Auto Tips: వామ్మో ఇంత టెక్నిక్‌ ఉందా? కారు వెనుక అద్దంపై ఎరుపు రంగు గీతలు ఎందుకు ఉంటాయో తెలుసా?

ద్విచక్ర వాహనాలు లేదా నాలుగు చక్రాల వాహనాలు నేడు మానవ జీవితంలో ముఖ్యమైన భాగంగా మారాయి. ఈ రోజుల్లో చాలా మంది ప్రజలు వాహనాలతో ఎక్కువగా ప్రయాణిస్తున్నారు. అదే విధంగా మీరు తరచుగా రోడ్డు మీద ప్రయాణిస్తున్న కార్ల వెనుక అద్దాలపై కొన్ని ఎర్రటి గీతలు చూసి ఉంటారు. సాధారణంగా ఈ రెడ్ లైన్లు అన్ని కార్లలో ఉండవు. నిర్దిష్ట మోడల్ టాప్ వేరియంట్ లేదా మిడ్ వేరియంట్ కొన్ని కార్లలో మాత్రమే కనిపిస్తుంది. ఇది ఎందుకు అని మీరు ఎప్పుడైనా ఆలోచించారా..? దీని వెనుక కారణం ఏంటో తెలుసా..?

ఈ రెడ్ లైన్స్ ఎందుకు..?

ఈ లైన్లు కార్ల వెనుక అద్దాలపై (విండ్‌షీల్డ్) ఉంటాయి. చాలా మంది వీటిని స్టైల్ లేదా డిజైన్ స్టిక్కర్లుగా భావిస్తారు. అయితే, ఈ రెడ్ లైన్లు డిజైన్ స్టిక్కర్లు కావు. ఇది భద్రతా ప్రయోజనం కోసం. ఇది కారును సురక్షితంగా నడపడానికి సహాయపడుతుంది. కారు రియర్ వ్యూ మిర్రర్ పై ఉండే ఈ రెడ్ లైన్స్ మెటల్ తో చేసిన వైర్లు. దీనిని ‘డీఫాగర్ గ్రిడ్ లైన్’ (డీఫాగర్) లేదా ‘డీఫ్రాస్టర్ గ్రిడ్ లైన్’ (డీఫ్రాస్టర్లు) అంటారు.

రెడ్ లైన్స్ ఏం చేస్తాయి..?

సాధారణంగా చలి, వర్షాకాలంలో మంచు, వర్షపు చుక్కలు కారు వెనుక కిటికీలపై పడుతుంటాయి. అందువల్ల కారు నడుపుతున్న డ్రైవర్ వెనుక చూసే అద్దం నుండి వెనుక నుండి వస్తున్న వాహనాలను స్పష్టంగా చూడలేడు. దీంతో ప్రమాదాలు ఎక్కువగా జరిగే అవకాశం ఉంది. ఈ సమస్యలను నివారించడానికి ఈ రెడ్ లైన్లు చాలా ఉపయోగకరంగా ఉంటాయి.

అంటే వెనుక అద్దాలపై ఉన్న ఈ ఎరుపు గీతల లోపల ఉన్న వైర్లు మంచు, వర్షం నుండి నీటిని త్వరగా తొలగిస్తాయి. అంటే ఈ డిఫ్రాస్టర్ గ్రిడ్ లైన్‌ని ఉపయోగించడానికి కారు డాష్‌బోర్డ్‌లో స్విచ్ ఉంటుంది. మంచు లేదా వర్షపు నీరు వెనుక గాజును పూర్తిగా కప్పినప్పుడు ఈ స్విచ్ ఆన్ చేయాలి. అప్పుడు ఈ రెడ్ లైన్లలోని వైర్లకు విద్యుత్ ప్రవహించి వేడెక్కుతుంది. ఆ సమయంలో మంచు, నీటి బిందువులు వేడెక్కి ఆవిరైపోతాయి. దీనితో పాటు, డ్రైవర్ వెనుక విండో ద్వారా కూడా వెనుక చూసే అద్దం స్పష్టంగా చూడగలడు. కారు వెనుక గ్లాస్‌పై ఉండే ఈ లైన్లు వర్షాకాలం, శీతాకాల ప్రయాణాలలో సమస్యలను నివారించడానికి సహాయపడతాయి.

మరిన్ని బిజినెస్ వార్తల కోసం ఇక్కడ క్లిక్ చేయండి