YS Sharmila Khammam Public Meeting: ఖమ్మం గడ్డపై సంకల్ప సభ.. కేసీఆర్ టార్గెట్‌గా వాక్భాణాలు సంధించిన వైఎస్ షర్మిల..

ఖమ్మంలో వైఎస్ షర్మిల నిర్వహించిన సంకల్ప సభ ముగిసింది. ఈ సభకు భారీ ఎత్తున ప్రజలు తరలి వచ్చారు. సభా వేదికగా ప్రసంగించిన షర్మిల తెలంగాణ ముఖ్యమంత్రి కేసీఆర్‌పై సంచలన ఆరోపణలు చేశారు. షర్మిల ప్రసంగం అంతా కేసీఆర్ టార్గెట్‌గానే సాగింది. కేసీఆర్ హామీలు, పాలనా విధానం, అవినీతి, హత్యలు, ఉద్యోగాలు, నీళ్లు వంటి అంశాలను ఒక్కొక్కటిగా ప్రస్తావిస్తూ కేసీఆర్‌ పాలనా విధానాలను తూర్పారబట్టారు.

పార్టీ ఏర్పాటుపై వైఎస్ షర్మిల సంచలన ప్రకటన చేశారు. సింహం సింగిల్‌గా వస్తుందన్న షర్మిల.. జులై 8వ తేదీన కొత్త పార్టీని ఆవిష్కరించబోతున్నామని ప్రకటించారు. అదే రోజుల పార్టీ జెండాను కూడా ఆవిష్కరించడం జరుగుతుందన్నారు.

తెలంగాణ ప్రత్యేక రాష్ట్రం ఏర్పడిన తరువాత కేసీఆర్ కుటుంబానికే నిధులు, నియామకాలు దక్కాయని వైఎస్ షర్మిల దుయ్యబట్టారు. నీళ్లు, నిధులు, నియామకాల పేరుతో ప్రజలను మభ్యపెట్టారని అన్నారు. స్వరాష్ట ఫలాలు ప్రగతి భవన్‌ గేటు దాటి సామాన్యులకు ఎక్కడ చేరుతున్నాయి? అని ఆమె ప్రశ్నించారు. రైతులకు రుణమాఫీ వాగ్దానం చేసిన కేసీఆర్.. రుణమాఫీ చేశారా? అని ప్రశ్నించారు. రైతుల పేరుమీద అప్పులు చేసి వారి జేబులు నింపుకున్నారంటూ కేసీఆర్ టార్గెట్‌గా తీవ్ర ఆరోపణలు చేశారు.

తెలంగాణ ప్రజల ఆత్మగౌరవం దొరగారి ఎడమకాలి చెప్పుకింద నలిగిపోతోందని వైఎస్ షర్మిల తీవ్ర వ్యాఖ్యలు చేశారు. భౌతికంగా తెలంగాణను సాధించుకున్నా.. ఆకాంక్షలు మాత్రం నెరవేరలేదని అన్నారు. తెలంగాణ రాష్ట్రంలో జరుగుతున్న ఆత్మహత్యలకు కారణం ఎవరు? అని షర్మిల ప్రశ్నించారు. ముస్లింలకు 12 శాతం రిజర్వేషన్లు ఇచ్చారా? అని నిలదీశారు. ప్రజల సమస్యలు వినే ఓపిక ఇప్పటి నేతలను ఉందా? అని ప్రశ్నించారు. తాను వెళ్లని సచివాలయాన్ని సీఎం కూలగొట్టించారని షర్మిల మండిపడ్డారు. ఉద్యోగాలు రావడం లేదని సునీల్ నాయక్ ఆత్మహత్య చేసుకున్నాడని అన్నారు. ఇంటికో ఉద్యోగం ఇస్తామన్నారు.. ఉద్యోగం లేదు.. యువతకు ఉపాధి లేదు అని విమర్శించారు. పేద ప్రజలకు ఆరోగ్యం కరువైందని, 108ని నిర్లక్ష్యం చేశారన్నారు.

తెలంగాణలో అవినీతి రాజ్యమేలుతోందని, ఆ అవినీతిని, అరాచకాలను ప్రశ్నించడానికే తాను పార్టీ పెట్టి ప్రజల ముందుకు వస్తున్నానని వైఎస్ షర్మిల అన్నారు.

ప్రతి రైతు రాజు కావాలనే ఉద్దేశంతో వైఎస్ఆర్ జలయజ్ఞానికి శ్రీకారం చుట్టారని వైఎస్ షర్మిల అన్నారు. 16 లక్షల ఎకరాల భూమి సాగు చేయడమే లక్ష్యంగా ప్రాణహిత-చేవెళ్ల ప్రాజెక్టుకు శ్రీకారం చుట్టారని పేర్కొన్నారు. రూ. 38 వేల కోట్లతో పూర్తయ్యే ప్రాజెక్టును రీడిజైన్ల పేరుతో లక్ష కోట్లకు పైగా వ్యయం పెంచారని, ఇది అవినీతిలో భాగమే అని ముఖ్యమంత్రి కేసీఆర్‌పై వైఎస్ షర్మిల సంచలన ఆరోపణలు చేశారు. ప్రాజెక్టుల పేరుతో అవినీతికి పాల్పడుతున్నారని అన్నారు. వీటన్నింటిని ప్రశ్నించడానికి, నిలదీయడానికి పార్టీ అవసరం అని షర్మిల పేర్కొన్నారు.

