Telangana: పసి ప్రేమకు పరవశించిన మూగ మనసు.. అక్కచెల్లెళ్లకు నీడలా మారిన ఉడుత పిల్ల

మానవులతో మూగజీవాల బంధం విడదీయలేదని మరోసారి నిరూపించిన సంఘటన ఇది.. సాధారణంగా మనుషుల అలికిడి వింటేనే ఉడతలు చెట్లపైకి పరుగులు తీస్తుంటాయి. కానీ యాదాద్రి జిల్లా మోత్కూరులో ఓ ఉడత పిల్ల మాత్రం ముగ్గురు చిన్నారుల వెంట నీడలా తిరుగుతోంది. రెండు నెలల క్రితం ప్రాణాపాయ స్థితిలో ఉన్న ఆ ఉడత పిల్లను రక్షించిన అక్కాచెల్లెళ్ల ప్రేమకు అది ముగ్దురాలైపోయింది. అప్పటి నుంచి వారు ఎక్కడికి వెళ్తే అక్కడికి వెళ్తూ వారి వెంటే ఉంటూ తన కృతజ్ఞతను చాటుకుంటోంది.

Telangana: పసి ప్రేమకు పరవశించిన మూగ మనసు.. అక్కచెల్లెళ్లకు నీడలా మారిన ఉడుత పిల్ల
Squirrels Unbreakable Bond

Edited By:

Updated on: Nov 21, 2026 | 8:24 AM

సాధారణంగా మనుషులను చూడగానే మాయమైపోయే జీవి అది.. కాస్త అలికిడైనా చాలు చెంగున చెట్టుపైకి దూకేసే ప్రాణి అది.. కానీ ఇక్కడ మాత్రం సీన్ రివర్స్. వారిని చూడగానే దానికి ఎక్కడ లేని ప్రాణం వచ్చేస్తుంది. వాళ్ల ఒడిలో వాలిపోతుంది.. వాళ్లు పెట్టే ఆహార పదార్థాలను ఎంతో ఇష్టంగా ఆరగిస్తుంది. అంతటితో ఆగకుండా, ఆ చిచ్చరపిడుగులు ఎక్కడికి వెళ్తే.. అక్కడికి నేను కూడా వస్తా అంటూ వాళ్లతో వెంటే ప్రయాణమవుతోంది.

యాదాద్రి జిల్లా మోత్కూరుకు చెందిన లక్ష్మీప్రసన్న, అంజలి, చైత్ర అనే ముగ్గురు అక్కా చెల్లెల్లు స్థానిక ప్రైవేటు పాఠశాలలో చదువుకుంటున్నారు. అయితే రెండు నెలల క్రితం స్కూల్ నుండి ఇంటికి వస్తుండగా, వాళ్లకు మార్గ మధ్యలో కట్టెల మధ్య చిక్కుకుని విలవిలలాడుతున్న ఉడత పిల్ల కనిపించింది. ప్రాణాపాయ స్థితిలో ఉన్న ఆ మూగజీవిని చూసి చిన్ని మనసులు ద్రవించి పోయాయి. వెంటనే దాన్ని రక్షించి, ఇంటికి తెచ్చుకున్నారు. అప్పటి నుంచి దానికి కంటికి రెప్పలా చూసుకుంటూ ఆహారం అందిస్తూ, అప్యాయతతో పెంచడం ప్రారంభించారు.

ఆ అక్కా చెల్లెలు చూపించిన ప్రేమానురాగాలకు ఉడత పిల్ల పూర్తిగా దాసోహమైపోయింది. ఇప్పుడు ఆ ముగ్గురితో ఎంతో చనువుగా మారిపోయింది. వాళ్లు ఎక్కడికి వెళ్తే అక్కడికి వాలుతోంది. తలలపై ఎక్కుతూ, భుజాలపై తిరుగుతూ తెగ సందడి చేస్తోంది. చివరికి వాళ్లు పాఠశాలకు వెళ్తున్నా సరే.. పుస్తకాల సంచితో పాటు తాను కూడా బడి బాట పడుతోంది.

ఆ ముగ్గురు చిన్నారుల సేవాతత్పరతను, ఆ ఉడత పిల్ల చూపిస్తున్న కృతజ్ఞతను చూసి మోత్కూరు ప్రజలు మురిసిపోతున్నారు. ప్రకృతిలో మనుషులకు, జంతువులకు మధ్య ఉండే నిష్కల్మషమైన ప్రేమకు ఈ అపురూపమైన జీవన బంధం సజీవ సాక్ష్యంగా నిలుస్తోంది. జీవకారుణ్యానికి ప్రతీకగా నిలిచిన ఈ ఉడత భక్తి.. ఇప్పుడు సోషల్ మీడియాలోనూ తెగ వైరల్ అవుతోంది.

మరిన్ని తెలంగాణ వార్తల కోసం ఇక్కడ క్లిక్ చేయండి.

Loading...
Unable to load recommendations.
Follow Us