Video: వామ్మో.. వన్ హ్యాండ్ క్యాచ్తో రప్పాడించిన ఐపీఎల్ కాస్ట్లీ ప్లేయర్..
Sam Curran Brilliant One Hand Catch: 2025 టీ20 బ్లాస్ట్లో సర్రే కెప్టెన్ సామ్ కుర్రాన్ తన డేంజరస్ బౌలింగ్తో మూడు ఓవర్లలో 18 పరుగులిచ్చి 4 వికెట్లు పడగొట్టాడు. ఇది మాత్రమే కాదు, ఈ మ్యాచ్లో తన సొంత బౌలింగ్లో అద్భుతమైన క్యాచ్ పట్టాడు. ఈ వీడియో సోషల్ మీడియాలో వైరల్ అవుతోంది.
Sam Curran Brilliant One Hand Catch: క్రికెట్ అభిమానుల మదిలో ఎప్పటికీ నిలిచిపోయే అద్భుతమైన క్యాచ్లలో ఒకటిగా టీ20 బ్లాస్ట్ 2025లో సామ్ కర్రాన్ పట్టిన వన్ హ్యాండ్ క్యాచ్ చరిత్రలో నిలిచిపోతుంది. ససెక్స్తో జరిగిన మ్యాచ్లో సర్రే తరపున ఆడిన సామ్ కర్రాన్, తన సొంత బౌలింగ్లో పట్టిన ఈ క్యాచ్ కేవలం ఒక వికెట్ మాత్రమే కాదు, మ్యాచ్ గమనాన్ని మార్చేసిన కీలక మలుపు.
జులై 18న హోవ్లోని కౌంటీ గ్రౌండ్లో సర్రే, ససెక్స్ మధ్య జరిగిన ఈ ఉత్కంఠభరితమైన మ్యాచ్లో, సర్రే మొదట బ్యాటింగ్ చేసి విల్ జాక్స్ అద్భుతమైన సెంచరీ (100 పరుగులు)తో 204 పరుగుల భారీ లక్ష్యాన్ని నిర్దేశించింది. అనంతరం బౌలింగ్లో సర్రే ఆధిపత్యం ప్రదర్శించింది. అయితే, మ్యాచ్ చివరి దశకు చేరుకున్నప్పుడు ససెక్స్ బ్యాట్స్మెన్ జేమ్స్ కోల్స్ (39 పరుగులు, 18 బంతులు) అద్భుతంగా ఆడుతూ లక్ష్యాన్ని ఛేదించే దిశగా సాగుతున్నాడు.
అదే సమయంలో, మ్యాచ్ ఉత్కంఠగా మారిన 19వ ఓవర్లో బౌలింగ్ చేయడానికి వచ్చిన సామ్ కర్రాన్ తన మ్యాజిక్ను చూపించాడు. ఆ ఓవర్లోని నాలుగో బంతికి కోల్స్ స్ట్రెయిట్ డౌన్ ది గ్రౌండ్ షాట్ ఆడటానికి ప్రయత్నించగా, ఊహించని విధంగా కర్రాన్ తన అద్భుతమైన రిఫ్లెక్స్లతో ఒక చేత్తో బంతిని ఒడిసి పట్టాడు. ఆ క్షణం చూసిన వారందరూ నివ్వెరపోయారు. బ్యాట్స్మెన్ జేమ్స్ కోల్స్తో పాటు, గ్రౌండ్లో ఉన్న ఆటగాళ్లు, కామెంటేటర్లు, అభిమానులు సైతం కర్రాన్ అద్భుతానికి ఆశ్చర్యపోయారు. ఈ క్యాచ్ వీడియో సోషల్ మీడియాలో వైరల్గా మారింది, సామ్ కర్రాన్ అసాధారణ ఫీల్డింగ్ నైపుణ్యానికి ప్రశంసలు వెల్లువెత్తాయి.
&
Sam Curran caught it like he was in a movie.pic.twitter.com/kahhV3yFhf
— Cricket.com (@weRcricket) July 19, 2025
ఈ కీలక వికెట్ ససెక్స్ విజయావకాశాలను దెబ్బతీసింది. కోల్స్ అవుటైన వెంటనే, అదే ఓవర్లో కర్రాన్ డానీ ల్యాంబ్ను కూడా అవుట్ చేసి సర్రేకు మరింత బలం చేకూర్చాడు. ససెక్స్ కేవలం 197 పరుగులకే పరిమితం కావడంతో, సర్రే ఏడు పరుగుల తేడాతో విజయం సాధించింది. ఈ మ్యాచ్లో సామ్ కర్రాన్ నాలుగు వికెట్లతో సర్రే విజయంలో కీలక పాత్ర పోషించాడు.
సామ్ కర్రాన్ పట్టిన ఈ క్యాచ్ కేవలం ఒక సాధారణ క్యాచ్ కాదు. అది అతని అథ్లెటిసిజం, ఏకాగ్రత, ఒత్తిడిలో ప్రశాంతతకు నిదర్శనం. మ్యాచ్లో కీలక సమయంలో, అత్యంత వేగంగా వచ్చిన బంతిని తన సొంత బౌలింగ్లో ఒక చేత్తో పట్టుకోవడం అనేది అత్యంత అరుదైన దృశ్యం. ఈ క్యాచ్ టీ20 బ్లాస్ట్ 2025లో హైలైట్గా నిలవడమే కాకుండా, రాబోయే తరాల యువ క్రికెటర్లకు స్ఫూర్తినిస్తుంది. సామ్ కర్రాన్ చూపిన ఈ అద్భుతమైన ఫీల్డింగ్ ప్రదర్శన, క్రికెట్లో ఫీల్డింగ్ ఎంత ముఖ్యమో మరోసారి చాటి చెప్పింది.
మరిన్ని క్రికెట్ వార్తల కోసం ఇక్కడ క్లిక్ చేయండి..