పిచ్చెక్కించే సౌండ్‌తో మార్కెట్‌లోకి నోయిస్ మాస్టర్‌ బడ్స్ ఓపెన్.. ధర, ఫీచర్లు చూస్తే కొనేయాల్సిందే
రోజంతా ఇయర్‌బడ్స్ వాడేవారికి చెవుల్లో ఎక్కువసేపు పెట్టుకోవడం కొన్నిసార్లు అసౌకర్యంగా అనిపిస్తుంది. ఈ సమస్యకు భిన్నమైన పరిష్కారాన్ని చూపించేందుకు Noise కొత్త రకం బడ్స్‌ను తీసుకొచ్చింది. Noise Master Buds Open పేరుతో వస్తున్న ఇవి చెవి లోపలికి వెళ్లకుండా బయట భాగంలో అమరుతాయి. Sound by Bose సాంకేతికత ఉండటం వీటి ప్రత్యేక ఆకర్షణగా నిలుస్తోంది.
పాటలు వింటూనే చుట్టుపక్కల ఏం జరుగుతుందో తెలుసుకోవాలనుకునేవారికి ఈ బడ్స్ ఉపయోగపడతాయి. Noise Master Buds Openలో చెవి బయట సులభంగా అమరే ప్రత్యేక ఆకృతిని అందించారు. 10.8mm డ్రైవర్లు, నాలుగు మైక్రోఫోన్లు, Bluetooth 5.4, 28 గంటల బ్యాటరీ బ్యాకప్ వంటి సదుపాయాలతో వచ్చిన ఇవి ప్రస్తుతం ముందస్తు బుకింగ్‌కు అందుబాటులో ఉన్నాయి.
ప్రత్యేక ఆకృతి
Noise Master Buds Openలో సాధారణ ఇయర్‌బడ్స్‌కు భిన్నంగా C-Bridge ఆకృతిని ఉపయోగించారు. ఇవి చెవి లోపలికి వెళ్లకుండా బయట భాగంలో అమరుతాయి. దీంతో పాటలు వింటున్న సమయంలోనూ చుట్టుపక్కల శబ్దాలు వినిపిస్తాయి. రోడ్డుపై ప్రయాణించేటప్పుడు, కార్యాలయంలో పనిచేసేటప్పుడు పరిసరాలపై అవగాహన కొనసాగించేందుకు ఈ విధానం ఉపయోగపడుతుంది. ఎక్కువసేపు ధరించినా చెవుల్లో ఇబ్బంది తగ్గేలా వీటిని రూపొందించారు.
మంచి శబ్ద నాణ్యత కోసం 10.8mm డైనమిక్ డ్రైవర్లను అందించారు. Bose ఆడియో సర్దుబాటుతో శబ్దాన్ని మరింత మెరుగ్గా అందించే ప్రయత్నం చేశారు. వినే పాటలు, ఇతర కంటెంట్‌కు అనుగుణంగా ఆడియోను మార్చుకునేందుకు ఆరు రకాల ముందస్తు సెట్టింగులు ఉన్నాయి. Noise యాప్ ద్వారా కూడా శబ్దాన్ని మన అభిరుచికి తగ్గట్టుగా మార్చుకోవచ్చు. కాల్స్ సమయంలో బయట శబ్దం తగ్గించేందుకు నాలుగు మైక్రోఫోన్లతో ENC సాంకేతికతను ఉపయోగించారు.
28 గంటల బ్యాటరీ..
కనెక్టివిటీ కోసం Bluetooth 5.4 అందించారు. ఒకేసారి రెండు పరికరాలకు అనుసంధానం చేసుకునే సదుపాయం ఉండటంతో ఫోన్, ల్యాప్‌టాప్ మధ్య సులభంగా మారవచ్చు. Android ఫోన్ల కోసం Fast Pair సదుపాయం కూడా ఉంది. బ్యాటరీ విషయానికి వస్తే ఛార్జింగ్ పెట్టెతో కలిపి మొత్తం 28 గంటల వరకు పాటలు వినొచ్చు. వేగవంతమైన ఛార్జింగ్ సదుపాయం ఉండటంతో తక్కువ సమయంలోనే మళ్లీ ఉపయోగించుకోవచ్చు.
Noise Master Buds Open ప్రారంభ ధర రూ.7,999గా ఉంది. Carbon, Mercury అనే రెండు రంగుల్లో లభిస్తున్నాయి. ప్రస్తుతం Noise అధికారిక వెబ్‌సైట్‌లో ముందస్తు బుకింగ్ చేసుకోవచ్చు. అక్టోబర్ 23 నుంచి Amazon, Croma, Reliance Digital, Vijay Sales వంటి విక్రయ వేదికల్లో అందుబాటులోకి రానున్నాయి.