స్పోర్ట్స్ బైక్ లవర్స్కి కిక్ ఇచ్చే న్యూస్ తెచ్చేసిన Hero Karizma XMR 250.. ఆ బైక్స్‌తో పోటీ
భారత టూ వీలర్ మార్కెట్లో స్పోర్ట్స్ బైక్‌లకు ఉన్న ఆదరణను దృష్టిలో పెట్టుకుని Hero MotoCorp మరో కొత్త మోడల్‌ను తీసుకొచ్చేందుకు సిద్ధమవుతున్నట్లు తెలుస్తోంది. కంపెనీకి చెందిన Karizma XMR 250 తాజాగా ఎరుపు రంగులో ఓ డీలర్‌షిప్‌లో కనిపించింది. దీంతో ఈ బైక్ విడుదలపై అంచనాలు పెరిగాయి. ప్రస్తుతం మార్కెట్లో ఉన్న Karizma XMR 210 కంటే ఎక్కువ సామర్థ్యంతో రూపొందించిన ఈ కొత్త మోడల్, కంపెనీ ఫ్లాగ్‌షిప్ ఫుల్లీ ఫెయిర్డ్ మోటార్‌సైకిల్‌గా నిలిచే అవకాశం ఉంది.
కొత్త Karizma XMR 250లో స్పోర్టీ డిజైన్‌తో పాటు శక్తివంతమైన ఇంజిన్‌ను అందించనున్నట్లు సమాచారం. ఇప్పటికే Hero Xtreme 250Rలో ఉపయోగిస్తున్న ఇంజిన్‌ను ఇందులోనూ అమర్చవచ్చనే అంచనాలు ఉన్నాయి. అదే జరిగితే పనితీరు పరంగా ఈ బైక్ స్పోర్ట్స్ బైక్ ప్రియులను ఆకట్టుకోవచ్చు. అయితే, కంపెనీ ఇప్పటి వరకు దీని విడుదల తేదీ, ధర, పూర్తి ఫీచర్లను అధికారికంగా వెల్లడించలేదు.
స్పోర్టీ డిజైన్..
Hero Karizma XMR 250 డిజైన్ ప్రస్తుత XMR 210ను పోలి ఉంటుంది. ఇందులో ప్రొజెక్టర్ LED హెడ్‌ల్యాంప్, బూమరాంగ్ ఆకారపు డేటైమ్ రన్నింగ్ లైట్లు (DRLs), ఎక్స్‌టెండ్ చేసిన ఫెయిరింగ్, ఇంటిగ్రేటెడ్ వింగ్‌లెట్స్ ప్రత్యేక ఆకర్షణగా నిలుస్తాయి. పొడవైన విండ్‌స్క్రీన్, గోల్డ్ ఫినిషింగ్ USD ఫ్రంట్ ఫోర్కులు, ఆకర్షణీయమైన ఫ్యూయల్ ట్యాంక్, స్ప్లిట్ సీట్లు బైక్‌కు స్పోర్టీ రూపాన్ని ఇస్తాయి. తాజాగా కనిపించిన రెడ్ కలర్ మోడల్‌తో పాటు గతంలో వైట్, బ్లాక్ రంగుల్లోనూ ఈ బైక్ కనిపించింది.
ఇంజిన్ విషయానికి వస్తే, ఇందులో Hero Xtreme 250Rలోని 249cc సింగిల్ సిలిండర్, లిక్విడ్ కూల్డ్ ఇంజిన్‌ను ఉపయోగించే అవకాశం ఉంది. ఈ ఇంజిన్ 9,250rpm వద్ద 30hp పవర్, 7,500rpm వద్ద 25.3Nm టార్క్‌ను ఉత్పత్తి చేస్తుంది. దీనికి 6-స్పీడ్ గేర్‌బాక్స్ జతచేశారు. అయితే, Karizma XMR 250లో ఇవే స్పెసిఫికేషన్లు ఉంటాయో లేదో కంపెనీ నిర్ధారించాల్సి ఉంది.
ధర రూ.2 లక్షల వరకు..
కొత్త Karizma XMR 250 ధరపై ఇంకా అధికారిక సమాచారం లేదు. ప్రస్తుతం Karizma XMR 210 ప్రారంభ ఎక్స్‌షోరూమ్ ధర రూ.1.86 లక్షలుగా ఉండగా, Hero Xtreme 250R ధర రూ.1.84 లక్షలుగా ఉంది. ఈ ధరలను బట్టి కొత్త Karizma XMR 250 ధర సుమారు రూ.2 లక్షల వరకు ఉండవచ్చని అంచనా వేస్తున్నారు.
డీలర్‌షిప్‌లో బైక్ కనిపించడంతో త్వరలోనే విడుదలయ్యే అవకాశం ఉందనే చర్చ జరుగుతోంది. మార్కెట్లోకి వస్తే Suzuki Gixxer SF 250, KTM RC 200 వంటి స్పోర్ట్స్ బైక్‌లతో పోటీ పడవచ్చు. అయితే, ధర, ఫీచర్లు, విడుదల తేదీపై స్పష్టత రావాలంటే Hero MotoCorp అధికారిక ప్రకటన కోసం వేచి చూడాలి.