BCCI – RTI Act: బీసీసీఐ సమాచార హక్కు చట్టం పరిధిలోకి రాదు: సీఐసీ సంచలన తీర్పు
భారత క్రికెట్ పరిపాలనలో ఒక కీలక పరిణామం చోటుచేసుకుంది. ప్రపంచంలోనే అత్యంత ధనిక క్రికెట్ బోర్డైన బీసీసీఐ (BCCI), సమాచార హక్కు చట్టం (RTI) - 2005 ప్రకారం ఒక 'పబ్లిక్ అథారిటీ' (ప్రభుత్వ సంస్థ) కాదని కేంద్ర సమాచార కమిషన్ (CIC) స్పష్టం చేసింది. ఈ తాజా తీర్పుతో, బోర్డు అంతర్గత వ్యవహారాలను ఆర్టీఐ కింద బహిర్గతం చేయాల్సిన అవసరం బీసీసీఐకి తప్పింది.
ఆర్టీఐ చట్టం పరిధి నుంచి బీసీసీఐని మినహాయిస్తూ కేంద్ర సమాచార కమిషన్ (సీఐసీ) ఒక కీలకమైన తీర్పును వెలువరించింది. బీసీసీఐ ప్రభుత్వ సంస్థ కాదని, అలాగే గణనీయమైన ప్రభుత్వ నిధులను కూడా అందుకోదని కమిషన్ పేర్కొంది. ఈ నిర్ణయం తరువాత, సమాచార హక్కు చట్టం కింద సమాచారాన్ని అందించాల్సిన బాధ్యత బోర్డుకు ఇకపై ఉండదు. భారత క్రికెట్ నియంత్రణ మండలి (బిసిసిఐ)ని సమాచార హక్కు (ఆర్టిఐ) చట్టం కింద ‘ప్రభుత్వ సంస్థ’గా పరిగణించలేమని.. బిసిసిఐ ప్రభుత్వ యాజమాన్యంలో గానీ, నియంత్రణలో గానీ లేదని, అలాగే ప్రభుత్వం నుండి గణనీయమైన ఆర్థిక మద్దతు కూడా పొందడం లేదని కేంద్ర సమాచార కమిషన్ (సిఐసి) సోమవారం తీర్పు ఇచ్చింది.
అసలు ఈ వ్యవహారం ఏమిటి?
2018లో, అప్పటి సమాచార కమిషనర్ ఎం. శ్రీధర్ ఆచార్యులు, ఆర్టీఐ చట్టంలోని సెక్షన్ 2(h) కింద బీసీసీఐని ఒక పబ్లిక్ అథారిటీగా ప్రకటించడంతో ఈ వివాదం మొదలైంది. ఆ నిర్ణయం, ఒక పబ్లిక్ ఇన్ఫర్మేషన్ ఆఫీసర్ (PIO)ను నియమించాలని బోర్డును ఆదేశించింది. అయితే, బీసీసీఐ ఈ ఉత్తర్వును మద్రాస్ హైకోర్టులో సవాలు చేసింది. తదనంతరం, కోర్టు ఈ విషయాన్ని పునఃవిచారణ కోసం కేంద్ర సమాచార కమిషన్కు నివేదించింది. ఇప్పుడు, సమాచార కమిషనర్ పి.ఆర్. రమేష్, ఆర్టీఐ చట్టం ప్రకారం బీసీసీఐ పబ్లిక్ అథారిటీ వర్గంలోకి రాదని పేర్కొంటూ ఒక కొత్త తీర్పును జారీ చేశారు.
అప్పీల్ను కొట్టివేసిన సీఐసీ..
ఏ నిబంధనలు, అధికారాల కింద బీసీసీఐ భారతదేశానికి ప్రాతినిధ్యం వహిస్తుంది. జాతీయ, అంతర్జాతీయ క్రికెట్ టోర్నమెంట్ల కోసం ఆటగాళ్లను ఎంపిక చేస్తుంది అనే విషయాన్ని ప్రశ్నిస్తూ దాఖలైన అప్పీల్ ఈ కేసులో ఉంది. అయితే, కేంద్ర సమాచార కమిషన్ ఈ అప్పీల్ను కొట్టివేసింది.
‘బిసిసిఐ ఒక ప్రైవేట్ – స్వయంప్రతిపత్తి గల సంస్థ’ అని కమిషన్ తన ఉత్తర్వులో పేర్కొంది. బిసిసిఐ అనేది తమిళనాడు సొసైటీల రిజిస్ట్రేషన్ చట్టం కింద నమోదు చేయబడిన ఒక ప్రైవేట్, స్వయంప్రతిపత్తి గల సంస్థ. ఇది రాజ్యాంగం కింద గానీ, పార్లమెంట్ లేదా రాష్ట్ర శాసనసభ ఏ చట్టం ద్వారా గానీ సృష్టించబడలేదు.. అలాగే ఏ ప్రభుత్వ నోటిఫికేషన్ ద్వారా కూడా స్థాపించబడలేదు. సమాచార కమిషనర్ పి.ఆర్. రమేష్ తన ఉత్తర్వులో ఇలా అన్నారు, “ఆర్టీఐ చట్టంలోని సెక్షన్ 2(h) ప్రకారం బిసిసిఐని ఒక ప్రభుత్వ అధికార సంస్థగా పరిగణించలేము. అందువల్ల, ప్రస్తుత కేసులోని వాస్తవాలు, పరిస్థితుల దృష్ట్యా, ఆర్టీఐ చట్టంలోని నిబంధనలు దీనికి వర్తించవు.”.. అని పేర్కొన్నారు.
ప్రభుత్వ నియంత్రణ లేదా నిధులు లేవు:
బీసీసీఐ ప్రత్యక్ష ప్రభుత్వ నియంత్రణలో లేదని, ఆర్థికంగా స్వయం సమృద్ధిగా ఉందని కేంద్ర సమాచార కమిషన్ స్పష్టంగా పేర్కొంది. అందుకే దీనిని ఆర్టీఐ చట్ట పరిధిలోకి తీసుకురాలేరు. ఈ నిర్ణయం తరువాత, సమాచార హక్కు చట్టం కింద సమాచారం అందించాల్సిన బాధ్యత బీసీసీఐకి ఇకపై ఉండదు. ఈ నిర్ణయం భారత క్రికెట్ పరిపాలనకు అత్యంత ముఖ్యమైనదిగా పరిగణించబడుతుంది, ఎందుకంటే ఇది బీసీసీఐ స్వయంప్రతిపత్తిని మరింత బలోపేతం చేస్తుంది. మరోవైపు, పారదర్శకత, జవాబుదారీతనంపై చర్చ మరోసారి తీవ్రమయ్యే అవకాశం ఉంది.