MI Captain: ఫ్యాన్స్‌కు గుడ్‌న్యూస్.. ముంబై కెప్టెన్‌గా రోహిత్ శర్మ రీఎంట్రీ.. హార్దిక్ ట్రేడ్ ఫిక్స్?

Rohit Sharma Mumbai Indians Captain: ఐపీఎల్ 2027 (IPL 2027) సీజన్‌కు ముందే ముంబై ఇండియన్స్ (Mumbai Indians) జట్టులో భారీ మార్పులు చోటుచేసుకోబోతున్నాయా? ఐదుసార్లు ఛాంపియన్‌గా నిలిచిన ముంబై జట్టు మళ్లీ పాత విజయాల బాట పట్టేందుకు కీలక నిర్ణయాలు తీసుకోబోతున్నట్లు తెలుస్తోంది. ఇందులో భాగంగా టీమిండియా మాజీ కెప్టెన్ రోహిత్ శర్మ (Rohit Sharma)కు తిరిగి జట్టు పగ్గాలు అప్పగించనున్నట్లు వార్తలు వస్తున్నాయి. మరోవైపు ప్రస్తుత కెప్టెన్ హార్దిక్ పాండ్యా (Hardik Pandya) పంజాబ్ కింగ్స్ (Punjab Kings) జట్టులోకి వెళ్లనున్నట్లు ప్రచారం జరుగుతోంది.

ఈ నెలలోనే రోహిత్ కెప్టెన్సీపై ప్రకటన?

ఇండియా టుడే జర్నలిస్ట్ రాహుల్ రావత్ కథనం ప్రకారం.. ఐపీఎల్ 2027 సీజన్‌కు రోహిత్ శర్మను ముంబై ఇండియన్స్ కెప్టెన్‌గా తిరిగి నియమించనున్నట్లు సమాచారం. ఈ నెల 16 నుంచి 18వ తేదీల మధ్య అధికారిక ప్రకటన వచ్చే అవకాశం ఉందని తెలుస్తోంది. అయితే దీనిపై ఫ్రాంచైజీ నుంచి అధికారిక ధృవీకరణ రావాల్సి ఉంది.

రోహిత్ శర్మ 2013 నుంచి 2023 వరకు ముంబై ఇండియన్స్‌కు కెప్టెన్‌గా వ్యవహరించాడు. అతడి నాయకత్వంలో జట్టు ఏకంగా ఐదుసార్లు ఐపీఎల్ టైటిల్‌ను గెలుచుకుంది. అయితే 2024 సీజన్‌కు ముందు రోహిత్‌ను కెప్టెన్సీ నుంచి తప్పించి హార్దిక్ పాండ్యాకు బాధ్యతలు అప్పగించారు. హార్దిక్ నాయకత్వంలో గత మూడు సీజన్లుగా ముంబై జట్టు ఫైనల్‌కు చేరుకోలేకపోయింది.

పంజాబ్‌కు హార్దిక్.. అర్ష్‌దీప్ ముంబైకి?

ముంబై, పంజాబ్ కింగ్స్ మధ్య హార్దిక్ పాండ్యా, అర్ష్‌దీప్ సింగ్ (Arshdeep Singh) ట్రేడ్ వ్యవహారం కూడా తుది దశకు చేరినట్లు నివేదిక వెల్లడించింది. ఈ రెండు ఫ్రాంచైజీలు ఇప్పటికే సంబంధిత పత్రాలను బీసీసీఐకి పంపినట్లు సమాచారం. అయితే ఈ ట్రేడ్‌పై అధికారిక ప్రకటన రావాల్సి ఉంది.

పంజాబ్ కెప్టెన్‌గా శ్రేయస్ అయ్యరే!

హార్దిక్ పాండ్యా పంజాబ్ కింగ్స్‌లో చేరినా ఆ జట్టుకు కెప్టెన్‌గా వ్యవహరించడని సమాచారం. కోల్‌కతా నైట్ రైడర్స్‌కు ఛాంపియన్‌షిప్ అందించిన శ్రేయస్ అయ్యర్ (Shreyas Iyer) వచ్చే సీజన్‌లోనూ పంజాబ్ కెప్టెన్‌గా కొనసాగనున్నట్లు తెలుస్తోంది.

మరోవైపు రాజస్థాన్ రాయల్స్ (Rajasthan Royals) జట్టుకు రియాన్ పరాగ్ (Riyan Parag) కెప్టెన్‌గా కొనసాగనున్నట్లు నివేదిక పేర్కొంది. అతడిని కెప్టెన్సీ నుంచి తప్పిస్తారన్న ప్రచారానికి ఈ సమాచారం భిన్నంగా ఉంది.

ఈ మార్పులన్నీ అధికారికంగా ఖరారైతే ఐపీఎల్ 2027లో ముంబై ఇండియన్స్ కొత్త అధ్యాయం ప్రారంభించనుంది. రోహిత్ తిరిగి కెప్టెన్‌గా వస్తాడా? హార్దిక్ పంజాబ్ జెర్సీ ధరిస్తాడా? అన్నది అధికారిక ప్రకటనలతో తేలనుంది.