IPL 2025: ముంబై ఫ్యాన్స్ కి గుడ్ న్యూస్! జట్టులోకి తిరిగి వస్తున్న డేంజరస్ ఆల్‌రౌండర్!

Will Jacks 1

ఐపీఎల్ 2025 సీజన్ మళ్లీ ప్రారంభంకాబోతున్న వేళ ముంబై ఇండియన్స్ (MI) జట్టుకు ఓక పెద్ద శుభవార్త అందింది. ఇంగ్లండ్ ఆల్‌రౌండర్ విల్ జాక్స్ తన ఇన్‌స్టాగ్రామ్‌లో ముంబైకి వస్తున్న విమానంలో ఉన్న ఫోటోను షేర్ చేస్తూ భారతదేశానికి తిరిగి వస్తున్నట్లు ప్రకటించారు. దీంతో అతని లభ్యతపై నెలకొన్న ఊహాగానాలకు తెరపడింది. IPL 18వ సీజన్ మధ్యలో భారత్-పాకిస్తాన్ మధ్య సైనిక ఉద్రిక్తతల కారణంగా లీగ్‌ను తాత్కాలికంగా నిలిపివేయగా, చాలామంది విదేశీ ఆటగాళ్లు స్వదేశానికి తిరిగిపోయారు. దీనివల్ల జట్లలో అసమతుల్యత ఏర్పడింది. ఈ తరుణంలో జాక్స్ పునరాగమనం MIకు ఒక భారీ బూస్ట్‌గా మారింది. ప్రస్తుతం ముంబై జట్టు పాయింట్ల పట్టికలో 14 పాయింట్లతో నాల్గవ స్థానంలో ఉంది, ప్లేఆఫ్స్‌కు చేరేందుకు పోరాటం కొనసాగిస్తోంది.

ఈ సీజన్‌లో విల్ జాక్స్ ముంబైకు కీలక ఆటగాడిగా నిలిచాడు. అతను 12 గ్రూప్ స్టేజ్ మ్యాచ్‌లలో 11 మ్యాచ్‌లు ఆడి, మొత్తం 195 పరుగులు చేశాడు. అలాగే తన ఆఫ్-స్పిన్‌తో ఐదు కీలక వికెట్లు తీసుకున్నాడు. ముఖ్యంగా సన్‌రైజర్స్ హైదరాబాద్, లక్నో సూపర్ జెయింట్స్‌పై విజయాల్లో అతను మ్యాన్ ఆఫ్ ది మ్యాచ్ అవార్డు అందుకున్నాడు. ఇదే సమయంలో, జట్టు ప్లేఆఫ్స్‌కు అర్హత సాధిస్తే, జాక్స్ స్థానంలో బెయిర్‌స్టోను తీసుకునే అవకాశం ఉందన్న చర్చలు జరిగినా, జాక్స్ కనీసం చివరి రెండు గ్రూప్ దశ మ్యాచ్‌లకు అందుబాటులో ఉంటాడు. కానీ ఆయన వెస్టిండీస్‌తో జరగబోయే ఇంగ్లండ్ వన్డే సిరీస్‌కు కట్టుబడి ఉండటం వల్ల ప్లేఆఫ్ మ్యాచ్‌లకు అందుబాటులో ఉండకపోవచ్చు. అవసరమైన క్లియరెన్స్ లభిస్తే అతని స్థానాన్ని బెయిర్‌స్టో భర్తీ చేయనున్నాడు.

ఇక మరోవైపు, ప్రపంచ టెస్ట్ ఛాంపియన్‌షిప్ ఫైనల్ నేపథ్యంలో ఆస్ట్రేలియా, దక్షిణాఫ్రికా ఆటగాళ్లు ఇప్పటికే IPL నుంచి వైదొలిగిన సంగతి తెలిసిందే. అయినా, వాటి మధ్య జాక్స్ తన IPL పునరాగమనాన్ని ధృవీకరించిన కొద్దిమందిలో ఒకడిగా నిలిచాడు. ముంబై ఇండియన్స్‌కి మే 21న ఢిల్లీ క్యాపిటల్స్‌తో, మే 26న పంజాబ్ కింగ్స్‌తో రెండు కీలక మ్యాచ్‌లు ఉన్నాయి. ఈ మ్యాచ్‌ల ఫలితాలపై వారి ప్లేఆఫ్స్ అవకాశాలు ఆధారపడి ఉండబోతున్నాయి. అలాంటి సమయంలో జాక్స్ వంటి కీలక ఆటగాడు తిరిగి రావడం జట్టుకి గట్టి మద్దతుగా నిలవనుంది.

మరిన్ని క్రికెట్ వార్తల కోసం ఇక్కడ క్లిక్ చేయండి..