టయోటా ఫార్చ్యూనర్కి షాకిచ్చేలా మార్కెట్లోకి దూసుకొస్తున్న కొత్త ఎస్యూవీ.. ఒక్కసారి ఛార్జ్ చేస్తే
JSW Combat SUV.. భారత్లో SUVలకు పెరుగుతున్న ఆదరణతో కొత్త సంస్థలు కూడా ఈ విభాగంలోకి అడుగుపెడుతున్నాయి. ఇప్పటికే ప్రీమియం వాహనాలకు డిమాండ్ పెరుగుతున్న నేపథ్యంలో JSW గ్రూప్ తన తొలి SUVని తీసుకొచ్చేందుకు సిద్ధమవుతోంది. కాంబ్యాట్ పేరుతో రానున్న ఈ వాహనం బలమైన రూపం, ప్లగ్-ఇన్ హైబ్రిడ్ సాంకేతికతతో పండుగ సీజన్లో సందడి చేసే అవకాశం ఉంది.
ఫార్చ్యూనర్ తరహా పెద్ద SUVని కోరుకునే వారికి త్వరలో మరో ఎంపిక అందుబాటులోకి రానుంది. రూ.30 లక్షల నుంచి ప్రారంభమయ్యే అవకాశం ఉన్న ఈ వాహనం కేవలం ఆకర్షణీయమైన రూపానికే పరిమితం కాదు. శక్తివంతమైన ఇంజిన్, రెండు ఎలక్ట్రిక్ మోటార్లు, భారీ బ్యాటరీతో ఎక్కువ దూరం ప్రయాణించే సామర్థ్యం దీని ప్రత్యేకతగా నిలవనుంది.
బాక్సీ రూపంతో రఫ్ అండ్ టఫ్ లుక్
చైనాకు చెందిన చెరీ గ్రూప్ జెటూర్ T2 ఆధారంగా ఈ SUVని అభివృద్ధి చేస్తున్నట్లు తెలుస్తోంది. భారత అవసరాలకు అనుగుణంగా హెడ్ల్యాంప్స్, గ్రిల్, బంపర్లు, బ్యాడ్జింగ్లో మార్పులు చేసే అవకాశం ఉంది. బాక్సీ బాడీ, ఎత్తైన స్టాన్స్, పెద్ద బంపర్లు, విస్తృత క్లాడింగ్ దీనికి బలమైన రూపాన్ని అందిస్తాయి.
20 అంగుళాల అల్లాయ్ వీల్స్, రూఫ్ రైల్స్, నిలువు LED టెయిల్ ల్యాంప్స్, వెనుక స్పేర్ వీల్ తరహా అమరిక వంటివి ఆకర్షణ పెంచుతాయి. లోపల 15.6 అంగుళాల ఇన్ఫోటైన్మెంట్ తెర, 10.6 అంగుళాల డిజిటల్ డ్రైవర్ డిస్ప్లే ఉండొచ్చని సమాచారం. 12-స్పీకర్ సౌండ్ సిస్టమ్, వైర్లెస్ Apple CarPlay, Android Auto, పనోరమిక్ సన్రూఫ్, వెంటిలేటెడ్ ఫ్రంట్ సీట్లు కూడా లభించే అవకాశం ఉంది. 360 డిగ్రీల కెమెరాతో పాటు కారు కింద భాగాన్ని చూపించే 540-డిగ్రీ కెమెరా వ్యవస్థ ప్రత్యేక ఆకర్షణగా నిలవనుంది. Adaptive Cruise Control వంటి డ్రైవర్ సహాయక సదుపాయాలు కూడా ఉండొచ్చు.
హైబ్రిడ్ శక్తితో భారీ రేంజ్
పవర్ట్రెయిన్ విషయానికి వస్తే 1.5-లీటర్ టర్బో పెట్రోల్ ఇంజిన్తో పాటు రెండు ఎలక్ట్రిక్ మోటార్లు, 18.4kWh బ్యాటరీ కలయికను ఉపయోగించే అవకాశం ఉంది. ఇదే వ్యవస్థ జెటూర్ T2లో 360hp శక్తి, 610Nm టార్క్ అందిస్తుంది. 3-స్పీడ్ హైబ్రిడ్ ట్రాన్స్మిషన్ ద్వారా శక్తి ముందు చక్రాలకు చేరుతుంది. భారత వెర్షన్ ఫ్రంట్-వీల్ డ్రైవ్తో రావచ్చని తెలుస్తోంది.
బ్యాటరీపై ఒక్కసారి ఛార్జ్ చేస్తే 90 కి.మీ వరకు విద్యుత్ రేంజ్ లభిస్తుంది. 6.6kW AC ఛార్జర్తో 30 నుంచి 100 శాతం వరకు ఛార్జ్ చేయడానికి సుమారు మూడు గంటలు పడుతుంది. 50kW DC ఛార్జర్తో 30-80 శాతం ఛార్జింగ్కు సుమారు 27 నిమిషాలు పడుతుంది. హైబ్రిడ్ విధానంలో మొత్తం రేంజ్ 1,200 కి.మీ వరకు ఉండొచ్చని అంచనా. ధర సుమారు రూ.30 లక్షల నుంచి రూ.50 లక్షల మధ్య ఉండే అవకాశం ఉంది. అయితే అధికారిక ధర, విడుదల తేదీ వివరాలు వెల్లడికావాల్సి ఉంది.