ఎలాంటి విషయాలు సెర్చ్ చేసేటప్పుడు ఇన్కాగ్నిటో ఉపయోగించాలి? చాలా మందికి తెలియని టిప్స్
ఇంటర్నెట్ వాడే ప్రతి ఒక్కరూ తెలుసుకోవాల్సిన ఒక ప్రత్యేక బ్రౌజింగ్ ఫీచర్ ఇది. ఇది ఎప్పుడు ఉపయోగించాలి ? దీనివల్ల ఎలాంటి ప్రయోజనాలు ఉంటాయి? అలాగే చాలామందికి ఉన్న కొన్ని అపోహల వెనుక ఉన్న వాస్తవాలేంటో సులభంగా అర్థమయ్యేలా ఇప్పుడు తెలుసుకుందాం..
మనం సెర్చ్ చేసే విషయాలు.. గూగుల్ సెర్చ్ హిస్టరీలో కనిపించకుండా ఉండాలంటే.. కొన్ని మార్గాలు ఉన్నాయి. పైగా సేఫ్టీ విషయంలో కూడా ఇది చాలా యూజ్ఫుల్గా ఉంటుంది. కొన్ని విషయాలను క్రోమ్లో కాకుండా అందులోనే ఉండే ఓ స్పెషల్ బ్రౌజర్లో సెర్చ్ చేయడం వల్ల ఎక్స్ట్రా సేఫ్టీ పొందవచ్చు. ఇంటర్నెట్ బ్రౌజింగ్లో చాలా మంది సాధారణ ట్యాబ్లనే ఉపయోగిస్తుంటారు. అయితే కొన్ని ప్రత్యేక సందర్భాల్లో ప్రైవేట్ లేదా ఇన్కాగ్నిటో ట్యాబ్లను ఉపయోగించడం వల్ల అదనపు ప్రైవసీ పొందవచ్చు. అయితే చాలామందికి ఉన్న అపోహ ఏమిటంటే, ఇన్కాగ్నిటో మోడ్లో బ్రౌజ్ చేస్తే పూర్తిగా గుర్తింపు లేకుండా ఇంటర్నెట్ ఉపయోగించవచ్చని. కానీ ఇది నిజం కాదు. ఈ మోడ్ ప్రధానంగా మీ బ్రౌజింగ్ హిస్టరీ, కుకీలు, ఫారమ్ డేటా వంటి సమాచారాన్ని మీ పరికరంలో సేవ్ కాకుండా మాత్రమే నిరోధిస్తుంది.
ఉదాహరణకు ఇతరుల కంప్యూటర్ లేదా ల్యాప్టాప్ను తాత్కాలికంగా ఉపయోగించి మీ ఈమెయిల్, బ్యాంకింగ్ లేదా సోషల్ మీడియా ఖాతాల్లో లాగిన్ కావాల్సి వచ్చినప్పుడు ఇన్కాగ్నిటో మోడ్ ఉపయోగించడం మంచిది. పని పూర్తయిన తర్వాత బ్రౌజర్లో మీ లాగిన్ వివరాలు లేదా హిస్టరీ నిల్వ ఉండే అవకాశం తగ్గుతుంది. అలాగే ఒకే వెబ్సైట్లో రెండు వేర్వేరు ఖాతాలను ఒకేసారి ఉపయోగించాల్సిన అవసరం వచ్చినప్పుడు కూడా ప్రైవేట్ ట్యాబ్ ఉపయోగపడుతుంది. సాధారణ ట్యాబ్లో ఒక ఖాతా, ఇన్కాగ్నిటో ట్యాబ్లో మరో ఖాతాతో లాగిన్ కావచ్చు.
గిఫ్ట్లు, ప్రయాణ టికెట్లు లేదా సర్ప్రైజ్ కొనుగోళ్లు చేస్తున్నప్పుడు కుటుంబ సభ్యులు లేదా సహోద్యోగులు మీ బ్రౌజింగ్ హిస్టరీ చూడకుండా ఉండాలనుకుంటే కూడా ఈ మోడ్ ఉపయోగకరంగా ఉంటుంది. అదనంగా, వెబ్సైట్లో సమస్యలు వస్తున్నప్పుడు కుకీల ప్రభావం లేకుండా పరీక్షించేందుకు కూడా ఇన్కాగ్నిటో ట్యాబ్ సహాయపడుతుంది. అయితే ఇన్కాగ్నిటో మోడ్ మీ ఇంటర్నెట్ సర్వీస్ ప్రొవైడర్ (ISP), కార్యాలయం లేదా విద్యాసంస్థ నెట్వర్క్ నిర్వాహకులు, అలాగే మీరు సందర్శించే వెబ్సైట్ల నుంచి మిమ్మల్ని పూర్తిగా దాచదు. మీ ఐపీ అడ్రస్ కూడా దాచబడదు. కాబట్టి ఇది పూర్తి అనామకతను కల్పించే సాధనం కాదు. ఇన్కాగ్నిటో మోడ్ను ప్రైవసీ కోసం ఉపయోగించాలి. అంటే మీ పరికరంలో బ్రౌజింగ్ హిస్టరీ స్టోర్ కాకుండా ఇది ఉపయోగపడుతుంది. కానీ పూర్తి ఆన్లైన్ గోప్యత లేదా భద్రత కోసం బలమైన పాస్వర్డ్లు, రెండు-దశల ధృవీకరణ (2FA), విశ్వసనీయ భద్రతా పద్ధతులను కూడా తప్పనిసరిగా పాటించాలి.
మరిన్ని టెక్ వార్తల కోసం ఇక్కడ క్లిక్ చేయండి