MS Dhoni : హైదరాబాద్‌కు బయలుదేరిన ధోనీ.. SRHతో మ్యాచ్‌లో ‘తలా’ సందడి ఖాయమేనా?

MS Dhoni : చెన్నై సూపర్ కింగ్స్ అభిమానులకు ఎట్టకేలకు ఒక తీపి కబురు అందింది. ఐపీఎల్ 2026 సీజన్ మొదలైనప్పటి నుంచి మైదానంలో కనిపించని ‘తలా’ ఎంఎస్ ధోనీ, మళ్ళీ యాక్షన్‌లోకి వచ్చేందుకు సిద్ధమయ్యాడు. గత కొన్ని వారాలుగా గాయంతో సతమతమవుతున్న ధోనీ, శనివారం హైదరాబాద్‌లోని రాజీవ్ గాంధీ ఇంటర్నేషనల్ స్టేడియంలో సన్‌రైజర్స్ హైదరాబాద్‌తో జరగబోయే మ్యాచ్ కోసం జట్టుతో కలిసి ప్రయాణమయ్యాడు. ధోనీ టీమ్ బస్సు ఎక్కుతున్న వీడియో సోషల్ మీడియాలో వైరల్ కావడంతో, అతడు తుది జట్టులో ఉంటాడనే ఆశలు చిగురించాయి.

గాయం తర్వాత తొలి పర్యటన

ఐపీఎల్ 2026 ప్రారంభంలో ధోనీ కాలి కండరాల గాయం కారణంగా మొదటి రెండు వారాలు ఆటకు దూరమయ్యాడు. గతంలో గువహటి, బెంగళూరులో జరిగిన అవే మ్యాచ్‌లకు కూడా ధోనీ వెళ్లలేదు. కానీ, గురువారం చెన్నై నుంచి హైదరాబాద్‌కు బయలుదేరిన జట్టుతో ధోనీ కూడా ఉండటం అందరినీ ఆశ్చర్యపరిచింది. స్టేడియం గేట్ల వద్ద వేచి ఉన్న అభిమానులకు తలా చిరునవ్వుతో అభివాదం చేస్తూ బస్సు ఎక్కాడు. సీఎస్‌కే అధికారికంగా “On Time, All set for Hyderabad” అనే క్యాప్షన్‌తో ఈ వీడియోను షేర్ చేసింది.

జట్టులో ధోనీ పాత్ర ఎలా ఉండబోతోంది?

ప్రస్తుతం రుతురాజ్ గైక్వాడ్ సారథ్యంలో చెన్నై వరుసగా రెండు మ్యాచ్‌లు గెలిచి ఫామ్‌లోకి వచ్చింది. పాయింట్ల పట్టికలో 8వ స్థానంలో ఉన్నప్పటికీ, జట్టులో డెవాల్డ్ బ్రెవిస్, నూర్ అహ్మద్ వంటి యువ ఆటగాళ్లు అదరగొడుతున్నారు. ఇలాంటి సమయంలో ధోనీ జట్టులోకి వస్తే అది అదనపు బలంగా మారుతుంది. అయితే ధోనీ పూర్తిస్థాయిలో కీపింగ్ చేస్తాడా లేక ఇంపాక్ట్ ప్లేయర్‎గా కేవలం బ్యాటింగ్‌కు మాత్రమే వస్తాడా అన్నది సస్పెన్స్‌గా మారింది. శుక్రవారం ఉప్పల్ స్టేడియంలో జరిగే ప్రాక్టీస్ సెషన్ తర్వాత ధోనీ ఫిట్‌నెస్‌పై పూర్తి స్పష్టత వచ్చే అవకాశం ఉంది.

Main man is back 🥹❤️@MSDhoni #MSDhoni #WhistlePodu pic.twitter.com/EO9wkTkSQR

— DHONI Trends™ (@TrendsDhoni) April 16, 2026

హైదరాబాద్ వర్సెస్ చెన్నై – అసలైన మజా

శనివారం జరగబోయే మ్యాచ్‌కు టికెట్లన్నీ ఇప్పటికే అమ్ముడైపోయాయి. ఒకవైపు ధోనీ రాక, మరోవైపు ఎస్‌ఆర్‌హెచ్ కెప్టెన్ ప్యాట్ కమిన్స్ కూడా జట్టులోకి తిరిగి వస్తుండటంతో ఈ మ్యాచ్ హోరాహోరీగా సాగనుంది. ఉప్పల్ పిచ్ బ్యాటింగ్‌కు అనుకూలించనుండటంతో, ధోనీ హెలికాప్టర్ షాట్ల కోసం అభిమానులు వేచి చూస్తున్నారు. ఒకవేళ ధోనీ తుది జట్టులో లేకపోయినా, డగౌట్‌లో ఉండి గైక్వాడ్‌కు సలహాలు ఇవ్వడం కూడా జట్టుకు ఎంతో మేలు చేస్తుంది.

MSD ✈️ HYD 🦁#WhistlePodu #Yellove pic.twitter.com/9OvxIxfra1

— Chennai Super Kings (@ChennaiIPL) April 16, 2026

ముంబై మ్యాచ్‌కు ముందే ఫిట్‌నెస్ పరీక్ష

సెలక్టర్లు, చెన్నై మేనేజ్‌మెంట్ దృష్టి ఏప్రిల్ 23న జరగబోయే ముంబై ఇండియన్స్ మ్యాచ్‌పై కూడా ఉంది. ఆ లోపు ధోనీకి కనీసం ఒక మ్యాచ్ ప్రాక్టీస్ ఉండాలని భావిస్తున్నారు. అందుకే హైదరాబాద్ మ్యాచ్‌లో ధోనీని బరిలోకి దించే అవకాశాలు ఎక్కువగా ఉన్నాయి.

మరిన్ని క్రీడా వార్తల కోసం ఇక్కడ క్లిక్ చేయండి..