కారు ధర తెలిస్తేనే కళ్లు చెదిరిపోతాయ్.. ఎలక్ట్రిక్ లగ్జరీ కారుతో దూసుకొచ్చేసిన BYD.. ఫీచర్లు తెలిస్తే షాక్
లగ్జరీ కార్ల విభాగంలో ఎలక్ట్రిక్ వాహనాల హవా పెరుగుతోంది. సంప్రదాయ లగ్జరీ కార్లకు భిన్నంగా అత్యంత వేగం, ఆధునిక టెక్నాలజీ, విలాసవంతమైన ఇంటీరియర్‌తో కూడిన ఎలక్ట్రిక్ మోడళ్లను కంపెనీలు పరిచయం చేస్తున్నాయి. ఈ నేపథ్యంలో BYDకు చెందిన ప్రీమియం బ్రాండ్ Denza భారత మార్కెట్లోకి అడుగుపెట్టింది. తన తొలి లైనప్‌లో D9 లగ్జరీ MPVతో పాటు Z9 GT ప్రీమియం షూటింగ్ బ్రేక్ కారును తీసుకొచ్చింది. వీటిలో Z9 GT ధర రూ.1.57 కోట్లుగా నిర్ణయించడం ఆసక్తిని పెంచుతోంది.
సాధారణంగా ఖరీదైన స్పోర్ట్స్ కార్లలో వేగం, డిజైన్‌కు ప్రాధాన్యత ఇస్తారు. అయితే లగ్జరీ ఎలక్ట్రిక్ కార్లలో ప్రయాణ సౌకర్యం, కనెక్టివిటీ, భద్రతా సదుపాయాలు కూడా కీలకంగా మారాయి. ఈ అన్ని అంశాలను కలిపి అందించే ప్రయత్నం Denza Z9 GTలో కనిపిస్తుంది. మూడు ఎలక్ట్రిక్ మోటార్లు, భారీ బ్యాటరీ, అధునాతన స్టీరింగ్ టెక్నాలజీతో పాటు ప్రయాణికుల సౌకర్యం కోసం ఎన్నో ప్రత్యేక ఫీచర్లను ఇందులో అందించారు.
లగ్జరీ ఫీచర్లతో ప్రత్యేక క్యాబిన్
Denza Z9 GTని షూటింగ్ బ్రేక్ బాడీ స్టైల్‌లో రూపొందించారు. LED లైట్లు, 21 ఇంచుల టైర్లు, డ్యూయల్ టోన్ అల్లాయ్ వీల్స్, పసుపు రంగు బ్రేక్ కాలిపర్లు స్పోర్టీ లుక్‌ను అందిస్తాయి. క్యాబిన్‌లో లెదర్ అప్‌హోల్స్టరీ, ఫోర్ స్పోక్ స్టీరింగ్ వీల్ ఉన్నాయి. ముందు భాగంలో రెండు 50W వైర్‌లెస్ ఛార్జర్లు, వెనుక మరో 50W ఛార్జర్ ఇచ్చారు. 20 స్పీకర్ల Devialet ఆడియో సిస్టమ్, 17.3 ఇంచుల సెంటర్ టచ్‌స్క్రీన్, 13.2 ఇంచుల ప్యాసింజర్ డిస్‌ప్లే, 50 ఇంచుల AR హెడ్‌అప్ డిస్‌ప్లే ప్రత్యేక ఆకర్షణలు.
సాధారణ ORVMలకు బదులుగా డిజిటల్ మిర్రర్లను అందించారు. మైనస్ 6 డిగ్రీల నుంచి 50 డిగ్రీల వరకు పనిచేసే మినీ ఫ్రిజ్, హీటర్, వెంటిలేటెడ్ సీట్లు, అడ్జస్టబుల్ లెగ్ రెస్టులు ఉన్నాయి. డ్రైవర్ సీటును ఎనిమిది విధాలుగా సర్దుబాటు చేసుకోవచ్చు. BYD e3 ప్లాట్‌ఫామ్‌పై రూపొందించిన ఈ కారులో రియర్ వీల్ స్టీరింగ్, ఎయిర్ సస్పెన్షన్, 360 డిగ్రీల కంపాస్ టర్న్ సదుపాయాలు ఉన్నాయి. ప్రత్యేక స్టీరింగ్ టెక్నాలజీతో 15 డిగ్రీల వరకు పక్కకు తిరిగే సామర్థ్యం ఉండటంతో ఇరుకైన ప్రదేశాల్లోనూ కారు నడపడం, పార్కింగ్ చేయడం సులభమవుతుంది.
2.7 సెకన్లలో 100 kmph..
పనితీరు విషయానికి వస్తే ఇందులో 122.29kWh సామర్థ్యం కలిగిన రెండో తరం BYD Blade బ్యాటరీని ఉపయోగించారు. మూడు ఎలక్ట్రిక్ మోటార్లు కలిపి 1,139bhp పవర్, 1,210Nm టార్క్‌ను ఉత్పత్తి చేస్తాయి. దీంతో ఈ కారు 0 నుంచి 100 kmph వేగాన్ని కేవలం 2.7 సెకన్లలో అందుకుంటుంది. గరిష్ట వేగం గంటకు 270 కిలోమీటర్లు. ఒక్కసారి ఛార్జింగ్‌తో 670 కిలోమీటర్ల NEDC రేంజ్ అందిస్తుందని కంపెనీ వెల్లడించింది. 1,500kW DC ఇన్‌పుట్‌కు సపోర్ట్ చేసే ఛార్జింగ్ సామర్థ్యం కూడా ఉంది.
భద్రత కోసం తొమ్మిది ఎయిర్‌బ్యాగులు, 360 డిగ్రీల కెమెరా, ABS, EBD, Electronic Stability Control, 12 పార్కింగ్ సెన్సార్లను అందించారు. Level 2 ADAS, ఆటోమేటెడ్ పార్కింగ్ అసిస్ట్, డ్రైవర్ ఫెటీగ్ మానిటర్, టైర్ ప్రెజర్ మానిటరింగ్ సిస్టమ్‌తో పాటు టైర్ బరస్ట్ కంట్రోల్ సిస్టమ్ కూడా ఉంది. ఈ కారు ఎక్స్‌షోరూమ్ ధర రూ.1.57 కోట్లు. అధికారిక Denza డీలర్‌షిప్‌ల ద్వారా రూ.10 లక్షల టోకెన్ అమౌంట్‌తో బుకింగ్‌లు ప్రారంభమయ్యాయి. అయితే 670 కిలోమీటర్ల రేంజ్ NEDC పరీక్షా ప్రమాణాల ప్రకారం ప్రకటించినదే. వాస్తవ ప్రయాణంలో రేంజ్ మారవచ్చు. భారత లగ్జరీ ఎలక్ట్రిక్ కార్ల మార్కెట్లో ఈ మోడల్ ఎలాంటి స్పందన పొందుతుందో చూడాలి.