Hanmakonda Man Arrested: ఢిల్లీ మైనర్‌ బాలికను హన్మకొండకు రప్పించి అత్యాచారం.. మధురైలో అరెస్టు..!
Hanmakonda Man Arrested: ఢిల్లీ బాలికపై తెలంగాణ రాష్ట్రంలోని హన్మకొండకు చెందిన ఓ వ్యక్తి లైంగిక దాడికి పాల్పడ్డాడు. ఇన్‌స్టాగ్రామ్‌లో పరిచయమైన ఆ బాలికను...
Hanmakonda Man Arrested: ఢిల్లీ బాలికపై తెలంగాణ రాష్ట్రంలోని హన్మకొండకు చెందిన ఓ వ్యక్తి లైంగిక దాడికి పాల్పడ్డాడు. ఇన్‌స్టాగ్రామ్‌లో పరిచయమైన ఆ బాలికను ఢిల్లీ నుంచి హన్మకొండకు రప్పించి ఈ దారుణానికి పాల్పడ్డాడు. చివరికి బాధితురాలి తల్లిదండ్రులు పోలీసులకు ఫిర్యాదు చేయడంతో ఆ వ్యక్తిని అరెస్టు చేశారు.
పోలీసులు తెలిపిన వివరాల ప్రకారం… హన్మకొండ రెడ్డి కాలనీకి చెందిన నూనె మురళీకృష్ణ డిగ్రీ పూర్తి చేసి ఖాళీగా తిరుగుతున్నాడు. ఈ క్రమంలో ఢిల్లీకి చెందిన పదో తరగతి చదువుతున్న 16 ఏళ్ల బాలికతో ఇన్‌స్టాగ్రామ్‌లో రెండు సంవత్సరాల కిందట పరిచయం ఏర్పడింది. ఏర్పడిన పరిచయం ప్రేమగా మారింది. రెండు నెలల కిందట సదరు బాలికను మురళీకృష్ణ హన్మకొండకు పిలిపించి తన గదిలో బంధించి అత్యాచారానికి పాల్పడ్డాడు.
అయితే ఇంట్లో తన కుమార్తె కనిపించకపోవడంతో తల్లిదండ్రులు ఆందోళనకు గురై ఢిల్లీ రాణిగంజ్‌ పోలీసు స్టేషన్‌లో ఫిర్యాదు చేశారు. అక్కడి పోలీసులు మిస్సింగ్‌ కేసుగా నమోదు చేసుకుని దర్యాప్తు చేపట్టారు. బాలిక ఫోన్‌కు హన్మకొండలో ఉంటున్న మురళీకృష్ణ ఫోన్‌ నుంచి తరుచుగా కాల్స్‌ వచ్చినట్లు పోలీసులు గుర్తించారు.
కాగా, జీరో ఎఫ్‌ఐఆర్‌ కింద కేసును హన్మకొండకు మార్చారు. బాలిక తల్లిదండ్రులు ఈనెల 14న హన్మకొండకు వచ్చి నేరుగా పోలీసులకు ఫిర్యాదు చేశారు. అయితే ఇక్కడ ఉంటే పోలీసులకు పట్టుబడతానని గమనించిన మురళీ కృష్ణ.. బాలికను వేరే చోటుకు తీసుకెళ్లాడు.
ఆ తర్వాత ఫోన్‌ సిగ్నల్స్‌ ఆధారంగా ప్రత్యేక పోలీసు బృందాలు రంగంలోకి దిగాయి. తమిళనాడులోని మధురైలో ఉన్నట్లు గుర్తించిన పోలీసులు.. మురళీకృష్ణను అదుపులోకి తీసుకున్నారు. పోలీసుల విచారణలో చేసిన తప్పును అంగీకరించినట్లు పోలీసులు తెలిపారు. నిందితుడిపై అత్యాచారం కేసు నమోదు చేసి బాలికను తల్లిదండ్రులకు అప్పగించినట్లు పోలీసులు వెల్లడించారు.