Shafali Verma : తండ్రికి ఇచ్చిన మాట నిలబెట్టుకున్న షఫాలీ.. వన్డే వరల్డ్ కప్ ఫైనల్లో రికార్డ్
మహిళల వన్డే ప్రపంచ కప్ ఫైనల్లో భారత యువ ఓపెనర్ షఫాలీ వర్మ తన విధ్వంసకర బ్యాటింగ్తో అద్భుతమైన ఇన్నింగ్స్ ఆడింది. కేవలం 49 బంతుల్లో హాఫ్ సెంచరీ పూర్తి చేసింది షఫాలీ. అయితే ఒకానొక దశలో జట్టులో స్థానం దక్కించుకోవడంపై సందేహాలు ఉన్నా, ఫైనల్ మ్యాచ్లో అద్భుతంగా రాణించింది.
Shafali Verma : మహిళల వన్డే ప్రపంచ కప్ ఫైనల్లో భారత యువ ఓపెనర్ షఫాలీ వర్మ తన విధ్వంసకర బ్యాటింగ్తో అద్భుతమైన ఇన్నింగ్స్ ఆడింది. కేవలం 49 బంతుల్లో హాఫ్ సెంచరీ పూర్తి చేసింది షఫాలీ. అయితే ఒకానొక దశలో జట్టులో స్థానం దక్కించుకోవడంపై సందేహాలు ఉన్నా, ఫైనల్ మ్యాచ్లో అద్భుతంగా రాణించింది. ఈ మెరుపు ప్రదర్శనతో షఫాలీ వర్మ ప్రపంచ కప్ ఫైనల్స్ చరిత్రలోనే (పురుషులు లేదా మహిళలు) హాఫ్ సెంచరీ చేసిన అతి పిన్న వయస్కురాలైన బ్యాట్స్మెన్గా ప్రపంచ రికార్డును సృష్టించింది. తండ్రికి ఇచ్చిన మాటను నిలబెట్టుకున్న ఈ యంగ్ ప్లేయర్, సెంచరీకి చేరువలో 87 పరుగుల వద్ద అవుట్ అయింది.
ప్రపంచ కప్ ఫైనల్లో షఫాలీ వర్మ ప్రదర్శన ఆమె తండ్రికి ఇచ్చిన వాగ్దానాన్ని నిలబెట్టుకోవడమే కాకుండా, తన జట్టుకు గొప్ప ఊపునిచ్చింది. ప్రపంచ కప్ జట్టులో స్థానం దక్కించుకోలేకపోయిన షఫాలీకి, సెమీఫైనల్కు ముందు పత్రికా రావల్ గాయపడడంతో జట్టులో అవకాశం లభించింది. సెమీఫైనల్లో కేవలం 10 పరుగులకే ఔటైన షఫాలీ, సౌతాఫ్రికాతో జరిగిన ఫైనల్లో అద్భుతంగా పుంజుకుంది. వర్షం కారణంగా రెండు గంటలు ఆలస్యంగా ప్రారంభమైన మ్యాచ్లో ఆమె బ్యాటింగ్కు దిగి కేవలం 49 బంతుల్లోనే తన హాఫ్ సెంచరీని పూర్తి చేసింది.
ఈ హాఫ్ సెంచరీ షఫాలీకి వ్యక్తిగతంగా చాలా కీలకం. ఎందుకంటే, సుదీర్ఘ కాలంగా ఆమె వన్డే క్రికెట్లో మంచి ప్రదర్శన కోసం ఎదురు చూస్తోంది. షఫాలీ వన్డే క్రికెట్లో మూడు సంవత్సరాలకు పైగా (జూలై 2022 తర్వాత) హాఫ్ సెంచరీని నమోదు చేయలేకపోయింది. ఈ కాలంలో కేవలం ఒక్కసారి మాత్రమే 40 పరుగుల మార్కును దాటి, 49 పరుగుల వద్ద ఔటయింది. ఈ ఫైనల్ ఇన్నింగ్స్ ఆమె కెరీర్లో ఐదవ వన్డే హాఫ్ సెంచరీ. ఈ ప్రదర్శనతో ఆమె తన ఆత్మవిశ్వాసాన్ని తిరిగి పెంచుకుంది.
షఫాలీ వర్మ తన అద్భుతమైన ఇన్నింగ్స్తో ప్రపంచ క్రికెట్లో సరికొత్త రికార్డును నెలకొల్పింది. ప్రపంచ కప్ ఫైనల్ చరిత్రలోనే (పురుషులు, మహిళలు ఇద్దరిలో) హాఫ్ సెంచరీ చేసిన అతి పిన్న వయస్కురాలైన బ్యాట్స్మెన్గా షఫాలీ వర్మ (21 సంవత్సరాల 278 రోజులు) ప్రపంచ రికార్డును సృష్టించింది. అంతేకాకుండా, వన్డే ప్రపంచ కప్ ఫైనల్లో అర్ధ సెంచరీ చేసిన మూడో భారత ఓపెనర్గా కూడా ఆమె నిలిచింది. 2003 పురుషుల వరల్డ్ కప్ ఫైనల్లో వీరేంద్ర సెహ్వాగ్, 2017 మహిళల వరల్డ్ కప్ ఫైనల్లో పూనమ్ రౌత్ ఈ ఘనత సాధించారు.
షఫాలీ సెంచరీకి చేరువలో ఔట్ అయినప్పటికీ, తన తండ్రికి ఇచ్చిన మాటను నిలబెట్టుకుంది. 28వ ఓవర్లో అయాబొంగా ఖాకా బౌలింగ్లో పెద్ద షాట్ ఆడే ప్రయత్నంలో షఫాలీ 87 పరుగుల వద్ద అవుట్ అయింది. ఆమె 78 బంతులు ఎదుర్కొని 7 ఫోర్లు, 2 సిక్సర్లు కొట్టింది. సెమీఫైనల్లో తక్కువ పరుగులకే ఔటైన తర్వాత, ఫైనల్లో పెద్ద ఇన్నింగ్స్ ఆడతానని షఫాలీ తన తండ్రికి వాగ్దానం చేసింది. సెంచరీ మిస్సైనా, 87 పరుగుల కీలక ఇన్నింగ్స్ ఆడి, తన మాటను నిలబెట్టుకుంది.