చిన్నారి ప్రాణాలను కాపాడిన ట్వీట్..హ్యాట్సాఫ్ టూ కేటీఆర్..

తెలంగాణ మంత్రి కేటీఆర్ సోషల్ మీడియాలో ఎంత యాక్టివ్‌గా ఉంటారో అందరికీ తెలిసిందే. ఆపదలో ఉన్నవారు కేటీఆర్‌కు ఓ ట్వీట్ చేస్తే చాలు.. సమస్యకు పరిష్కారం లభిస్తోందని అంతా అభిప్రాయం. డైరక్ట్‌గా మంత్రి కేటీఆర్‌ను కలవలేని వారు.. చాలా మంది ట్విట్టర్‌ ద్వారా వారి విన్నపాలను పంచుకుంటారు. వాటిని చూసిన మంత్రి.. వెంటనే రిప్లై ఇస్తూ.. సమస్యలకు పరిష్కారం చూపిస్తూ సహాయం చేస్తుంటారు. తాజాగా మరో సారి తన ఔదార్యాన్ని చాటుకున్నారు మంత్రి కేటీఆర్.

నల్గొండ జిల్లా మిర్యాలగూడకు చెందిన ఓ చిన్నారి ప్రమాదవషాత్తు బిల్డింగ్‌పై నుంచి కింద పడింది. వారం రోజుల క్రితం జరిగిన ఈ ఘటనలో చిన్నారి తీవ్ర గాయాలపాలయ్యింది. దీంతో వెంటనే ఆ చిన్నారిని హైదరాబాద్‌ బంజారాహిల్స్‌లోని ఓ ఆసుపత్రిలో చేర్పించారు. అయితే బాధితులు నిరుపేద కుటుంబానికి చెందిన వారు కావడంతో.. చిన్నారి వైద్యానికి డబ్బులు కట్టలేని పరిస్థితి నెలకొంది. ఈ విషయాన్ని గమనించిన ఓ యువకుడు.. మంత్రి కేటీఆర్‌కు ట్విట్టర్‌ ద్వారా ఈ చిన్నారి విషయాన్ని తెలియజేశారు. మెరుగైన చికిత్స కోసం ఆదుకోవాలని కోరాడు.

ఈ ట్వీట్‌ను గమనించిన కేటీఆర్.. వెంటనే చిన్నారి వైద్య ఖర్చులకు ఆర్థిక సాయం చేయాలని అధికారులను ఆదేశించారు. సీఎం క్యాంప్ ఆఫీస్ అధికారులు వెంటనే సీఎం రిలీఫ్ ఫండ్ రూ.3.50 లక్షలను అందజేశారు. సమయానికి చికిత్స అందించడంతో.. ప్రస్తుతం చిన్నారి క్షేమంగా ఉందని.. ట్విట్టర్‌లో పెట్టిన మా అభ్యర్థనను చూసి ఆదుకున్న మంత్రికి ధన్యవాదాలంటూ మళ్లీ ఆ యువకుడు ట్వీట్ చేశాడు. ఆ చిన్నారి చికిత్స పొందిన ఫోటోను కూడా జతచేశాడు. ఆ చిన్నారి ఫోటోను చూసిన కేటీఆర్.. “సోదరా.. ఈ రోజును పరిపూర్ణం చేశావు. చిన్నారిని సాయం చేయడం ఆనందంగా ఉంది” అంటూ రీప్లై ఇచ్చారు.

You made my day brother. Delighted be of some assistance to the little girl ? https://t.co/4TqOnuwNdW

— KTR (@KTRTRS) February 29, 2020