ఖమ్మంలోని పెవిలియన్ గ్రౌండ్‌లో షర్మిల చేపట్టిన సంక్పల సభకు ప్రజలు పోటెత్తారు. ఈ సభలో ప్రజలనుద్దేశించి ప్రసంగించిన షర్మిల.. కీలక వ్యాఖ్యలు చేశారు. ఉద్యమాల గుమ్మం ఖమ్మం.. అని నినదించారు. 18 ఏళ్ల క్రితం ఇదే రోజు చేవెళ్లలో వైఎస్ఆర్ పాదయాత్ర మొదలైందని షర్మిల గుర్తు చేశారు. అన్ని వర్గాలకు భరోసా ఇస్తూ వైఎస్ఆర్ ముందుకు సాగారని అన్నారు.

వైఎస్ఆర్‌ను మీ గుండెల్లో పెట్టుకున్నందుకు ధన్యవాదాలు అని వైఎస్ విజయమ్మ ప్రజలను ఉద్దేశించి అన్నారు. ఇక్కడి ప్రజలతో తమకు ఉన్న అనుబంధం చెరిగిపోనిది అని అన్నారు. తన గొంతులో ప్రాణం ఉన్నంత వరకు ఇక్కడి ప్రజలకు రుణపడి ఉంటామన్నారు. కుల, మత, ప్రాంతాలు వైఎస్ఆర్ ప్రేమకు అడ్డుకాలేదన్నారు. మనుషుల్లో ఎందుకు తేడాలని వైఎస్ఆర్ తన పాలనను సాగించారని పేర్కొన్నారు. వైఎస్ఆర్ ప్రతి ఒక్కరి కోసం ఆలోచన చేశారన్నారు.

ప్రజా సేవకై తన తండ్రి వైఎస్ రాజశేఖర్ రెడ్డి బాటలో నడవాలని నిర్ణయించుకున్న వైఎస్ షర్మిలను ఆశీర్వదించాలని ప్రజలను వైఎస్ విజయమ్మ కోరారు. ప్రజా సంక్షేమమే ధ్యేయంగా, ప్రజల సమస్యలు తీర్చడమే లక్ష్యంగా షర్మిల ముందుకు కదులుతారని పేర్కొన్నారు.

వైఎస్ రాజశేఖర్ రెడ్డిపై చెక్కు చెదరని అభిమానం చూపుతున్న ప్రజలందరికీ మనస్పూర్తిగా కృతజ్ఞతలు తెలియజేస్తున్నానని వైఎస్ విజయమ్మ అన్నారు.

సరిగ్గా 18 సంవత్సరాల క్రితం ఏప్రిల్ 9వ తేదీన అంటే ఇదే రోజున తెలంగాణలోని చేవెళ్ల నుంచి ప్రజాప్రస్థానం పేరుతో డాక్టర్ వైఎస్ రాజశేఖర్ రెడ్డి పాదయాత్ర చేపట్టారని వైఎస్ విజయమ్మ గుర్తు చేశారు. మళ్లీ అదే తేదీన షర్మిల తన ప్రస్థానాన్ని ప్రారంభించబోతున్నారని విజయమ్మ పేర్కొన్నారు.

ఖమ్మంలో జరుగుతున్న సంకల్ప సభలో ఉద్వేగభరిత పరిణామం చోటు చేసుకుంది. వైఎస్ రాజశేఖర్ రెడ్డి విగ్రహానికి నివాళులర్పించి సభా ప్రాంగాణానికి చేరుకుంటున్న సందర్భంలో వైఎస్ షర్మిలను విజయమ్మ హత్తుకున్నారు. ఆ సందర్భంగా ఆమె కాస్త ఉద్వేగానికి గురయ్యారు.

ఖమ్మంలో జరుగుతున్న సంకల్ప సభ ప్రాంగాణానికి వైఎస్ షర్మిల, వైఎస్ విజయమ్మ చేరుకున్నారు. ఆ సందర్భంగా అక్కడ ఏర్పాటు చేసిన వైఎస్ రాజశేఖర్ రెడ్డి విగ్రహానికి పూలమాల వేసి నివాళులర్పించారు.

ఖమ్మం పట్టణంలోని పెవిలియన్స్ గ్రౌండ్ వేదికగా జరుగుతున్న సంకల్ప సభా ప్రాంగాణానికి వైఎస్ షర్మిల, వైఎస్ విజయమ్మ చేరుకున్నారు.