంలో రూ. రెండు లక్షల ఆర్థిక సహాయం చేశారని సుభాషిణి గుర్తుచేసుకున్నారు. పరిశ్రమ నుంచి దూరం కావడం పట్ల బాధపడుతున్నట్లు, కళామ తల్లి తనకు దూరమైందని ఆవేదన వ్యక్తం చేశారు. ఈ కష్టాల నుంచి బయటపడి తిరిగి తన కళను కొనసాగించాలని ఆమె కోరుకున్నారు.

మరిన్ని వీడియోల కోసం ఇక్కడ క్లిక్ చేయండి

Also Watch:

రైతు బిడ్డకు గిట్టుబాటు అయింది! 8 వారాలకు లక్షల్లో రెమ్యునరేషన్

గిల్, పీవీ సింధు నుదిటి పై వింత పరికరం.. అథ్లెట్ల కోసం అదిరిపోయే టెక్నాలజీ!

48 ఏళ్లుగా నీళ్లే తాగలేదట.. మరి ఏం తాగారో తెలుసా!