లవ్ జిహాద్‌ వ్యవహరంపై యూపీ సర్కార్ సీరియస్.. మరో కేసు నమోదు.. ఇద్దరి అరెస్ట్
బలవంతపు మతమార్పిడి వివాహాలపై ఉత్తరప్రదేశ్ రాష్ట్ర ప్రభుత్వం కఠినంగా వ్యవహరిస్తోంది. బలవంతపు మతమార్పిడులతో చేసే వివాహాలను అడ్డుకునేందుకు ఉద్దేశించిన ఆర్డినెన్సు తీసుకువచ్చిన విషయం విదితమే.
బలవంతపు మతమార్పిడి వివాహాలపై ఉత్తరప్రదేశ్ రాష్ట్ర ప్రభుత్వం కఠినంగా వ్యవహరిస్తోంది. బలవంతపు మతమార్పిడులతో చేసే వివాహాలను అడ్డుకునేందుకు ఉద్దేశించిన ఆర్డినెన్సు తీసుకువచ్చిన విషయం విదితమే. ఈ చట్టానికి సంబంధించి ఉత్తర్‌ప్రదేశ్‌లోని మొరాదాబాద్‌లో ఓ వ్యక్తిని, అతని సోదరుడిని పోలీసులు అరెస్టు చేశారు. వేరే మతానికి చెందిన ఓ మహిళతో బలవంతంగా వివాహాన్ని నమోదు చేసేందుకు ఆ వ్యక్తి తన సోదరుడితో కలిసి రిజిస్ట్రార్‌ కార్యాలయానికి వచ్చారు. ఇది తెలుసుకున్న భజరంగ్‌దళ్‌ కార్యకర్తలు.. పోలీసులకు సమాచారం ఇచ్చారు. దీంతో అక్కడికి చేరుకున్న పోలీసులు ఇద్దరిని అదుపులోకి తీసుకుని విచారణ చేపట్టారు.
కాగా సంబంధిత మహిళ తనకు వివాహ వయసు వచ్చిందని, కొద్ది నెలల క్రితం తన ఇష్టంతోనే ఆ వ్యక్తిని పెళ్లి చేసుకున్నట్లు చెబుతున్నారు. ఆ మహిళ తల్లిదండ్రులు ఇచ్చిన ఫిర్యాదు మేరకే ఇద్దరినీ అరెస్టు చేసినట్లు పోలీసులు తెలిపారు. వారిని మేజిస్ట్రేట్‌ ఎదుట హాజరుపరిచిన అనంతరం జైలుకు తరలించినట్లు చెప్పారు. కొత్త ఆర్డినెన్స్‌ ప్రకారం ఇలాంటి కేసులకు సంబంధించి ఇటీవల ఉత్తర్‌ప్రదేశ్‌ పోలీసులు సీతాపుర్‌లో ఏడుగురిని అరెస్టు చేయడంతో పాటు లక్నోలో మరో వివాహాన్ని కూడా అడ్డుకున్నారు.
