ఎలక్ట్రిక్ బైక్ లవర్స్ కోసం దీపావళి గిఫ్ట్ తెచ్చేసిన హీరో.. Vida UBX O6 గురించి తెలిస్తే ఎగిరిగంతేస్తారు
దేశంలోనే అతిపెద్ద ద్విచక్ర వాహన తయారీ సంస్థ Hero MotoCorp ఎట్టకేలకు ఎలక్ట్రిక్ మోటార్‌సైకిల్ విభాగంలోకి అడుగుపెట్టింది. తన తొలి ఎలక్ట్రిక్ బైక్ Vida UBX 06ను EICMA 2026 వేదికగా ఆవిష్కరించింది. ఇప్పటివరకు స్కూటర్లకే పరిమితమైన కంపెనీ ఎలక్ట్రిక్ టూ-వీలర్ విభాగంలోకి ఇప్పుడు మోటార్‌సైకిల్‌ను కూడా తీసుకొస్తోంది. ‘యూబీ-ఎక్స్’గా పలికే ఈ బైక్‌ను సూపర్‌మోటో మోటార్‌సైకిళ్ల స్ఫూర్తితో రూపొందించినట్లు Hero MotoCorp ఛైర్మన్ పవన్ ముంజాల్ వెల్లడించారు.
అయితే ఈ కొత్త ఎలక్ట్రిక్ బైక్‌కు సంబంధించిన పూర్తి వివరాలను కంపెనీ ఇంకా వెల్లడించలేదు. ప్రస్తుతానికి ఆవిష్కరించిన మోడల్‌ను పరిశీలిస్తే ఇందులో ఆధునిక డిజైన్‌తో పాటు మోటార్‌సైకిల్‌కు అవసరమైన కీలక ఫీచర్లు కనిపిస్తున్నాయి. ముఖ్యంగా మిడ్-డ్రైవ్ మోటార్, ఫిక్స్‌డ్ బ్యాటరీ, చైన్ డ్రైవ్ వంటి అంశాలు ఈ బైక్‌లో ప్రత్యేకంగా నిలుస్తున్నాయి. దీని ధర, బ్యాటరీ సామర్థ్యం, రేంజ్, పవర్ వివరాలపై మరింత సమాచారం రావాల్సి ఉంది.
సూపర్‌మోటో డిజైన్‌తో Vida UBX 06
Vida UBX 06 ముందు భాగంలో LED ప్రొజెక్టర్ హెడ్‌ల్యాంప్‌ను అందించారు. దాని చుట్టూ వ్యూఫైండర్ ఆకారంలో LED డేటైమ్ రన్నింగ్ లైట్లు ఉన్నాయి. సూపర్‌మోటో బైక్‌ల తరహాలో హ్యాండిల్‌బార్‌కు నకిల్ గార్డ్స్ కూడా ఇచ్చారు. బైక్‌లో పెద్ద ఫిక్స్‌డ్ బ్యాటరీని అమర్చారు. మిడ్-డ్రైవ్ ఎలక్ట్రిక్ మోటార్ ద్వారా శక్తి అందుతుంది. వెనుక చక్రానికి చైన్ ఫైనల్ డ్రైవ్ ద్వారా పవర్ చేరుతుంది.
సస్పెన్షన్ ప్రత్యేకతలు
ఈ బైక్‌లో పెద్ద ఫుల్ కలర్ డిజిటల్ డిస్‌ప్లేను అందించారు. దీని కంట్రోల్ స్విచ్‌లను ఎడమవైపు హ్యాండిల్‌బార్‌పై అమర్చారు. క్రూయిజ్ కంట్రోల్ ఫీచర్ కూడా కనిపిస్తోంది. సస్పెన్షన్ కోసం ముందు భాగంలో అప్‌సైడ్ డౌన్ ఫోర్క్, వెనుకవైపు మోనోషాక్‌ను ఇచ్చారు. బ్రేకింగ్ కోసం ముందు, వెనుక డిస్క్ బ్రేకులు ఉన్నాయి. ఇందులో సింగిల్ ఛానల్ ABS ఉండే అవకాశం కనిపిస్తోంది. అయితే ఈ ఫీచర్ల పూర్తి వివరాలు, బైక్ రేంజ్, ధర, మార్కెట్లోకి వచ్చే తేదీని Hero MotoCorp ఇంకా వెల్లడించాల్సి ఉంది.