Video: తొలి ఓవర్‌లోనే ఔట్.. సచిన్, కోహ్లీ సరసన హిట్‌మ్యాన్ చెత్త రికార్డ్..!
Rohit Sharma Duck: న్యూజిలాండ్‌తో తొలి వన్డేలో టీమిండియా స్టార్ బ్యాటర్ రోహిత్ శర్మకు ఘోర నిరాశ ఎదురైంది. కేవలం ఆరు బంతులు ఎదుర్కొని పరుగుల ఖాతా తెరవకుండానే పెవిలియన్‌కు చేరాడు. మిచెల్ సాంట్నర్ అద్భుత క్యాచ్ అందుకోవడంతో రోహిత్ ఇన్నింగ్స్ ముగిసింది. ఈ డకౌట్‌తో భారత క్రికెట్‌లో ఓ చెత్త రికార్డు జాబితాలోనూ హిట్‌మ్యాన్ పేరు చేరింది.
Rohit Sharma Duck: భారత్, న్యూజిలాండ్ (India vs New Zealand) తొలి వన్డేలో టీమిండియాకు ఊహించని షాక్ తగిలింది. 186 పరుగుల స్వల్ప లక్ష్యంతో బరిలోకి దిగిన భారత జట్టుకు ఆరంభంలోనే ఎదురుదెబ్బ తగిలింది. స్టార్ ఓపెనర్ రోహిత్ శర్మ (Rohit Sharma) పరుగుల ఖాతా తెరవకుండానే వెనుదిరిగాడు. కైల్ జేమీసన్ (Kyle Jamieson) వేసిన ఇన్నింగ్స్ తొలి ఓవర్ ఆరో బంతికి రోహిత్ క్యాచ్ ఇచ్చి ఔటయ్యాడు. భారీ షాట్ ఆడేందుకు ప్రయత్నించిన హిట్‌మ్యాన్ బంతిని సరిగా కనెక్ట్ చేయలేకపోయాడు. మిడ్ ఆఫ్‌లో ఫీల్డింగ్ చేస్తున్న న్యూజిలాండ్ కెప్టెన్ మిచెల్ సాంట్నర్ ముందుకు డైవ్ చేస్తూ అద్భుత క్యాచ్ అందుకున్నాడు. దీంతో రోహిత్ ఆరు బంతుల్లో డకౌట్‌గా పెవిలియన్ చేరాడు. ఈ ఔట్‌తో భారత క్రికెట్‌లో అత్యధిక డకౌట్లు చేసిన ఆటగాళ్ల జాబితాలో రోహిత్ మరోసారి చర్చలోకి వచ్చాడు.
తొలి ఓవర్‌లోనే హిట్‌మ్యాన్ ఔట్..
న్యూజిలాండ్ బౌలర్ కైల్ జేమీసన్ తొలి ఓవర్‌లోనే భారత్‌కు భారీ షాక్ ఇచ్చాడు. ఓవర్ చివరి బంతిని ఆఫ్ స్టంప్ వెలుపల ఫుల్ లెంగ్త్‌లో వేయగా, రోహిత్ దాన్ని నేరుగా మిడ్ ఆఫ్ మీదుగా బాదేందుకు ప్రయత్నించాడు. అయితే బంతి బ్యాట్‌కు తగిలి గాల్లోకి లేచింది. అక్కడే ఉన్న సాంట్నర్ కుడివైపు డైవ్ చేస్తూ బంతిని నేలకు తగలకముందే అందుకున్నాడు. దీంతో రోహిత్ ఇన్నింగ్స్ ముగిసింది.
అంతర్జాతీయ క్రికెట్‌లో అత్యధిక డకౌట్లు చేసిన భారత ఆటగాళ్లు..
ఈ డకౌట్‌తో అన్ని ఫార్మాట్లు కలిపి భారత ఆటగాళ్ల అత్యధిక డకౌట్ల జాబితాలో రోహిత్ శర్మ 35 డకౌట్లతో నిలిచాడు. ఈ జాబితాలో విరాట్ కోహ్లీ 41 డకౌట్లతో రెండో స్థానంలో ఉండగా, జహీర్ ఖాన్ 43 డకౌట్లతో అగ్రస్థానంలో ఉన్నాడు.
భారత్ తరపున అత్యధిక డకౌట్లు (అన్ని ఫార్మాట్లు):
43 – జహీర్ ఖాన్
41 – విరాట్ కోహ్లీ
40 – ఇషాంత్ శర్మ
37 – జస్ప్రీత్ బుమ్రా, హర్భజన్ సింగ్
35 – అనిల్ కుంబ్లే, రోహిత్ శర్మ
34 – సచిన్ టెండూల్కర్
వన్డేల్లోనూ చెత్త రికార్డు జాబితాలో రోహిత్..
వన్డే క్రికెట్‌లో అత్యధిక సార్లు డకౌట్ అయిన భారత ఆటగాళ్ల జాబితాలోనూ రోహిత్ పేరు ఉంది. 17 డకౌట్లతో హర్భజన్ సింగ్‌తో కలిసి సంయుక్తంగా ఉన్నాడు. ఈ జాబితాలో సచిన్ టెండూల్కర్ 20 డకౌట్లతో మొదటి స్థానంలో ఉండగా, విరాట్ కోహ్లీ, జవగళ్ శ్రీనాథ్ 19 డకౌట్లతో తర్వాతి స్థానంలో ఉన్నారు.
భారత్ తరఫున వన్డేల్లో అత్యధిక డకౌట్లు:
20 – సచిన్ టెండూల్కర్
19 – విరాట్ కోహ్లీ, జవగళ్ శ్రీనాథ్
18 – అనిల్ కుంబ్లే, యువరాజ్ సింగ్
17 – హర్భజన్ సింగ్, రోహిత్ శర్మ
16 – సౌరవ్ గంగూలీ
అభిమానులకు నిరాశ.. భారత్‌పై ఒత్తిడి..
తక్కువ లక్ష్యాన్ని ఛేదించాల్సిన సమయంలో రోహిత్ వికెట్ కోల్పోవడం భారత జట్టుకు ఎదురుదెబ్బగా మారింది. మరోవైపు సాంట్నర్ అద్భుత ఫీల్డింగ్‌తో న్యూజిలాండ్‌కు మంచి ఆరంభాన్ని అందించాడు. ఇప్పుడు విరాట్ కోహ్లీ, శుభ్‌మన్ గిల్ వంటి బ్యాటర్లు జట్టును విజయతీరాలకు చేర్చాల్సిన బాధ్యత తీసుకోవాల్సి ఉంది.