Telangana Rains: జూన్‌ రెండోవారంలో తెలంగాణకు నైరుతి రాక..! ఈసారి కాస్త ఆలస్యంగానే
తెలంగాణ రాష్ట్రంలో నైరుతి రుతుపవనాలు జూన్‌ రెండో వారంలో ప్రవేశించనున్నట్లు హైదరాబాద్‌ వాతావరణ శాఖ అంచనావేస్తోంది. ఈనెల మొదటి వారంలో కేరళను తాకనున్న నైరుతి రుతుపవనాలు క్రమంగా ముందుకు సాగుతూ..
హైదరాబాద్‌: తెలంగాణ రాష్ట్రంలో నైరుతి రుతుపవనాలు జూన్‌ రెండో వారంలో ప్రవేశించనున్నట్లు హైదరాబాద్‌ వాతావరణ శాఖ అంచనావేస్తోంది. ఈనెల మొదటి వారంలో కేరళను తాకనున్న నైరుతి రుతుపవనాలు క్రమంగా జూన్‌ రెండో వారం నాటికి తెలంగాణను తాకే అవకాశం ఉంది. రుతుపవనాలు ప్రవేశించడంతో ఎండలు తగ్గుముఖం పట్టే అవకాశం ఉన్నట్టు తెలిపింది. బుధవారం పలు జిల్లాల్లో పగటి గరిష్ఠ ఉష్ణోగ్రతలు 40 డిగ్రీలకు పైగా నమోదయ్యాయి. నల్లగొండలో 41.5, నిజామాబాద్‌ 40.9, భద్రాచలం, మెదక్‌ జిల్లాల్లో 40.8 చొప్పున, ఆదిలాబాద్‌లో 40.3, హైదరాబాద్‌లో 38.9 డిగ్రీలు నమోదైంది.
గత రెండు సీజన్లలో పోల్చితే ఈసారి కాస్త ఆలస్యంగానే రుతుపవనాలు రానున్నాయి. 2021లో నైరుతి రుతుపవనాలు మే నెలాఖరులోనే కేరళను తాకగా, జూన్‌ మొదటి వారంలో రాష్ట్రాన్ని తాకాయి. ఇక గతేడాది మే 30న రుతుపవనాలు కేరళను తాకగా.. జూన్‌ 8కి రాష్ట్రానికి చేరాయి. ఈ రెండు సీజన్లతో పోలిస్తే ఈసారి ఐదు రోజులు ఆలస్యంగా రానున్నట్లు వాతావరణ శాఖ అధికారులు భావిస్తున్నారు. గత రెండేళ్లుగా రాష్ట్రంలో సాధారణ వర్షపాతం పరిశీలిస్తే.. 50 శాతం అధిక వర్షాలు కురిశాయి. 2021లో రాష్ట్రంలో 111.5 సెంటీమీటర్ల వర్షపాతం నమోదు కాగా, 2022 సీజన్‌లో 109.8 సెంటీమీటర్ల వర్షపాతం నమోదైంది. అధిక వర్షాల కారణంగా రాష్ట్రంలో చెరువులు, కుంటలు నీటితో కళకళలాడాయి.
నేడు రేపు చెదురుమదురుగా వర్షాలు
పశ్చిమ విదర్భ నుంచి మరాఠ్వాడ, ఉత్తర కర్ణాటక మీదుగా దక్షిణ తమిళనాడు వరకు ఏర్పడిన ఉపరితలద్రోణి స్థిరంగా కొనసాగుతున్నట్లు వాతావరణ శాఖ తెలిపింది. ఇది సముద్రమట్టం నుంచి సగటున 0.9 కిలోమీటర్ల ఎత్తు వద్ద ఉంది. దీని ప్రభావంతో రాష్ట్రంలో గురు, శుక్రవారాల్లో అక్కడక్కడా చెదురుమదురుగా, కొన్ని చోట్ల తేలికపాటి నుంచి మోస్తరు వర్షాలు కురిసే అవకాశం ఉన్నట్లు వాతావరణ శాఖ వెల్లడించింది. చిరుజల్లులను చూసి తొందరపడి రైతులు విత్తనాలు విత్తుకోవద్దని వాతావరణ శాఖ సూచించింది.
మరిన్ని తెలంగాణ వార్తల కోసం క్లిక్‌ చేయండి.