కుక్కల కోసం బీర్.. ఆల్కహాల్ ఉండదు.. మరి దీని ప్రత్యేకత ఏంటి?
డాగ్ బీర్ అనేది కుక్కల కోసం ప్రత్యేకంగా తయారు చేసే ఆల్కహాల్ లేని పానీయం. ఇందులో సాధారణంగా ఎముకల నుంచి తయారు చేసిన ఉడకబెట్టిన రసం (బోన్ బ్రోత్), పండ్లు, కూరగాయలు ఉపయోగిస్తారు. కుక్కల కోసం టీలు, టానిక్స్, ట్రీట్స్ వంటి ఉత్పత్తులను తయారు చేసే ఓ సంస్థ ‘బాటమ్ స్నిఫర్’ పేరుతో ఈ ప్రత్యేక పానీయాన్ని రూపొందించింది. పేరుకు బీర్ అయినప్పటికీ.. ఇందులో మనుషులు తాగే బీర్‌లో ఉండే ముఖ్యమైన పదార్థాలు ఉండవు.
మనుషులు ఎండలో చల్లని బీర్ తాగుతూ సేదతీరుతుంటారు. అయితే అదే బీర్‌ను తమ పెంపుడు కుక్కలకు ఇవ్వాలనుకోవడం మాత్రం ప్రమాదకరం. సాధారణ బీర్ లోని ఇథనాల్ అనే ఆల్కహాల్ కుక్కల శరీరంపై ప్రమాదకర ప్రభావం చూపుతుంది. జంతువుల్లో ఆల్కహాల్ విషప్రభావం కలగడానికి చాలా తక్కువ పరిమాణం కూడా సరిపోవచ్చు. ముఖ్యంగా చిన్న కుక్కలు కొద్దిగా బీర్ తాగినా మత్తులో ఉన్నట్లుగా కనిపించవచ్చు. నేలపై పడిన బీర్‌ను నాకినా, అందుబాటులో ఉన్న గ్లాసులోని బీర్‌ను తాగినా ప్రమాదమే.
ఈ సమస్యకు ఓ సంస్థ వినూత్న పరిష్కారాన్ని తీసుకొచ్చింది. కుక్కల కోసం ప్రత్యేకంగా బీర్‌ను తయారు చేసింది. అదే ‘బాటమ్ స్నిఫర్’ (Bottom Sniffer). అయితే ఈ బీర్‌లో ఆల్కహాల్ ఉండదు. సాధారణ బీర్ తయారీలో ఉపయోగించే హాప్స్ ఇందులో ఉండవు. అలాగే ఆల్కహాల్, గ్యాస్ కోసం ఉపయోగించే కార్బొనేషన్ కూడా ఉండదు. అంటే ఇది మనుషులు తాగే బీర్‌లా కాకుండా కుక్కల కోసం తయారు చేసిన ప్రత్యేక పానీయం. బాటమ్ స్నిఫర్‌ను ప్రత్యేకమైన బాటిళ్లలో విక్రయిస్తారు. ఇందులో సహజమైన చికెన్ ఫ్లేవర్‌తో పాటు డాండెలియన్ అనే మొక్క, అవిసె గింజలు (ఫ్లాక్స్ సీడ్స్‌), బార్లీ మాల్ట్ వంటి పదార్థాలను ఉపయోగిస్తారు.
మరి దీనిని బీర్ అని ఎందుకు పిలుస్తున్నారు?
ఈ పానీయంలో సాధారణ బీర్‌లో ఉండే ఆల్కహాల్, హాప్స్, కార్బొనేషన్ లేనప్పటికీ.. బీర్ బాటిళ్ల తరహాలో ప్యాకేజింగ్ చేయడం, పెంపుడు కుక్కలకు ప్రత్యేకమైన పానీయంగా రూపొందించడం వల్ల దీనికి ఆ పేరు పెట్టారు. బాటమ్ స్నిఫర్‌లో ఆల్కహాల్ లేకపోవడం వల్ల సాధారణ బీర్‌తో పోలిస్తే ఇది సురక్షితమే. అయినప్పటికీ, ఇందులోని అన్ని పదార్థాలు ప్రతి కుక్కకు సరిపోతాయని చెప్పలేం. కాబట్టి ఉత్పత్తిపై ఉన్న పదార్థాల జాబితాను పరిశీలించి, అవసరమైతే పశువైద్యుడి సలహా తీసుకోవాలి. ముఖ్యంగా గుర్తుంచుకోవాల్సిన విషయం ఏమిటంటే.. కుక్కలకు సాధారణ బీర్ లేదా ఇతర ఆల్కహాల్ పానీయాలను ఎట్టి పరిస్థితుల్లోనూ ఇవ్వకూడదు. వాటికి దాహం తీర్చడానికి స్వచ్ఛమైన నీరే ఉత్తమమైన ఎంపిక.
బీర్ తాగితే కుక్కల్లో కనిపించే లక్షణాలు ఇవే
కుక్కలు పొరపాటున ఆల్కహాల్ తాగితే వాటి ప్రవర్తన మారుతుంది. నడవడంలో, నిలబడటంలో ఇబ్బంది పడతాయి. అయోమయంగా ప్రవర్తించడం, సమతుల్యత కోల్పోవడం, నీరసంగా ఉండటం, ఎక్కువగా నిద్రమత్తులో కనిపించడం, శ్వాస నెమ్మదించడం, శరీర ఉష్ణోగ్రత తగ్గిపోవడం, రక్తంలో చక్కెర స్థాయులు తగ్గడం, శరీరం వణకడం, తీవ్రమైన సందర్భాల్లో ఫిట్స్ రావడం వంటి లక్షణాలు కనిపిస్తే ఆలస్యం చేయకుండా వెటర్నరీ డాక్టర్‌ వద్దకు తీసుకెళ్లాలి. ఆల్కహాల్ ప్రభావంతో శరీరంలో నీటి శాతం, ఎలక్ట్రోలైట్ల సమతుల్యత దెబ్బతింటుంది. పరిస్థితి తీవ్రంగా మారితే ప్రాణాపాయం ఏర్పడే అవకాశం ఉంది.
కుక్క పొరపాటున బీర్ తాగితే ఏం చేయాలి?
మీ పెంపుడు కుక్క బీర్ తాగినట్లు గుర్తిస్తే నిర్లక్ష్యం చేయకూడదు. వెంటనే పశువైద్యుడిని సంప్రదించాలి. కుక్కలో మత్తు లక్షణాలు కనిపిస్తే ఆలస్యం చేయకుండా వెటర్నరీ ఆసుపత్రికి తీసుకెళ్లాలి. వాంతులు చేయించడానికి ఇంట్లోనే ప్రయత్నించకూడదు. పశువైద్యుడు సూచించినప్పుడు మాత్రమే అలా చేయాలి. అలాగే కుక్కను పడుకోబెట్టి నిద్రపోతే మత్తు తగ్గుతుందని భావించడం ప్రమాదకరం. ఆసుపత్రిలో కుక్క పరిస్థితిని బట్టి ద్రవాలు అందించడం, రక్తంలో చక్కెర స్థాయులను నియంత్రించడం, శరీర ఉష్ణోగ్రతను పర్యవేక్షించడం వంటి చికిత్సలు అందిస్తారు.