ప్రాణంతీసిన సెల్ఫీ పిచ్చి.. 18వ అంతస్తు నుంచి కిందికి దూకి..

సెల్ఫీ.. ప్రస్తుతం కొంత మంది యువత వీటికోసం వింత వింత వేశాలు వేస్తూ.. వెరైటీగా దిగి అందిరిని ఆకట్టుకునేందుకు విశ్వప్రయత్నాలు చేస్తుంటారు. అయితే ఆ సెల్ఫీ క్రేజ్‌లో పడి.. చైనాలోని పెనాన్ ప్రావిన్స్‌కి చెందిన ఓ 19ఏళ్ల యువకుడు ప్రాణాలు కోల్పోయాడు. కాస్త వెరైటీగా సెల్ఫీ దిగుదామనుకున్నాడో.. ఏమోగానీ.. డేరింగ్ సెల్ఫీకి ప్రయత్నించి విఫలమయ్యాడు. క్వీన్‌యాంగ్‌ ప్రాంతంలోని ఓ 18 అంతస్తుల భవనం కార్నర్ నుంచి సెల్ఫీ దిగేందుకు ప్రయత్నించాడు. అయితే ఆ గోడ చివర రూఫ్ కూలిపోవడంతో ఆ యువకుడు ఒక్కసారిగా ప్రాణాలు కోల్పోయాడు. ఆ సమయంలో ఎదరుగా ఉన్న భవనం నుంచి ఓ వ్యక్తి వీడియో తీయడంతో ఈ ఘటన వెలుగులోకి వచ్చింది. రూఫ్‌టాప్ నిర్మాణంలో నాణ్యత లేకపోవడం వల్లే ఈ ఘటన చోటుచేసుకున్నట్లు తెలుస్తోంది.

అయితే ఏప్రిల్ 22న జరిగిన ఈ ఘటనకు సంబంధించిన వీడియోను ముంబై పోలీసులు ట్వీట్ చేశారు. సెల్ఫీ పిచ్చితోనో.. లేక సాహసాల పేరుతోనో ప్రాణాలు కోల్పోవొద్దని సందేశమిచ్చారు. దీంతో ఈ వీడియో ఇప్పుడు వైరల్‌గా మారింది. డేరింగ్‌ సెల్ఫీ కోసం ప్రయత్నం చేస్తున్నారా? బాధ్యత లేకుండా సాహసాలు చేస్తున్నారా ? చేసేదేదైనా మీకు మిగిలేది రిస్క్‌ మాత్రమే అంటూ హెచ్చరించారు. సేఫ్టీ ఫస్ట్‌ (#SafetyFirst )అనే హ్యాష్‌ ట్యాగ్‌తో ముంబై పోలీసులు ఈ పోస్ట్‌ పెట్టారు.